ଅନନ୍ତ ଅମ୍ୱାନୀଙ୍କ ‘ବନତାରା’ ନାଁରେ ବଡ଼ ଉପଲବ୍ଧି, ମିଳିଲା ପ୍ରତିଷ୍ଠିତ ନ୍ୟାସନାଲ ଆୱାର୍ଡ ‘ପ୍ରାଣୀ ମିତ୍ର’

ନୂଆଦିଲ୍ଲୀ: ମୁକେଶ-ନୀତା ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀଙ୍କ ଡ୍ରିମ୍ ପ୍ରୋଜେକ୍ଟ ‘ବନତାରା’ ନାଁରେ ଯୋଡ଼ି ହୋଇଛି ଏକ ବଡ଼ ଉପଲବ୍ଧି । ଅନନ୍ତଙ୍କ ବନତାରା ପ୍ରକଳ୍ପକୁ ଭାରତ ସରକାରଙ୍କ ଦ୍ୱାରା 'ପ୍ରାଣୀ ମିତ୍ର' ଜାତୀୟ ପୁରସ୍କାର ପ୍ରଦାନ କରାଯାଇଛି । ପ୍ରକୃତି ଏବଂ ପ୍ରାଣୀମାନଙ୍କ କଲ୍ୟାଣ ପାଇଁ ଆରମ୍ଭ ହୋଇଥିବା ଏକ ମହତ୍ୱାକାଂକ୍ଷୀ ପ୍ରକଳ୍ପ ବନତାରାର ଅସାଧାରଣ କାର୍ଯ୍ୟକୁ ଏହି ପୁରସ୍କାର ସମ୍ମାନିତ କରୁଛି ।

ବନତାରା ପ୍ରକଳ୍ପ କ'ଣ?

ବନ୍ୟଜନ୍ତୁଙ୍କ ଯତ୍ନ, ପୁନର୍ବାସ ଏବଂ ଚିକିତ୍ସା ପାଇଁ ଅନନ୍ତ ଅମ୍ବାନୀ ଗୁଜରାଟର ଜାମନଗର ରିଫାଇନାରୀ ନିକଟରେ ପ୍ରାୟ ୩୦୦୦ ଏକର ସବୁଜ ବେଲ୍ଟରେ ବନତାରା ପ୍ରକଳ୍ପ ଆରମ୍ଭ କରିଥିଲେ । ଏଠାରେ ପ୍ରାଣୀମାନଙ୍କୁ ସେମାନଙ୍କର ପ୍ରାକୃତିକ ବାସସ୍ଥାନ ପରି ପରିବେଶ ଦିଆଯାଏ । ବନତାରା ପ୍ରକଳ୍ପ ଅଧୀନରେ, ବନ୍ୟଜନ୍ତୁଙ୍କ ପାଇଁ ଏକ ବିଶ୍ୱସ୍ତରୀୟ ସ୍ୱାସ୍ଥ୍ୟସେବା, ହସ୍ପିଟାଲ, ଗବେଷଣା ଏବଂ ଶୈକ୍ଷିକ କେନ୍ଦ୍ର ଖୋଲାଯାଇଛି । ଏହା ଅଧିନରେ ଗଣ୍ଡା, କଲରାପଚରିଆ ବାଘ ଏବଂ କୁମ୍ଭୀର ସହ ଅନ୍ୟ ପ୍ରାଣୀଙ୍କୁ ମଧ୍ୟ ସେମାନଙ୍କ ପ୍ରାକୃତିକ ପରିବେଶରେ ରହିବା ପାଇଁ ସୁବିଧା ଦିଆଯାଉଛି ।

ବର୍ତ୍ତମାନ ବନତାରାରେ ୨୦୦ ହାତୀ, ୩୦୦ କଲରାପତରିଆ ବାଘ, ୩୦୦ ହରିଣ ଏବଂ ୧୨୦୦ରୁ ଅଧିକ କୁମ୍ଭୀର, ସାପ ଏବଂ କଇଁଛଙ୍କ ଯତ୍ନ ନିଆଯାଉଛି । ଅନନ୍ତ ଅମ୍ବାନୀ କୁହନ୍ତି ଯେ ପିଲାଦିନରୁ ପଶୁପକ୍ଷୀମାନଙ୍କ ପ୍ରତି ତାଙ୍କ ଆଗ୍ରହ ଥିଲା, ଯାହା ଏବେ ଏକ ମିଶନ ପାଲଟିଛି ।

ଉଲ୍ଲେଖଯୋଗ୍ୟ ଯେ ୨୦୩୫ ସୁଦ୍ଧା ରିଲାଏନ୍ସର ଜାମନଗର ରିଫାଇନାରୀ ଆଖପାଖ ଅଞ୍ଚଳକୁ ନେଟ୍ ଜିରୋ କାର୍ବନ କରିବା ଲକ୍ଷ୍ୟରେ କାମ କରାଯାଉଛି । ଏଠାରେ ବନତାରାର ୩ ହଜାର ଏକର ଜମିରେ ଏକ ହାତୀ କେନ୍ଦ୍ର ନିର୍ମାଣ କରାଯିବ, ଯେଉଁଥିରେ ଏକ ହାଇଡ୍ରୋଥେରାପି ପୁଲ୍ ରହିବ । ଏଠାରେ ୫୦୦ ଜଣଙ୍କ ପ୍ରଶିକ୍ଷିତ କର୍ମଚାରୀ ହାତୀମାନଙ୍କର ଭଲ ଯତ୍ନ ନେବେ । ଏହା ବ୍ୟତୀତ ହାତୀମାନଙ୍କ ପାଇଁ ଏକ ପୃଥକ ହସ୍ପିଟାଲ ମଧ୍ୟ ନିର୍ମାଣ କରାଯିବ ।

କର୍ପୋରେଟ୍ ବର୍ଗରେ 'ପ୍ରାଣୀ ମିତ୍ର' ପୁରସ୍କାର କର୍ପୋରେସନ, ପିଏସୟୁ, ସରକାରୀ କମ୍ପାନି ଏବଂ ସମବାୟ ସମିତିକୁ ଗତ ୫ ବର୍ଷରେ ପଶୁ କଲ୍ୟାଣ ପାଇଁ ସେମାନଙ୍କ ନିରନ୍ତର ଯୋଗଦାନ ପାଇଁ ଦିଆଯାଉଛି । ଏଥିରେ ପଶୁ କଲ୍ୟାଣ ପାଇଁ ଡେଡିକେଟେଡ୍ ସିଏସଆର ଫଣ୍ଡିଂ ବି ସାମିଲ ରହିଛି ।