କେରଳରେ ପିଲାମାନଙ୍କ ପାଇଁ ‘ବ୍ୟାଗ୍ ଫ୍ରି ଡେ’କୁ ନେଇ ଚର୍ଚ୍ଚା, ଶିକ୍ଷା ମନ୍ତ୍ରୀ ଦେଲେ ସୂଚନା

ଭାରୀ ବ୍ୟାଗ ପ୍ରସଙ୍ଗରେ କେରଳରୁ ଏକ ଖବର ଆସିଛି । ଯଦି କେରଳ ସରକାର ଏହାର ନୂଆ ‘ବ୍ୟାଗ୍ ଫ୍ରି ଡେ’ ପଦକ୍ଷେପ ସହିତ ଆଗକୁ ବଢିବାକୁ ନିଷ୍ପତ୍ତି ନିଅନ୍ତି, ତେବେ ପିଲାମାନଙ୍କୁ ମାସକୁ ଅତି କମରେ ଚାରି ଦିନ ସ୍କୁଲକୁ ଭାରୀ ବ୍ୟାଗ ନେବାକୁ ପଡ଼ିବ ନାହିଁ । ଏନେଇ ଶିକ୍ଷା ମନ୍ତ୍ରୀ କହିଛନ୍ତି ଯେ ସ୍କୁଲ ବ୍ୟାଗଗୁଡ଼ିକର ଓଜନକୁ ନେଇ ବଢୁଥିବା ଅଭିଯୋଗକୁ ଦୃଷ୍ଟିରେ ରଖି ରାଜ୍ୟ ସରକାର ଶିଶୁ ଓ ଅଭିଭାବକଙ୍କ ସମସ୍ୟାର ସମାଧାନ ପାଇଁ ବିଭିନ୍ନ ପଦକ୍ଷେପ ନେଉଛନ୍ତି ।

ତେବେ ଏକ ବିବୃତ୍ତିରେ ସେ କହିଛନ୍ତି ଯେ ରାଜ୍ୟରେ ୧ ରୁ ୧୨ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ଭାରୀ ସ୍କୁଲ ବ୍ୟାଗ ପ୍ରସଙ୍ଗରେ ସରକାର ଖୁବ ଶୀଘ୍ର ନିଷ୍ପତ୍ତି ନେବେ । ଏହା ବ୍ୟତୀତ ଶିକ୍ଷା ମନ୍ତ୍ରୀ କହିଛନ୍ତି ଯେ ପ୍ରଥମ ଶ୍ରେଣୀ ଛାତ୍ରଛାତ୍ରୀଙ୍କ ସ୍କୁଲ ବ୍ୟାଗଗୁଡ଼ିକର ଓଜନ ୧,୬ କିଲୋଗ୍ରାମରୁ ୨.୨ କିଲୋଗ୍ରାମ ଏବଂ ଦଶମ ଶ୍ରେଣୀର ଛାତ୍ରମାନଙ୍କ ସ୍କୁଲ ବ୍ୟାଗଗୁଡ଼ିକର ଓଜନ ୨.୫ କିଲୋଗ୍ରାମରୁ ୪.୫ କିଲୋଗ୍ରାମ ମଧ୍ୟରେ ରଖିବାକୁ ନିର୍ଦ୍ଦେଶ ଦିଆଯାଇପାରେ । ସେ ଏପରି ମଧ୍ୟ କହିଛନ୍ତି ଯେ ଏକ ମାସରେ ଅତି କମରେ ଚାରି ଦିନ ପାଇଁ ରାଜ୍ୟର ବିଦ୍ୟାଳୟରେ ‘ବ୍ୟାଗ୍ ଫ୍ରି ଡେ’ ପଦକ୍ଷେପ ଆରମ୍ଭ କରିବାକୁ ସରକାର ମଧ୍ୟ ବିଚାର କରୁଛନ୍ତି ।

ମା’ ଓ ବାପା ଏବଂ ଯେଉଁମାନେ ସର୍ବଶିକ୍ଷା ବ୍ୟବସ୍ଥାକୁ ପସନ୍ଦ କରନ୍ତି ସେମାନଙ୍କଠାରୁ ଅନେକ ଅଭିଯୋଗ ଏବଂ ପରାମର୍ଶ ଆସୁଛି । ଏନେଇ କେରଳ ଶିକ୍ଷା ମନ୍ତ୍ରୀ କହିଛନ୍ତି ଯେ ରାଜ୍ୟରେ ପିଲାମାନଙ୍କର ଭାର କମାଇବା ଲକ୍ଷ୍ୟରେ ବହି ଦୁଇ ଭାଗରେ ଛପା ହୋଇ ବଣ୍ଟନ କରାଯାଇଛି । ତେବେ ଏହାକୁ ନେଇ ଆଗକୁ ମଧ୍ୟ ଅନେକ ପ୍ରସଙ୍ଗ ସାମ୍ନାକୁ ଆସିବ ।

The post କେରଳରେ ପିଲାମାନଙ୍କ ପାଇଁ ‘ବ୍ୟାଗ୍ ଫ୍ରି ଡେ’କୁ ନେଇ ଚର୍ଚ୍ଚା, ଶିକ୍ଷା ମନ୍ତ୍ରୀ ଦେଲେ ସୂଚନା appeared first on KNews Odisha.