ଅପରେସନ ସିନ୍ଦୂର ପାକ୍ ପ୍ରାୟୋଜିତ ଆତଙ୍କବାଦର ଉପଯୁକ୍ତ ଜବାବ : ରାଜନାଥ ସିଂହ

ନୂର୍ଆଦିଲ୍ଲୀ : ରବିବାର ଦିନ ବ୍ରହ୍ମୋସ କ୍ଷେପଣାସ୍ତ୍ର ପ୍ଲାଣ୍ଟର ଉଦଘାଟନ ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ ଭାରତୀୟ ସେନା ଅପରେସନ ସିନ୍ଦୂର ମାଧ୍ୟମରେ ଆତଙ୍କବାଦୀ ଆକ୍ରମଣରେ ଭାଙ୍ଗି ପଡ଼ିଥିବା ପରିବାରକୁ ନ୍ୟାୟ ପ୍ରଦାନ କରିଛି। ସେ କହିଛନ୍ତି ଯେ ‘ଭାରତ ବିରୋଧୀ ଏବଂ ଆତଙ୍କବାଦୀ ସଂଗଠନ ଯେଉଁମାନେ ଭାରତ ଉପରେ ଆକ୍ରମଣ କରିଥିଲେ ସେମାନଙ୍କୁ ଭାରତୀୟ ସେନା ଅପରେସନ ସିନ୍ଦୂର ମାଧ୍ୟମରେ ନ୍ୟାୟ ଦେଇଛି। ଏଥିପାଇଁ ସମଗ୍ର ଦେଶ ଭାରତୀୟ ସେନାକୁ ସଲାମ କରୁଛି’। ସିଂହ ଜୋର ଦେଇ କହିଥିଲେ ଯେ ଅପରେସନ ସିନ୍ଦୂର କେବଳ ଏକ ସାମରିକ କାର୍ଯ୍ୟାନୁଷ୍ଠାନ ନୁହେଁ, ବରଂ ଭାରତର ରାଜନୈତିକ, ସାମାଜିକ ଏବଂ ରଣନୈତିକ ସଂକଳ୍ପର ପ୍ରତିଫଳନ। ‘ଏହି ଅପରେସନ ଆତଙ୍କବାଦ ବିରୁଦ୍ଧରେ ଭାରତର ଦୃଢ଼ ଇଚ୍ଛାଶକ୍ତି ଏବଂ ଆମର ସାମରିକ ଶକ୍ତିର କ୍ଷମତା ଏବଂ ନିଷ୍ଠାକୁ ପ୍ରଦର୍ଶନ କରେ। ଆମେ ଦେଖାଇଛୁ ଯେ ଯେତେବେଳେ ଭାରତ ଆତଙ୍କବାଦ ବିରୁଦ୍ଧରେ କାର୍ଯ୍ୟ କରେ, ସୀମା ଆରପାରିର ଭୂମି ମଧ୍ୟ ଆତଙ୍କବାଦୀ ଏବଂ ସେମାନଙ୍କ ମାଲିକମାନଙ୍କ ପାଇଁ ସୁରକ୍ଷିତ ରହିବ ନାହିଁ’। ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ପାକିସ୍ତାନରେ ଆତଙ୍କବାଦ ଭିତ୍ତିଭୂମିକୁ ଭାଙ୍ଗିବା ପାଇଁ ଏହି ଅଭିଯାନ ଆରମ୍ଭ କରାଯାଇଥିଲା। “ଆମେ କେବେବି ସେମାନଙ୍କର ସାଧାରଣ ଲୋକଙ୍କୁ ଟାର୍ଗେଟ କରିନାହୁଁ। କିନ୍ତୁ ପାକିସ୍ତାନ କେବଳ ଭାରତୀୟ ସାଧାରଣ ଅଞ୍ଚଳକୁ ଟାର୍ଗେଟ କରିନାହିଁ, ମନ୍ଦିର, ଗୁରୁଦ୍ୱାର ଏବଂ ଚର୍ଚ୍ଚ ଉପରେ ମଧ୍ୟ ଆକ୍ରମଣ କରିବାକୁ ଚେଷ୍ଟା କରିଛି।” ସେ ଭାରତୀୟ ସେନାର ସଂଯମତା ଏବଂ ସାହସକୁ ପ୍ରଶଂସା କରିଥିଲେ। “ଆମ ସେନା ପାକିସ୍ତାନରେ ଅନେକ ସାମରିକ ଲକ୍ଷ୍ୟସ୍ଥଳ ଉପରେ ଆକ୍ରମଣ କରି ଏକ ଦୃଢ଼ ଜବାବ ଦେଇଥିଲା। ଆମର ଅଭିଯାନର ପ୍ରଭାବ କେବଳ ସୀମା ନିକଟରେ ନୁହେଁ ବରଂ ରାୱଲପିଣ୍ଡିରେ ମଧ୍ୟ ଅନୁଭୂତ ହୋଇଥିଲା, ଯେଉଁଠାରେ ପାକିସ୍ତାନୀ ସେନାର ମୁଖ୍ୟାଳୟ ଅବସ୍ଥିତ। ପୂର୍ବ ଅପରେସନଗୁଡ଼ିକୁ ଉଲ୍ଲେଖ କରି ସିଂହ କହିଛନ୍ତି ଯେ ଉରି ଏବଂ ପୁଲୱାମା ଆକ୍ରମଣ ପରେ ବିଶ୍ୱ ଭାରତର ପ୍ରତିକ୍ରିୟା ଦେଖିଛି। ‘ଉରି ପରେ, ଆମେ ସର୍ଜିକାଲ ଷ୍ଟ୍ରାଇକ୍ କରିଥିଲୁ। ପୁଲୱାମା ପରେ, ଆମେ ବାଲାକୋଟରେ ବିମାନ ଆକ୍ରମଣ କରିଥିଲୁ। ଏବଂ ଏବେ, ପହଲଗାମ ପରେ, ବିଶ୍ୱ ଭାରତ ପାକିସ୍ତାନ ଭିତରେ ଅନେକ ଆକ୍ରମଣ କରୁଥିବାର ଦେଖୁଛି’।