ଏଣିକି ସରକାରୀ ସାର୍ଟିଫିକେଟ୍ ପାଇଁ ‘ଆଧାର’ ବାଧ୍ୟତାମୂଳକ: ବିଜ୍ଞପ୍ତି ଜାରି କଲେ ରାଜ୍ୟ ସରକାର

ଏଣିକି ବିଭିନ୍ନ ପ୍ରକାରର ସରକାରୀ ସାର୍ଟିଫିକେଟ୍ ପାଇଁ ‘ଆଧାର’ ବାଧ୍ୟତାମୂଳକ । ଜାତି, ଆୟ, ଆଇନଗତ ଉତ୍ତରାଧିକାରୀ, ଜମିଜମା ରେକର୍ଡ ଓ ରେଜିଷ୍ଟ୍ରେସନ ନିମନ୍ତେ ଆଧାର ନମ୍ବର ଦେବା ଅବା ଆଧାର ସତ୍ୟପାଠ କରିବା ବାଧ୍ୟତାମୂଳକ ହେବ । କେବଳ ସେତିକି ନୁହେଁ ସରକାରଙ୍କ ବିଭିନ୍ନ ଯୋଜନାରେ ସବସିଡି ଓ ଡିବିଟି ସୁବିଧାର ହିତାଧିକାରୀଙ୍କ ପାଇଁ ମଧ୍ୟ ଆଧାର ନମ୍ବରକୁ ବାଧ୍ୟତାମୂଳକ କରାଯାଇଛି ସରକାରୀ ସେବା ପ୍ରକ୍ରିୟାକୁ ସରଳ, ପାରଦର୍ଶୀ ଓ ବ୍ୟାପକ କରିବା ନିମନ୍ତେ ଏଭଳି ପଦକ୍ଷେପ ନିଆଯାଇଥିବା ଜଣାପଡ଼ିଛି । ଶୁକ୍ରବାର ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଏ ସଂକ୍ରାନ୍ତରେ ବିଧିବଦ୍ଧ ବିଜ୍ଞପ୍ତି ଜାରି ହୋଇଛି ।

କାହିଁକି ଆଧାର?

ରାଜ୍ୟ ସରକାର ବିଭିନ୍ନ ପ୍ରକାରର ସାଟିଁଫିକେଟର ଜାଲିଆତି ରୋକିବା ସହ ସରକାରୀ ସେବାରେ ପାରଦର୍ଶୀ ଆଣିବା ନିମନ୍ତେ ‘ଆଧାର’କୁ ସରକାରୀ ସେବା ନିମନ୍ତେ ଏକ ଦୃଢ଼ ପରିଚୟ ପ୍ରମାଣ ଭାବେ ବ୍ୟବହାର କରିବାକୁ ନିଷ୍ପତ୍ତି ନେଇଛନ୍ତି । ଏହା ହିତାଧିକାରୀଙ୍କ ଯୋଗ୍ୟତା ଯାଂଚ କରିବାରେ ସାହାଯ୍ୟ କରିବ, ସେବା ବିତରଣକୁ ସରଳ କରିବ, ସ୍ୱଚ୍ଛତା ବୃଦ୍ଧି କରିବ ଏବଂ ଏକାଧିକ ପରିଚୟ ଦଲିଲ ଦାଖଲ କରିବାର ସମସ୍ୟାକୁ ମଧ୍ୟ ହ୍ରାସ କରିବ। ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଦ୍ୱାରା ଜାରି କରାଯାଉଥିବା ଜାତି, ଆୟ, ଆଇନଗତ ଉତ୍ତରାଧିକାରୀ, ଜମି ରେକର୍ଡ, ରେଜିଷ୍ଟ୍ରେସନ ଆଦି ସମ୍ବନ୍ଧୀୟ ପ୍ରମାଣପତ୍ର ପ୍ରଦାନରେ ଏହି ‘ଆଧାର’ ବାଧ୍ୟତାମୂଳକ ହେବ ।  ୨୦୧୬ ଆଧାର ଆଇନର ଧାରା ୭ ଅନୁଯାୟୀ, ଏହା ମଧ୍ୟ ସରକାରୀ ସେବା ବିତରଣକୁ ସରଳ କରିବ,ପାରଦର୍ଶିତା ଆଣିବା ସହ ହିତାଧିକାରୀମାନଙ୍କୁ ସିଧାସଳଖ ଲାଭ ପହଂଚାଇବ ।

ନୂଆ ନିର୍ଦ୍ଦେଶ କ’ଣ କହୁଛି?

