ଉତ୍ତର କୋରିଆକୁ ଏମିତି ପ୍ରସ୍ତାବ ଦେଲେ ଜେଲନସ୍କି ଚମକି ପଡ଼ିଲା ବିଶ୍ୱ!

କ୍ୱିଭ,୧୩।୧: ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନ୍ସକି ରୁଷିଆକୁ ସାହାଯ୍ୟ କରୁଥିବା ଉତ୍ତର କୋରିଆକୁ ଏକ ପ୍ରସ୍ତାବ ଦେଇଛନ୍ତି। ଯଦି ଉତ୍ତର କୋରିଆ ରୁଷିଆରେ ବନ୍ଦୀ ଥିବା ୟୁକ୍ରେନୀୟ ସୈନିକଙ୍କୁ ମୁକ୍ତ କରେ, ତେବେ ସେ କୁର୍ସ୍କ ଅଞ୍ଚଳରେ ବନ୍ଦୀ ଥିବା ଉତ୍ତର କୋରିଆର ସୈନିକମାନଙ୍କୁ ମୁକ୍ତ କରିବାକୁ ପ୍ରସ୍ତୁତ ବୋଲି ଜେଲେନସ୍କି କହିଛନ୍ତି। ଶନିବାର ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସକି କହିଥିଲେ ଯେ ୟୁକ୍ରେନୀୟ ସେନା ରୁଷିଆର କୁର୍ସ୍କ ସୀମାନ୍ତ ଅଞ୍ଚଳରେ ରୁଷିଆ ସୈନ୍ୟଙ୍କ ସହିତ ଲଢ଼ୁଥିବା ଦୁଇ ଜଣ ଉତ୍ତର କୋରିଆ ସୈନିକଙ୍କୁ ବନ୍ଦୀ କରିଛି। ଉଭୟ ସୈନିକ ସେମାନଙ୍କ ଜାତୀୟତାର କୌଣସି ପ୍ରମାଣ ଦେଇ ନଥିଲେ।
ଏକ୍ସରେ, ଜେଲେନ୍ସକି ଲେଖିଛନ୍ତି ଯେ ୟୁକ୍ରେନ ଉତ୍ତର କୋରିଆର ସର୍ବୋଚ୍ଚ ନେତା କିମ ଜୋଙ୍ଗ ଉନଙ୍କୁ ତାଙ୍କ ସୈନିକମାନଙ୍କୁ ହସ୍ତାନ୍ତର କରିବାକୁ ପ୍ରସ୍ତୁତ, ଯଦି ସେ ରୁଷିଆରେ ବନ୍ଦୀ ଥିବା ଆମର ସୈନିକମାନଙ୍କୁ ମୁକ୍ତ କରନ୍ତି। ଏହା ସୈନ୍ୟ ବିନିମୟ ମାଧ୍ୟମରେ ସମ୍ଭବ। ଏହା ମଧ୍ୟ ସମ୍ଭାବନା ଅଛି ଯେ ୟୁକ୍ରେନୀୟ ସେନା ଅନ୍ୟ ଉତ୍ତର କୋରିଆର ସୈନିକଙ୍କୁ ମଧ୍ୟ ବନ୍ଦୀ କରିଥାଇପାରେ। ଆମର ସୈନ୍ୟମାନେ ଅନ୍ୟମାନଙ୍କୁ ଧରିବାରେ ସଫଳ ହେବା କେବଳ ସମୟର କଥା।
ଜେଲେନ୍ସକି ଲେଖିଛନ୍ତି ଯେ ବିଶ୍ୱରେ କୌଣସି ସନ୍ଦେହ ରହିବା ଉଚିତ୍‌ ନୁହେଁ ଯେ ରୁଷ ସେନା ଉତ୍ତର କୋରିଆର ସାମରିକ ସହାୟତା ଉପରେ ନିର୍ଭରଶୀଳ। ପୁଟିନ ତିନି ବର୍ଷ ପୂର୍ବେ ନାଟୋକୁ ଚରମବାଣୀ ଦେଇ ଇତିହାସ ପୁନଃଲିଖନ କରିବାକୁ ଚେଷ୍ଟା କରିଥିଲେ, କିନ୍ତୁ ଏବେ ସେ ଉତ୍ତର କୋରିଆର ସାମରିକ ସମର୍ଥନ ବିନା ଚାଲିପାରିବେ ନାହିଁ।
ସେ ଲେଖିଛନ୍ତି ଯେ ଉତ୍ତର କୋରିଆର ଯେଉଁ ସୈନିକମାନେ ଫେରିବାକୁ ଚାହୁଁନାହାଁନ୍ତି ସେମାନଙ୍କ ପାଇଁ ଅନ୍ୟ ବିକଳ୍ପ ଉପଲବ୍ଧ ହୋଇପାରେ। ବିଶେଷକରି ଯେଉଁମାନେ କୋରିଆରେ ଏହି ଯୁଦ୍ଧ ବିଷୟରେ ସତ୍ୟ ପ୍ରଚାର କରି ଶାନ୍ତିକୁ ନିକଟତର କରିବାକୁ ଇଚ୍ଛା ପ୍ରକାଶ କରନ୍ତି, ସେମାନଙ୍କୁ ସେହି ସୁଯୋଗ ଦିଆଯିବ।

The post ଉତ୍ତର କୋରିଆକୁ ଏମିତି ପ୍ରସ୍ତାବ ଦେଲେ ଜେଲନସ୍କି ଚମକି ପଡ଼ିଲା ବିଶ୍ୱ! appeared first on Dharitri Odia News.