କ୍ୟାରିୟରର ଶେଷ ମୁକାବିଲା ଖେଳିବା ପରେ ସନ୍ନ୍ୟାସ ଘୋଷଣା କରି ଚମକାଇଲେ ଏହି ଭାରତୀୟ କ୍ରିକେଟର

କୋଲ୍‌କାତା, ୧ା୨: ଇଡେନ୍‌ ଗାର୍ଡେନ୍ସ ମଇଦାନରେ ରଣଜୀ ଟ୍ରଫି ମ୍ୟାଚ୍‌ ଖେଳିବା ପରେ କ୍ରିକେଟର ସମସ୍ତ ଫର୍ମାଟ୍‌ରୁ ଅବସର ଘୋଷଣା କରି ଚମକାଇଛନ୍ତି ଆଉ ଜଣେ କ୍ରିକେଟର। ସେ ହେଲେ ଭାରତ ଉଇକେଟ୍‌କିପର ବ୍ୟାଟର ରିଦ୍ଧିମାନ ଶାହା। ୪୦ ବର୍ଷୀୟ ଶାହା ୨୦୧୦ ଫେବୃଆରୀରେ ଭାରତ ପାଇଁ ଡେବ୍ୟୁ କରିଥିଲେ। ସେ ତାଙ୍କ କ୍ୟାରିୟରରେ ମୋଟ ୪୯ ମ୍ୟାଚ୍‌(୪୦ ଟେଷ୍ଟ ଓ ୯ ଅନ୍ତର୍ଜାତୀୟ ଦିନିକିଆ) ଖେଳିଛନ୍ତି। ଏହାଛଡ଼ା ଘରୋଇ କ୍ରିକେଟରେ ସେ ବେଙ୍ଗଲ ଓ ତ୍ରିପୁରା ତରଫରୁ ପ୍ରତିନିଧିତ୍ୱ କରି ୧୪୨ ପ୍ରଥମଶ୍ରେଣୀ ଓ ୧୧୬ ଲିଷ୍ଟ ‘ଏ’ ମ୍ୟାଚ୍‌ ଖେଳିସାରିଛନ୍ତି। ତେବେ ସେ ଆଇକନିକ ଇଡେନ୍‌ଗାର୍ଡେନ୍ସରେ ବେଙ୍ଗଲ ତରଫରୁ ଶନିବାର ରଣ୍‌ଜୀ ଟ୍ରଫି ଫାଇନାଲ ଗ୍ରୁପ୍‌ ଷ୍ଟେଜ୍‌ ମ୍ୟାଚ୍‌ ଖେଳିବା ପରେ ତାଙ୍କ ଅବସର ଘୋଷଣା କରିଛନ୍ତି।

ରିଦ୍ଧିମାନ ନିଜର ଇନଷ୍ଟାଗ୍ରାମରେ ଲେଖିଛନ୍ତି, ’୧୯୯୭ ମସିହାରେ ମୁଁ ପ୍ରଥମ ଥର ପାଇଁ କ୍ରିକେଟ ପଡ଼ିଆରେ ପାଦ ଦେବାର ୨୮ ବର୍ଷ ବିତିଗଲାଣି, ଏବଂ ଏହି ଯାତ୍ରା ଆଶ୍ଚର୍ଯ୍ୟଜନକ ରହିଥିଲା।’ ମୋ ଦେଶ, ରାଜ୍ୟ, ଜିଲା, କ୍ଲବ, ବିଶ୍ୱବିଦ୍ୟାଳୟ, କଲେଜ ଏବଂ ସ୍କୁଲର ପ୍ରତିନିଧିତ୍ୱ କରିବା ମୋ ଜୀବନର ସବୁଠାରୁ ବଡ଼ ସମ୍ମାନ।’ ଆଜି ମୁଁ ଯାହା ବି, ପ୍ରତ୍ୟେକ ସଫଳତା, ପ୍ରତ୍ୟେକ ଶିକ୍ଷା, ମୁଁ ଏହି ସବୁକିଛି ଏହି ଚମତ୍କାର ଖେଳକୁ ଶ୍ରେୟ ଦେଉଛି। କ୍ରିକେଟ ମୋତେ ଅତ୍ୟନ୍ତ ଖୁସିର ମୁହୂର୍ତ୍ତ, ଅବିସ୍ମରଣୀୟ ବିଜୟ ଏବଂ ଅମୂଲ୍ୟ ଅଭିଜ୍ଞତା ଦେଇଛି। ଏହା ମୋତେ ପରୀକ୍ଷା କରିଛି ଏବଂ ଏହାକୁ କିପରି ମୁକାବିଲା କରିବାକୁ ହୁଏ ତାହା ମଧ୍ୟ ଶିଖାଇଛି। ‘ଉତ୍ଥାନ-ପତନ, ବିଜୟ-ପରାଜୟ ସହିତ ଏହି ଯାତ୍ରା ମୋତେ ମୁଁ ଯାହା ତାହା କରିଛି।’ ସବୁକିଛିର ଅନ୍ତ ହେବାକୁ ପଡିବ, ତେଣୁ ମୁଁ ସମସ୍ତ ପ୍ରକାରର କ୍ରିକେଟରୁ ଅବସର ନେବାକୁ ନିଷ୍ପତ୍ତି ନେଇଛି।

ରିଦ୍ଧିମାନ ଭାରତ ପାଇଁ ତାଙ୍କର ଶେଷ ମ୍ୟାଚ୍‌ ୨୦୨୧ ମସିହାରେ ନ୍ୟୁଜିଲ୍ୟାଣ୍ଡ ବିପକ୍ଷରେ ଖେଳିଥିଲେ। ୨୦୧୪ରେ ଏମ୍‌ ଏସ୍‌ ଧୋନିଙ୍କ ଅବସର ପରେ ଏବଂ ରିଷଭ ପନ୍ତଙ୍କ ଆଗମନ ପୂର୍ବରୁ ସେ ଭାରତୀୟ ଦଳର ନିୟମିତ ସଦସ୍ୟ ଥିଲେ। ଅଭିଜ୍ଞ ଖେଳାଳି ତାଙ୍କର ଶେଷ ରଣଜୀ ମ୍ୟାଚ୍‌ରେ ଖାତା ନ ଖୋଲି ଆଉଟ ହୋଇଥିଲେ। କିନ୍ତୁ ତାଙ୍କ ଦଳ ବେଙ୍ଗଲ ପଞ୍ଜାବକୁ ଏକ ଇନିଂସ ଏବଂ ୧୩ ରନ୍‌ରେ ପରାସ୍ତ କରି ଏହି ମ୍ୟାଚ୍‌କୁ ତାଙ୍କ ପାଇଁ ସ୍ମରଣୀୟ କରିଦେଇଥିଲା। ମ୍ୟାଚ ପରେ ତାଙ୍କ ସାଥୀ ଖେଳାଳିମାନେ ତାଙ୍କୁ କାନ୍ଧରେ ଉଠାଇ ନେଇଥିବା ଦେଖାଯାଇଥିଲା।

The post କ୍ୟାରିୟରର ଶେଷ ମୁକାବିଲା ଖେଳିବା ପରେ ସନ୍ନ୍ୟାସ ଘୋଷଣା କରି ଚମକାଇଲେ ଏହି ଭାରତୀୟ କ୍ରିକେଟର appeared first on Dharitri Odia News.