ଖୋଲିଲା ଆଉ ୪ଟି ଗେଟ୍, ମୋଟ୍ ୧୪ଟି ଗେଟ୍ ଦେଇ ଜଳ ନିଷ୍କାସନ ଜାରି

ସମ୍ବଲପୁର ୦୬।୦୮ : ହୀରାକୁଦ ଜଳଭଣ୍ଡାରରେ ବର୍ତ୍ତମାନ ଜଳସ୍ତର ୬୧୦ ଫୁଟ୍‌ରୁ ଅଧିକ ରହିଛି । ଡ୍ୟାମ୍‌ ଭିତରକୁ ପ୍ରତି ସେକେଣ୍ଡରେ ୨ ଲକ୍ଷ ୭୪ ହଜାରରୁ ଜଳ ପ୍ରବେଶ କରୁଥିବା ବେଳେ ୨ ଲକ୍ଷ ୪୬ ହଜାର ୭୬୫ ଜଳ ନିଷ୍କାସିତ ହେଉଛି । ବର୍ତ୍ତମାନ ମୋଟ ୧୪ଟି ଗେଟ୍‌ ଦେଇ ଜଳଭଣ୍ଡାରରୁ ଜଳ ନିଷ୍କାସିତ ହେଉଛି ।ଖୋଲାଯାଇଥିବା ୧୪ଟି ଗେଟ୍‌ ମଧ୍ୟରେ ବାମ ପଟରୁ ୧୦ଟି ରହିଥିବା ବେଳେ ଡାହାଣ ପଟୁ ୪ଟି ଗେଟ୍‌ ରହିଛି ।

ସୂଚନାଯୋଗ୍ୟ ଯେ, ୨୮ ଜୁଲାଇରେ ହୀରାକୁଦ ଜଳଭଣ୍ଡାରରୁ ଚଳିତ ବର୍ଷର ପ୍ରଥମ ବନ୍ୟାଜଳ ଛଡାଯାଇଥିଲା । ପ୍ରଥମେ ୭ ନମ୍ବର ଗେଟ୍‌ ଦେଇ ଜଳ ନିଷ୍କାସନ ହୋଇଥିଲା । ଆଉ ପରେ ପର୍ଯ୍ୟାୟକ୍ରମରେ ଅନ୍ୟ ସବୁ ଗେଟ୍‌ ଖୋଲିଥିଲା । ଉପରମୁଣ୍ଡରେ ପ୍ରବଳ ବର୍ଷା ଲାଗି ମୋଟ ୨୦ଟି ଗେଟ୍‌ ଖୋଲାଯାଇଥିଲା । ଆଉ ଧୀରେ ଧୀରେ ସେହି ସବୁ ଗେଟ୍‌କୁ ଏବେ ବନ୍ଦ କରାଯାଉଛି । ହେଲେ ମଙ୍ଗଳବାର ସକାଳ ସୁଦ୍ଧା ୧୪ଟି ଗେଟ୍‌ ଦେଇ ଜଳ ନିଷ୍କାସନ ହେଉଛି ।