Paytmକୁ ୬୧୧ କୋଟି ଟଙ୍କାର କାରଣ ଦର୍ଶାଅ ନୋଟିସ ଜାରି କଲା ଇଡି, FEMA ଉଲ୍ଲଂଘନ ସହ ଜଡ଼ିତ ମାମଲା

ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ ପେଟିଏମ୍‌ର ପେରେଣ୍ଟ କମ୍ପାନି ୱାନ୯୭ କମ୍ୟୁନିକେସନକୁ ୬୧୧ କୋଟି ଟଙ୍କାର କାରଣ ଦର୍ଶାଅ ନୋଟିସ ଜାରି କରିଛି । ଇଡି ଅନୁସାରେ, ବିଭିନ୍ନ ମାମଲାରେ ଫରେନ୍ ଏକ୍ସଚେଞ୍ଜ ମ୍ୟାନେଜମେଣ୍ଟ ଆକ୍ଟ (FEMA) ନିୟମ ଉଲ୍ଲଂଘନ ପାଇଁ ପେଟିଏମ୍‌ର ପେରେଣ୍ଟ କମ୍ପାନିର, ଏହାର ମ୍ୟାନେଜିଂ ଡାଇରେକ୍ଟର ଓ ଏହା ସହ ଜଡ଼ିତ ୟୁନିଟକୁ ୬୧୧ କୋଟି ଟଙ୍କାର କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ପେଟିଏମ୍ ଫାଉଣ୍ଡର ବିଜୟ ଶେଖର ଶର୍ମା ଏହାର ଚେୟାରମ୍ୟାନ, ମ୍ୟାନେଜିଂ ଡାଇରେକ୍ଟର ଓ ସିଇଓ ଅଛନ୍ତି ।

ପେଟିଏମ୍ ମାର୍ଚ୍ଚ ୧ରେ ସେୟାର ବଜାରକୁ ଏହି ନୋଟିସ ବାବଦରେ ଅବଗତ କରାଇଥିଲା । କୁହାଯାଇଥିଲା ଯେ ଏହି ନୋଟିସ ଦୁଇ ସହାୟକ କମ୍ପାନି-ଲିଟିଲ ଇଣ୍ଟରନେଟ୍ ପ୍ରାଇଭେଟ୍ ଲିମିଟେଡ୍ ଓ ନିୟରବାୟ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ କ୍ରୟରେ ଫେମା, ୧୯୯୯ର କିଛି ନିୟମର କଥିତ ଉଲ୍ଲଂଘନ ସହ ଜଡ଼ିତ । ପେଟିଏମ୍ ୨୦୧୭ରେ ଦୁଇ କମ୍ପାନିର ଅଧିଗ୍ରହଣ କରିଥିଲା ।

ଇଡି ବୟାନରେ କହିଛି ଯେ ତଦନ୍ତରେ ଜଣାପଡ଼ିଛି ଯେ ୱାନ୯୭ କମ୍ୟୁନିକେସନ୍ ଲିମିଟେଡ୍ ସିଙ୍ଗାପୁରରେ ବିଦେଶୀ ନିବେଶ କରିଛି ଏବଂ ଓଭରସିଜ୍ ଷ୍ଟେପ୍‌ଡାଉନ୍ ସବ୍‌ସିଡାୟରୀ ଗଠନ ବିଷୟରେ ଭାରତୀୟ ରିଜର୍ଭ ବ୍ୟାଙ୍କକୁ ସୂଚନା ଦିଆଯାଇନଥିଲା । ଏଥିପାଇଁ ଇଡି ଫେମା ନିୟମ ଉଲ୍ଲଂଘନ ପାଇଁ ୱାନ୯୭ କମ୍ୟୁନିକେସନ ଓ ପେଟିଏମର ଅନ୍ୟ ସବସିଡାୟରୀ କମ୍ପାନିକୁ ୬୧୧ କୋଟି ଟଙ୍କାର କାରଣ ଦର୍ଶାଅ ନୋଟିସ୍ ଜାରି କରିଛି ।

ବୟାନରେ ଅଭିଯୋଗ ଅଣାଯାଇଛି ଯେ ୱାନ୯୭ କମ୍ୟୁନିକେସନ୍ ଆରବିଆଇ ଦ୍ୱାରା ଧାର୍ଯ୍ୟ ନିୟମ ଅନୁପାଳନ ନକରି ବିଦେଶୀ ନିବେଶକଙ୍କଠାରୁ ଏଫଡିଆଇ ହାସଲ କରିଥିଲା । ସେହିପରି ନିୟରବାୟ ଇଣ୍ଡିଆ ଆରବିଆଇର ସମୟସୀମା ମଧ୍ୟରେ କମ୍ପାନିକୁ ହାସଲ କରି ଏଫଡିଆଇ ବାବଦରେ ସୂଚନା ଦେଇନଥିଲା । ଅନ୍ୟପଟେ ଏହି ଅଭିଯୋଗ ଉପରେ ପେଟିଏମ୍ କହିଛି ଯେ କିଛି କଥିତ ଉଲ୍ଲଂଘନ ସେହି ସମୟରେ ହୋଇଛି, ଯେତେବେଳେ ଦୁଇ କମ୍ପାନି ପେଟିଏମର ସହାୟକ କମ୍ପାନି ନଥିଲେ ।