SOSA ପ୍ରତିରକ୍ଷା ବୁଝାମଣା ଉପରେ ଭାରତ ଏବଂ ଆମେରିକା କଲେ ହସ୍ତାକ୍ଷର, ଜାଣନ୍ତୁ ଏହା କ’ଣ

ନୂଆଦିଲ୍ଲୀ: ଭାରତ ଏବଂ ଆମରେିକା ଏକ ନୂଆ ପ୍ରତିରକ୍ଷା ବୁଝାମଣା ଉପରେ ହସ୍ତାକ୍ଷର କରିଛନ୍ତି । ଏହି ବୁଝାମଣା ଅନୁସାରେ ଉଭୟ ଦେଶ ପରସ୍ପରର ଆବଶ୍ୟକତାକୁ ପୂରଣ କରିବା ପାଇଁ ପ୍ରତିରକ୍ଷା ଉପକରଣ ଯୋଗାଣ କରିବେ । ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହି ବୁଝାମଣାକୁ ବୈଶ୍ୱିକ ଶାନ୍ତି ଏବଂ ସୁରକ୍ଷା ପାଇଁ ଏକ ମଜଭୁତ ଶକ୍ତି ବୋଲି କହିଛନ୍ତି । ରାଜନାଥ ସିଂହ ୱାଶିଂଟନ ଡିସିରେ ଆମେରିକୀୟ ପ୍ରତିପକ୍ଷ ଲୟଡ୍ ଅଷ୍ଟିନଙ୍କ ସହ ଦ୍ୱିପାକ୍ଷିକ ବୈଠକ କରିଛନ୍ତି । ଦୁଇ ନେତା ଦ୍ୱିପାକ୍ଷିକ ପ୍ରତିରକ୍ଷା ସହଯୋଗ, ଉଦ୍ୟୋଗିକ ସହଯୋଗ, କ୍ଷେତ୍ରୀୟ ସୁରକ୍ଷା ଏବଂ ଅନ୍ୟ ଅନ୍ତରାଷ୍ଟ୍ରୀୟ ପ୍ରଙ୍ଗସରେ ବ୍ୟାପକ ଚର୍ଚ୍ଚା କରିଛନ୍ତି ।

ରାଜନାଥ ସିଂହଙ୍କ ଆମେରିକା ଗସ୍ତରେ ସିକ୍ୟୁରିଟି ଅଫ୍ ସପ୍ଲାଇ ଆରେଞ୍ଜମେଣ୍ଟ (SOSA) ଉପରେ ହସ୍ତାକ୍ଷର କରାଯାଇଛି । ଏହି ଅବସରରେ ଉଭୟ ଦେଶ ଟେକ୍ନୋଲଜି ଟ୍ରାନ୍ସଫର ଏବଂ ଭାରତ-ପ୍ରଶାନ୍ତ କ୍ଷେତ୍ରରେ ସୈନ୍ୟ ସହଯୋଗ ବଢାଇବା ପରି ଅନେକ ଦିଗରେ ଆଲୋଚନା କରିଥିଲେ । ଅଧିକାରୀଙ୍କ ଅନୁସାରେ, ଏସ୍‌ଓଏସ୍‌ଏ ବୁଝାମଣା ଉପରେ ଆମେରିକାର ପ୍ରିନ୍ସିପାଲ ଡେପୁଟୀ ଆସିଷ୍ଟାଣ୍ଟ ସେକ୍ରେଟାରୀ ଅଫ୍ ଡିଫେନ୍ସ ବିକେ ରାମଦାସ ଏବଂ ଭାରତ ପାଇଁ ବରିଷ୍ଠ ସଚିବ ଏବଂ ମହାନିର୍ଦ୍ଦେଶକ (ଅଧିଗ୍ରହଣ) ସମୀର କୁମାର ହସ୍ତକ୍ଷାର କରିଥିଲେ ।

ଆମେରିକାର ୧୭ ଦେଶ ଏବଂ BAE, SAAB ଏବଂ ଥେଲ୍ସ ସମେତ ଅନେକ ବୈଶ୍ୱିକ ପ୍ରତିରକ୍ଷା କମ୍ପାନି ସହ ବୁଝାମଣା ରହିଛି । ଭାରତ ଏବଂ ଆମେରିକା ଆଉ ଏକ ବୁଝାମଣା-ରେସିପ୍ରୋକଲ ଡିଫେନ୍ସ ପ୍ରୋକ୍ୟୋରମେଣ୍ଟ ଏଗ୍ରିମେଣ୍ଟ (RDP) ଉପରେ ମଧ୍ୟ କଥାବର୍ତ୍ତା ଜାରି ରଖିଛନ୍ତି । ଏହା ଭାରତୀୟ ନିର୍ମାତା ପାଇଁ ଆମେରିକୀୟ ପ୍ରତିରକ୍ଷା କ୍ଷେତ୍ରର ବଡ଼ ବଡ଼ କମ୍ପାନି ସହ କାମ କରିବାର ସୁଯୋଗ ମିଳିବ । RDPକୁ ଚୂଡ଼ାନ୍ତ ରୂପ ଦିଆଯିବା ପରେ, ଭାରତ ସେହି ୨୬ ଦେଶରେ ସାମିଲ ହେବ ଯେଉଁମାନଙ୍କ ପାଖରେ DFARS ମାନ୍ୟତା ରହିଛି । ଏହି ଦେଶଗୁଡ଼ିକ ହିଁ ଆମେରିକୀୟ ସୈନ୍ୟ ଅର୍ଡର ପାଇଁ ଗୁରୁତ୍ୱପୂର୍ଣ୍ଣ ଉପକରଣ ପାଇବାକୁ ଯୋଗ୍ୟ । ଏହି ବୁଝାମଣା ବିନିର୍ମାଣ କ୍ଷେତ୍ର ପାଇଁ ବଡ଼ ଦ୍ୱାରା ଖୋଲିବ ।