ଏହି ଦିନ ଦେଶର ୯ କୋଟି ଚାଷୀଙ୍କ ଆକାଉଣ୍ଟକୁ ଆସିବ ୨୦,୦୦୦ କୋଟି ଟଙ୍କା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶାସନ ସମ୍ଭାଳିବା ପରେ ପ୍ରଥମ ଥର ଜୁନ୍ 18ରେ ନିଜ ସଂସଦୀୟ କ୍ଷେତ୍ର ବାରାଣସୀ ଗସ୍ତ କରିବେ । ଏହି ଅବସରରେ ସେ ସାରା ଦେଶର 9.26 କୋଟି ଲାଭାର୍ଥୀ ଚାଷୀଙ୍କୁ 20,000 କୋଟିରୁ ଅଧିକ ଟଙ୍କାର ପିଏମ୍ କିଷାନ ଯୋଜନାର 17ତମ କିସ୍ତି ଜାରି କରିବେ । ଏହାସହ ପିଏମ୍ ମୋଦୀ ଏସଏଚଜିର 30 ହଜାରରୁ ଅଧିକ ସଦସ୍ୟଙ୍କୁ ବି ପ୍ରମାଣ ପତ୍ର ପ୍ରଦାନ କରିବେ ।

କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂ ଚୌହାନ ସାମ୍ୱାଦିକଙ୍କୁ ପ୍ରତିକ୍ରିୟା ଦେଇ କହିଛନ୍ତି, ଗତ ଦୁଇଟି କାର୍ଯ୍ୟକାଳରେ କୃଷି ସବୁବେଳେ ପ୍ରଧାନମନ୍ତ୍ରୀ ମୋଦୀଙ୍କ ପ୍ରାଥମିକତାରେ ରହିଛି । ସେ ଚାଷୀଙ୍କ ହିତରେ ଅନେକ ନିଷ୍ପତ୍ତି ନେଇଛନ୍ତି । ପ୍ରଧାନମନ୍ତ୍ରୀ ପଦର ଶପଥ ନେବା ପରେ ମୋଦୀ ଜୀ ସର୍ବପ୍ରଥମେ ପିଏମ୍-କିଷାନ ଯୋଜନାର 17ତମ କିସ୍ତି ଜାରି କରିବା ପାଇଲ୍ ଉପରେ ହସ୍ତାକ୍ଷର କରିଛନ୍ତି ।

ଉଲ୍ଲେଖଯୋଗ୍ୟ ଯେ 2019 ମସିହା ଆରମ୍ଭରେ  ପିଏମ୍ କିଷାନ ଯୋଜନା ଆରମ୍ଭ କରାଯାଇଥିଲା । ଏହା ଅଧିନରେ ଲାଭାର୍ଥୀ ଚାଷୀଙ୍କୁ ସେମାନଙ୍କ ଆର୍ଥିକ ଆବଶ୍ୟକତା ପୂରଣ କରିବା ପାଇଁ ବର୍ଷକୁ ତିନି ସମାନ କିସ୍ତିରେ 6 ହଜାର ଟଙ୍କା ପ୍ରଦାନ କରାଯାଉଛି । କେନ୍ଦ୍ର କୃଷି ମନ୍ତ୍ରୀ କହିଛନ୍ତି ଯେ କେନ୍ଦ୍ର ସରକାର ଏହି ଯୋଜନାରେ ସାରା ଦେଶର 11 କୋଟି ଚାଷୀଙ୍କୁ 3.04 ଲକ୍ଷ କୋଟି ଟଙ୍କାରୁ ଅଧିକ ରାଶି ବଣ୍ଟନ କରିଛନ୍ତି ।