ଏହି  ବିଜ୍ଞପ୍ତି ଅନୁଯାୟୀ, ପ୍ରମାଣପତ୍ର ପାଇଁ ଆବେଦନ କରୁଥିବା ବ୍ୟକ୍ତିଙ୍କୁ ଆଧାର ନମ୍ବର ଦାଖଲ କରିବାକୁ ହେବ କିମ୍ବା ଆଧାର ପ୍ରାମାଣୀକରଣ ପ୍ରକ୍ରିୟାରେ ଯିବାକୁ ହେବ । ଯେଉଁମାନଙ୍କର ଆଧାର ନମ୍ବର ନାହିଁ କିମ୍ବା ଆଧାର ନିମନ୍ତେ ପଞ୍ଜିକରଣ କରିନାହାନ୍ତି ସେମାନଙ୍କୁ ଯେକୌଣସି ସରକାରୀ ପ୍ରମାଣପତ୍ର ପାଇଁ ଆବେଦନ କରିବା ପୂର୍ବରୁ ଆଧାର ନିମନ୍ତେ ବିଧିବଦ୍ଧ ଆବେଦନ କରିବାକୁ ପଡ଼ିବ । ସେମାନେ ନିକଟସ୍ଥ ଜନସେବା କେନ୍ଦ୍ର କିମ୍ବା ଆଧାର କେନ୍ଦ୍ରକୁ ଯାଇ ନିଜର ଆଧାର ପ୍ରସ୍ତୁତ କରିପାରିବେ ।

ଓକାକ୍ ଓ ଏନଆଇସିରେ ‘ଆଧାର’ ସୁବିଧା

ସମସ୍ତଙ୍କ ପାଇଁ ସୁବିଧା ପାଇଁ ରାଜ୍ୟ ସରକାରଙ୍କ ପକ୍ଷରୁ ଭୁବନେଶ୍ୱରସ୍ଥିତ ଓକାକ୍ ଓ ଏନଆଇସି କେନ୍ଦ୍ରରେ ‘ଆଧାର’ ପଞ୍ଜିକରଣର ସୁବିଧା ଉପଲବ୍ଧ କରାଯାଇଛି । ଯଦି କୌଣସି ବ୍ଲକ ଓ ତହସିଲରେ ‘ଆଧାର’ ପଞ୍ଜିକରଣ କେନ୍ଦ୍ର ନଥିବ ତେବେ ରାଜସ୍ୱ ବିଭାଗ ପକ୍ଷରୁ ୟୁଏଆଇଡିଏଆଇ ରେଜିଷ୍ଟ୍ରାରଙ୍କ ସହ ସମନ୍ୱୟ କରି ସୁବିଧାଜନକ ସ୍ଥାନରେ ଏହି ସୁବିଧା ଯୋଗାଇ ଦିଆଯିବ । ଆଧାର ନମ୍ବର ମିଳିବା ପର୍ଯ୍ୟନ୍ତ ଆବେଦନକାରୀମାନେ ଆଧାର ଆବେଦନର ସ୍ଲିପ ସହ ନିମ୍ନଲିଖିତ ଦଲିଲ ମଧ୍ୟରୁ ଯେକୌଣସି ଗୋଟିଏ ଦାଖଲ କରି ପ୍ରମାଣପତ୍ର ପାଇଁ ଆବେଦନ କରି ପାରିବେ: ବ୍ୟାଙ୍କ କିମ୍ବା ଡାକଘର ପାସବୁକ (ଫଟୋ ସହ) , ପାନ କାର୍ଡ , ପାସପୋର୍ଟ, ରାସନ କାର୍ଡ , ଭୋଟର ପରିଚୟ ପତ୍ର , ମନରେଗା ଜବକାର୍ଡ , କିଷାନ ବିକାଶ ପତ୍ର, ଡ୍ରାଇଭିଂ ଲାଇସେନ୍ସ, କିମ୍ବା  ଗେଜେଟେଡ ଅଫିସର ଅବା ତହସିଲଦାରଙ୍କ ଦ୍ୱାରା ଅଫିସିଆଲ ଲେଟରହେଡରେ ଜାରି ପରିଚୟ ପ୍ରମାଣପତ୍ର ବୋଲି ବିଭାଗ ପକ୍ଷରୁ କୁହାଯାଇଛି । ସେହିପରି ରାଜ୍ୟର ପ୍ରକୃତ ନାଗରିକ ବା ବାସିନ୍ଦା ଯେଭଳି ନିଜର ଅଧିକାର ଓ ସରକାରୀ ଲାଭରୁ ବଂଚିତ ନହେବେ ସେଥିପାଇଁ ସରକାର ଆବଶ୍ୟକ ପଦକ୍ଷେପ ସୁନିଶ୍ଚିତ କରାଇବେ । ଯଦି ଆଧାର ସତ୍ୟପାଠ ବିଫଳ ହୁଏ, ତେବେ ଆଖିର ଛବି, ମୋବାଇଲ୍ ଓଟିପି ମାଧ୍ୟମରେ ବିକଳ୍ପ ବ୍ୟବସ୍ଥା ରହିବ । ଶେଷପର୍ଯ୍ୟନ୍ତ ଆଧାର ଚିଠିର କୁୂ୍ୟଆର କୋଡ୍ ସହିତ ଫିଜିକାଲ ଆଧାର ଦେଖାଇ ସାର୍ଟିଫିକେଟ୍ ମିଳିପାରିବ । ଏହି ନୂଆ ନିୟମ ସମ୍ପର୍କରେ ସାଧାରଣ ଲୋକଙ୍କୁ ସଚେତନ କରାଇବା ପାଇଁ ବିଭାଗ ବ୍ୟାପକ ପ୍ରଚାର କରିବ ବୋଲି ବିଜ୍ଞପ୍ତିରେ ଦର୍ଶାଯାଇଛି ।