ଏପ୍ରିଲ ୮ରେ ପୂର୍ଣ୍ଣ ସୂର୍ଯ୍ୟ ପରାଗ ଉପରେ ନଜର ରଖିବ ଆଦିତ୍ୟ ଏଲ-୧, ଜାଣନ୍ତୁ କିପରି କରିବ କାମ

ନୂଆଦିଲ୍ଲୀ: ଏପ୍ରିଲ୍ ୮ରେ ଦୁନିଆର ଅନେକ ଭାଗରେ ପୂର୍ଣ୍ଣ ସୂର୍ଯ୍ୟ ପରାଗ ଦେଖିବାକୁ ମିଳିବ । ବର୍ଷର ପ୍ରଥମ ସୂର୍ଯ୍ୟ ପରାଗକୁ ନେଇ ସମସ୍ତଙ୍କ ଉତ୍କଣ୍ଠା ରହିଛି । ସୂର୍ଯ୍ୟ, ଚନ୍ଦ୍ର ଏବଂ ପୃଥିବୀ ଏକ ସରଳ ରେଖାରେ ରହିବା ଯୋଗୁଁ ପ୍ରାୟ କିଛି ମିନିଟ୍ ଯାଏ ଅନ୍ଧାର ଖେଳିଯିବ । ଏହି ସମୟରେ ଆଦିତ୍ୟ ଏଲ-୧ ମଧ୍ୟ ସୂର୍ଯ୍ୟ ପରାଗ ଉପରେ ନଜର ରଖିବ, ଯାହା ପୃଥିବୀ ଏବଂ ସୂର୍ଯ୍ୟର ୧୫ ଲକ୍ଷ କିଲୋମିଟର ଦୂରରେ ରହିଛି । ଆଦିତ୍ୟ ଏଲ-୧ ମହାକାଶ ଯାନ ୨୦୨୩ରେ ପୃଥିବୀରୁ ଉତକ୍ଷେପଣ କରାଯିବା ପରେ ଚଳିତ ବର୍ଷ ଆରମ୍ଭରେ ଲେଗ୍ରେଞ୍ଜ ପଏଣ୍ଟ ୧ରେ ନିଜ ହେଲୋ କକ୍ଷରେ ପ୍ରବେଶ କରିଥିଲା । ଆଦିତ୍ୟ ଏଲ-୧ର ୬ ଇନଷ୍ଟ୍ରୁମେଣ୍ଟ ସୂର୍ଯ୍ୟର ନୀରିକ୍ଷଣ କରୁଛି, ତେବେ ଏଥିରୁ ଦୁଇଟି ଇନଷ୍ଟ୍ରୁମେଣ୍ଟ ଭିଜିବଲ ଏମିଶନ ଲାଇନ କୋରୋନାଗ୍ରାଫ (VELC) ଏବଂ ସୋଲାର ଅଲ୍ଟ୍ରାଭଏଲଟେ ଇମେଜିଂ ଟେଲିସ୍କୋପ (SUIT) ପ୍ରାଥମିକ ରୂପେ ସୂର୍ଯ୍ୟ ପରାଗ ଉପରେ ନଜର ରଖିବ ।

ଏଥିରେ କୋରୋନାଗ୍ରାଫ ସୂର୍ଯ୍ୟର ଡିସ୍କକୁ ଅବରୋଧ କରିଥାଏ ଏବଂ ସ୍ପେସକ୍ରାଫ୍ଟ ଉପରେ ଏକ କୃତ୍ରିମ ଗ୍ରହଣ କରି ସୂର୍ଯ୍ୟର ବାହାର ପରସ୍ତର କୋରୋନାର ଅଧ୍ୟୟନ କରେ । ଅନ୍ୟପଟେ, SUIT ନିକଟ ପରାବେଙ୍ଗନୀରେ ସୌର ପ୍ରକାଶମଣ୍ଡଳ ଏବଂ କ୍ରୋମୋସ୍ଫିୟରର ଫଟୋ ଉଠାଇଥାଏ ।

ପଢନ୍ତୁ: ସୂର୍ଯ୍ୟର ମୃତ୍ୟୁ...ସୂର୍ଯ୍ୟ ପରାଗକୁ ନେଇ ମାୟା ସଭ୍ୟତାର ଲୋକଙ୍କ ଭିନ୍ନ ବିଶ୍ୱାସ, ରାଜାକୁ ଦେବାକୁ ପଡ଼ୁଥିଲା ରକ୍ତର ବଳି

ଆଦିତ୍ୟ ଏଲ୍-୧ ବିରଳ ପରାଗ ସମୟରେ ସୂର୍ଯ୍ୟକୁ ନୀରିକ୍ଷଣ କରିବାରେ ଏକମାତ୍ର ସ୍ପେସକ୍ରାଫ୍ଟ ନୁହେଁ, ଏପ୍ରିଲ୍ ୪ରେ ସୂର୍ଯ୍ୟର ସବୁଠୁ ନିକଟରେ ପହଞ୍ଚିଥିବା ୟୁରୋପର ସୋଲାର ଅର୍ବିଟରର ଉପକରଣ ମଧ୍ୟ ପରାଗର ନୀରିକ୍ଷଣ କରିବାରେ ସକ୍ରିୟ ହୋଇଯିବ । ପରାଗ ସମୟରେ ସୂର୍ଯ୍ୟର ବାହାର ପରସ୍ତରେ କୋରୋନା ଦୃଶ୍ୟ ହୋଇଥାଏ, କାରଣ ଚନ୍ଦ୍ର ସୌର ଡିସ୍କକୁ ଅବରୋଧ କରେ ଏବଂ ବାହାର ପରସ୍ତକୁ ଚମକୁଥିବା ଦେଖିବାକୁ ମିଳେ, ଯାହାକୁ କିଛି କ୍ଷଣ ପାଇଁ ପୃଥିବୀରେ ଦେଖା ଯାଇଥାଏ । ଅନ୍ୟ ସମୟରେ ସୂର୍ଯ୍ୟର କୋରୋନା ପୃଥିବୀରୁ ଦୃଶ୍ୟମାନ ହୋଇନଥାଏ ।