ଅରୁଣା ଶାନବାଗଙ୍କ ସହ କ'ଣ ଘଟିଥିଲା ? କୋଲକାତା ମାମଲାର ଶୁଣାଣି ବେଳେ ମନେ ପକାଇଥିଲେ ସୁପ୍ରିମକୋର୍ଟ

ନୂଆଦିଲ୍ଲୀ: କୋଲକାତାରେ ଟ୍ରେନି ଡାକ୍ତରଙ୍କ ସହ ଦୁଷ୍କର୍ମ ଏବଂ ହତ୍ୟା ମାମଲାକୁ ସାରା ଦେଶରେ ଆକ୍ରୋଶ ରହିଛି । ସାରା ଦେଶରେ ପୁଣି ଥରେ ମହିଳାଙ୍କ ସୁରକ୍ଷାକୁ ନେଇ ବିତର୍କ ସୃଷ୍ଟି କରିଛି । ଏହାରି ଭିତରେ ମଙ୍ଗଳବାର ମାମଲାର ଶୁଣାଣି କରି ସୁପ୍ରିମକୋର୍ଟ ୮୦ ଦଶକର ଏପରି ଏକ ଘଟଣାକୁ ମନେ ପକାଇଥିଲେ, ଯେଉଁଥିର ଜଣେ ମହିଳାଙ୍କୁ ୪୨ ବର୍ଷ ଧରି ଶବ ପରି ବଞ୍ଚିବାକୁ ବାଧ୍ୟ କରିଥିଲା ।

ସୁପ୍ରିମକୋର୍ଟ କହିଥିଲେ ଯେ, କୋଲକାତାର ଆରଜି କର ମେଡିକାଲ କଲେଜ ଏବଂ ହସ୍ପିଟାଲରେ ଘଟିଥିବା ଏହି ବର୍ବରତା ୨୭ ନଭେମ୍ବର ୧୯୭୩ରେ ମୁମ୍ବାଇର କିଙ୍ଗ ଏଡୱାର୍ଡ ମେମୋରିଆଲ ହସ୍ପିଟାଲର ଘଟଣାକୁ ମନେ ପକାଇ ଦେଇଛି । ଏହି ଦୁଇଟି ଘଟଣାର ଗୋଟିଏ ପାର୍ଥକ୍ୟ ହେଉଛି କୋଲକାତା ପୀଡିତାଙ୍କ ମୃତ୍ୟୁ ହୋଇଛି ଏବଂ ମୁମ୍ବାଇରେ ଦୁଷ୍କର୍ମର ଶିକାର ଅରୁଣା ଶାନବାଗ ଦୀର୍ଘ ୪୨ ବର୍ଷ ଧରି ଶବ ପରି ବଞ୍ଚି ରହିବାକୁ ବାଧ୍ୟ ହୋଇଥିଲେ ।

ଅରୁଣା ଶାନବାଗ ମୁମ୍ବାଇର କିଙ୍ଗ ଏଡୱାର୍ଡ ମେମୋରିଆଲ ହସ୍ପିଟାଲରେ ଜଣେ ନର୍ସ ଭାବରେ କାର୍ଯ୍ୟ କରୁଥିଲେ । ସେହି ଡାକ୍ତରଖାନାର କାର୍ଯ୍ୟ କରୁଥିବା ସୋହନଲାଲ ବାଲ୍ମିକି ନାମକ ଜଣେ ୱାର୍ଡବୟ ଅତି ନିର୍ମମ ଭାବରେ ଅରୁଣା ଶାନବାଗଙ୍କୁ ଦୁଷ୍କର୍ମ କରିଥିଲା । ମାମଲାରେ ଅଭିଯୁକ୍ତ କ୍ରୁରତାର ସବୁ ସୀମା ଟପି ଯାଇଥିଲା । ଆଉ ଏଥିପାଇଁ ଅରୁଣା ଶାନବାଗ ଦୀର୍ଘ ୪୨ ବର୍ଷ ଧରି ଶବ ଭଳି ବଞ୍ଚିବାକୁ ବାଧ୍ୟ ହୋଇଥିଲେ । 

ଅଭିଯୁକ୍ତ ସୋହନଲାଲ, ଅରୁଣା ଶାନବାଗଙ୍କୁ କୁକୁର ଚେନରେ ବାନ୍ଧି ହତ୍ୟା କରିବାକୁ ଚେଷ୍ଟା କରିଥିଲା । ଯେଉଁଥିପାଇଁ ଅରୁଣା ଶାନବାଗ ୪୨ ବର୍ଷ ଧରି କୋମାରେ ଥିଲେ । ଅରୁଣା ଶାନବାଗଙ୍କ ଅବସ୍ଥା ଦେଖି ଅନେକ ଲୋକ ଇଚ୍ଛାମୃତ୍ୟୁ ପାଇଁ କୋର୍ଟରେ ଆବେଦନ କରିଥିଲେ କିନ୍ତୁ କୋର୍ଟ ଏଥିରେ ରାଜି ହୋଇନଥିଲେ । ଇଚ୍ଛାମୃତ୍ୟୁ ପାଇଁ ସିଧାସଳଖ ମନା କରିଦେଇଥିଲେ କୋର୍ଟ । ୨୦୧୧ରେ ସୁପ୍ରିମକୋର୍ଟ ମଧ୍ୟ ଇଚ୍ଛାମୃତ୍ୟୁ ମାମଲାକୁ ଖାରଜ କରିଦେଇଥିଲେ । ଶେଷରେ ଶାରୀରିକ ଏବଂ ମାନସିକ ଯନ୍ତ୍ରଣା ସହ୍ୟ କରିବାର ସବୁ ସୀମା ଟପିବା ପରେ ୨୦୧୫ରେ ଅରୁଣାଙ୍କର ମୃତ୍ୟୁ ହୋଇଥିଲା ।