ଆମେରିକା ଏବଂ ଫ୍ରାନ୍ସ ଚାପରେ ନଇଁଲା ଇସ୍ରାଏଲ୍, ଗୋଟିଏ ମାର୍ଚ୍ଚୋରେ ଯୁଦ୍ଧବିରତି ଆଶା ବଢିଲା

ନୂଆଦିଲ୍ଲୀ: ଇସ୍ରାଏଲ ଏବଂ ହେଜବୁଲ୍ଲା ମଧ୍ୟରେ ୧୪ ମାସ ଧରି ଚାଲିଥିବା ସଂଘର୍ଷ ଶେଷ ହେବା ଆଶା ବଢିଛି । ରିପୋର୍ଟ ଅନୁସାରେ ଇସ୍ରାଏଲର ସୁରକ୍ଷା କ୍ୟାବିନେଟ୍ ଆମେରିକା ଦ୍ୱାରା ପ୍ରସ୍ତାବିତ ଯୁଦ୍ଧବିରତି ଯୋଜନା ଉପରେ ଚର୍ଚ୍ଚା କରିଛି, ଯେଉଁଥିରେ ଇରାନ ସମର୍ଥିତ ହେଜବୁଲ୍ଲା ସହ ସଂଘର୍ଷ ଶେଷ କରିବା ରୂପରେଖ ପ୍ରସ୍ତୁତ କରାଯାଇଛି । ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏହି ପ୍ରସ୍ତାବକୁ ମଞ୍ଜୁରି ଦେବାର ସମ୍ଭାବନା ଅଧିକ ରହିଛି । କୁହାଯାଉଛି ଯେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଏବଂ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନଙ୍କ ନେତୃତ୍ୱରେ ଯୁଦ୍ଧବିରତି ପାଇଁ କୂଟନୀତିକ ପ୍ରୟାସ କରାଯାଇଛି ।

ରିପୋର୍ଟ ଅନୁସାରେ, ପ୍ରସ୍ତାବରେ ଇସ୍ରାଏଲୀ ସୈନିକ ଦକ୍ଷିଣ ଲେବାନନରୁ ପଛକୁ ହଟିବେ ଏବଂ ସେଠାରେ ଲେବାନନ ସେନାକୁ ନିୟୋଜିତ କରାଯିବ । ଏହାସହ ହେଜବୁଲ୍ଲାକୁ ଲିତାନୀ ନଦୀ ଦକ୍ଷିଣରେ ନିଜ ସଶସ୍ତ୍ର ଉପସ୍ଥିତିକୁ ଶେଷ କରିବାକୁ ପଡ଼ିବ । ଏହା ଉପରେ ଇସ୍ରାଏଲ କଡ଼ା ସର୍ତ୍ତ ରଖି କହିଛି, ଯୁଦ୍ଧବିରତି ଲାଗୁ ହେବା ପରେ ଯେକୌଣସି ଉଲ୍ଲଂଘନ ଉପରେ ଜିରୋ ଟଲରାନ୍ସ ନୀତି ଆପଣାଇବ । ଅନ୍ୟପଟେ ଲେବାନନର ଉପସଂସଦ ଅଧ୍ୟକ୍ଷ ଏସିୟାସ ବୁ ସାବନ କହିଛନ୍ତି ଯେ ନେତାନ୍ୟାହୁ ନୀତି ନବଦଳାଇବା ଯାଏ ଯୋଜନାର କାର୍ଯ୍ୟକାରୀତାରେ କୌଣସି ବାଧା ଆସିବ ନାହିଁ । 

ଅନ୍ୟପଟେ, ଏହି କୂଟନୈତିକ ପ୍ରଗତି ଭିତରେ ବି ଉଭୟ ପକ୍ଷ ସୈନ୍ୟ ଗତିବିଧି ଜାରି ରଖିଛନ୍ତି । ଇସ୍ରାଏଲର ଏୟାର ଷ୍ଟ୍ରାଇକରେ ବେରୁଟର ହେଜବୁଲ୍ଲା-ନିୟନ୍ତ୍ରିତ ଅଞ୍ଚଳକୁ ଟାର୍ଗେଟ୍ କରାଯାଇଛି । ଅନ୍ୟପଟେ ହେଜବୁଲ୍ଲା ମଧ୍ୟ ଇସ୍ରାଏଲ୍ ଉପରେ ରକେଟ୍ ମାଡ଼ କରିଛି । ଏହି ଯୁଦ୍ଧରେ ବର୍ତ୍ତମାନ ସୁଦ୍ଧା ୩୭୫୦ରୁ ଅଧିକ ଲୋକଙ୍କ ମୃତ୍ୟ ହୋଇଛି । ଅନ୍ୟପଟେ ୧୦ ଲକ୍ଷରୁ ଅଧିକ ଲୋକ ବାସହରା ହୋଇଛନ୍ତି । ସେହିପରି ଇସ୍ରାଏଲରେ ୪୫ ସାଧାରଣ ନାଗରିକ ଏବଂ ୭୩ ସୈନିକଙ୍କ ମୃତ୍ୟୁ ହୋଇଛି ।