'ଏକ ମିଶନ...ଏକ ଭାରତ', ୩୩ ଦେଶ ବୁଲିବେ ୫୧ ସାଂସଦ: ବିଶ୍ୱକୁ କହିବେ ପାକିସ୍ତାନର କାରନାମା

ନୂଆଦିଲ୍ଲୀ: ବିଶ୍ୱ ସମ୍ମୁଖରେ ଉପସ୍ଥାପନ ହେବ ଅପରେସନ ସିନ୍ଦୂର ଏବଂ ପାକିସ୍ତାନ ପ୍ରାୟୋଜିତ ଆତଙ୍କବାଦ ଉପରେ ଭାରତର ମତ। ଏଥିପାଇଁ ୭ଟି ପ୍ରତିନିଧିମଣ୍ଡଳ ଗଠନ କରିଛନ୍ତି କେନ୍ଦ୍ର ସରକାର। ଏଥିରେ ବିଭିନ୍ନ ଦଳର ୫୧ ଜଣ ସାଂସଦ ଏବଂ ପୂର୍ବତନ ମନ୍ତ୍ରୀ ଅଛନ୍ତି। ଏହା ବ୍ୟତୀତ, ଭାରତୀୟ ବୈଦେଶିକ ମନ୍ତ୍ରଣାଳୟର ୮ ଜଣ ଅଧିକାରୀ ମଧ୍ୟ ଏହି ପ୍ରତିନିଧିମଣ୍ଡଳରେ ଅଛନ୍ତି। ବୈଜୟନ୍ତ ପଣ୍ଡା, ରବି ଶଙ୍କର ପ୍ରସାଦ (ବିଜେପି), ସଞ୍ଜୟ କୁମାର ଝା (ଜେଡିୟୁ), ଶ୍ରୀକାନ୍ତ ସିନ୍ଦେ (ଶିବସେନା), ଶଶି ଥରୁର (କଂଗ୍ରେସ), କାନିମୋଝି କରୁଣାନିଧି (ଡିଏମକେ) ଏବଂ ସୁପ୍ରିୟା ସୁଲେ (ଏନସିପି-ଏସପି)ଙ୍କ ନେତୃତ୍ୱରେ ଏହି ସାତଟି ପ୍ରତିନିଧିମଣ୍ଡଳ ମୋଟ ୩୩ଟି ଦେଶ ଗସ୍ତ କରିବେ। ଶେଷରେ ସମସ୍ତ ୫୯ ସଦସ୍ୟ ବେଲଜିୟମର ବ୍ରସେଲ୍ସରେ ଥିବା ୟୁରୋପୀୟ ସଂଘ ମୁଖ୍ୟାଳୟ ପରିଦର୍ଶନ କରିବେ। 

ଏହି ସାତଟି ପ୍ରତିନିଧିମଣ୍ଡଳର ସଦସ୍ୟଙ୍କ ମଧ୍ୟରେ ଏନଡିଏର ୩୧ ଜଣ ସାଂସଦ ଏବଂ ପୂର୍ବତନ ମନ୍ତ୍ରୀ ଏବଂ ବିରୋଧୀ ଦଳର ୨୦ ଜଣ ସାଂସଦ ଅଛନ୍ତି। ପ୍ରତ୍ୟେକ ପ୍ରତିନିଧିମଣ୍ଡଳରେ ସାତ କିମ୍ବା ଆଠ ଜଣ ସଦସ୍ୟ ଅଛନ୍ତି ଏବଂ ସେମାନଙ୍କୁ ସହାୟତା କରିବା ପାଇଁ ପ୍ରତ୍ୟେକ ପ୍ରତିନିଧିମଣ୍ଡଳରେ ଅତି କମରେ ଜଣେ ବୈଦେଶିକ ଅଧିକାରୀଙ୍କୁ ନିୟୋଜିତ କରାଯାଇଛି। ସମସ୍ତ ପ୍ରତିନିଧିମଣ୍ଡଳରେ ଅତି କମରେ ଜଣେ ମୁସଲିମ ପ୍ରତିନିଧି ଅଛନ୍ତି, ସେ ରାଜନେତା ହୁଅନ୍ତୁ କିମ୍ବା କୂଟନୀତିଜ୍ଞ। କଂଗ୍ରେସ ଦ୍ୱାରା ସୁପାରିଶ କରାଯାଇଥିବା ଚାରିଟି ନାମ ମଧ୍ୟରୁ କେବଳ ଆନନ୍ଦ ଶର୍ମାଙ୍କୁ ପ୍ରତିନିଧି ତାଲିକାରେ ସାମିଲ କରାଯାଇଥିଲା। ଶଶି ଥରୁରଙ୍କ ବ୍ୟତୀତ କଂଗ୍ରେସ ନେତା ମନୀଷ ତିୱାରୀ, ଅମର ସିଂହ ଏବଂ ସଲମାନ ଖୁର୍ସିଦ ମଧ୍ୟ ପ୍ରତିନିଧି ଦଳରେ ସାମିଲ ଅଛନ୍ତି। 

ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ X ରେ ଏକ ପୋଷ୍ଟରେ କହିଛନ୍ତି, 'ଗୋଟିଏ ମିଶନ। ଗୋଟିଏ ବାର୍ତ୍ତା। ଗୋଟିଏ ଭାରତ। ସାତଟି ସର୍ବଦଳୀୟ ପ୍ରତିନିଧି ଦଳ ଶୀଘ୍ର ଅପରେସନ ସିନ୍ଦୁର ଅଧୀନରେ ପ୍ରମୁଖ ଦେଶମାନଙ୍କୁ ଯିବେ, ଯାହା ଆତଙ୍କବାଦ ବିରୁଦ୍ଧରେ ଆମର ସାମୂହିକ ସଂକଳ୍ପକୁ ପ୍ରତିଫଳିତ କରେ।' ପ୍ରତିନିଧି ଦଳରେ ପୂର୍ବତନ କେନ୍ଦ୍ର ମନ୍ତ୍ରୀ ଗୁଲାମ ନବୀ ଆଜାଦ, ଏମଜେ ଆକବର, ଆନନ୍ଦ ଶର୍ମା, ଭି ମୁରଲୀଧରନ, ସଲମାନ ଖୁର୍ସିଦ ଏବଂ ଏସଏସ ଆହଲୁୱାଲିଆ ଅଛନ୍ତି, ଯେଉଁମାନେ ବର୍ତ୍ତମାନ ସଂସଦର ସଦସ୍ୟ ନୁହଁନ୍ତି।

ଜୟ ବୈଜୟନ୍ତ ପଣ୍ଡାଙ୍କ ନେତୃତ୍ୱରେ ପ୍ରତିନିଧି ସାଉଦି ଆରବ, କୁଏତ, ବାହାରିନ ଏବଂ ଆଲଜେରିଆ ଗସ୍ତ କରିବ। ରବି ଶଙ୍କର ପ୍ରସାଦଙ୍କ ନେତୃତ୍ୱରେ ପ୍ରତିନିଧି ଦଳ ବ୍ରିଟେନ୍‌, ଫ୍ରାନ୍ସ, ଜର୍ମାନୀ, ୟୁରୋପୀୟ ସଂଘ, ଇଟାଲୀ ଏବଂ ଡେନମାର୍କ ଗସ୍ତ କରିବ। ଜେଡି(ୟୁ) ନେତା ଏବଂ ରାଜ୍ୟସଭା ସାଂସଦ ସଞ୍ଜୟ ଝାଙ୍କ ନେତୃତ୍ୱରେ ପ୍ରତିନିଧିମଣ୍ଡଳ ଇଣ୍ଡୋନେସିଆ, ମାଲେସିଆ, ଦକ୍ଷିଣ କୋରିଆ, ଜାପାନ ଏବଂ ସିଙ୍ଗାପୁର ଗସ୍ତ କରିବ। 

ଶିବସେନା ସାଂସଦ ଶ୍ରୀକାନ୍ତ ସିନ୍ଦେଙ୍କ ନେତୃତ୍ୱରେ ପ୍ରତିନିଧିମଣ୍ଡଳ ୟୁଏଇ, ଲାଇବେରିଆ, କଙ୍ଗୋ ଏବଂ ସିଏରା ଲିଓନ ଗସ୍ତ କରିବ। କଂଗ୍ରେସ ସାଂସଦ ଶଶି ଥରୁରଙ୍କ ନେତୃତ୍ୱରେ ପ୍ରତିନିଧୀ ଦଳ ଆମେରିକା, ପାନାମା, ଗୁଇନା, କଲମ୍ବିଆ ଏବଂ ବ୍ରାଜିଲ ଗସ୍ତ କରିବେ। ଡିଏମକେ ସାଂସଦ କାନିମୋଜି କରୁଣାନିଧିଙ୍କ ନେତୃତ୍ୱରେ ଏହି ପ୍ରତିନିଧୀ ଦଳ ରୁଷିଆ ପରିଦର୍ଶନ କରିବେ।