ଗାଦି ଟଳମଳ ଦେଖି ହିନ୍ଦୁ ପାଇଁ ବଡ଼ ଘୋଷଣା କଲେ ମହମ୍ମଦ ୟୁନୁସ

ଢାକା,୨୭।୫: ବାଂଲାଦେଶରେ ବିଦ୍ରୋହର ଆଲୋଚନା ମଧ୍ୟରେ ମହମ୍ମଦ ୟୁନୁସ ସରକାରଙ୍କ ଗାଦି ଏବେ ଟଳମଳ। ଫଳରେ ସେ ଏବେ ନିଜ ଦେଶରେ ରହୁଥିବା ହିନ୍ଦୁମାନଙ୍କ କଥା ମନେ ପକାଇଛନ୍ତି। ୟୁନୁସ ଆମେରିକାକୁ କହିଛନ୍ତି ଯେ, ସେ ହିନ୍ଦୁମାନଙ୍କୁ ସମସ୍ତ ପ୍ରକାରେ ସୁରକ୍ଷା ଦେବେ। ଏଠାରେ ୧୭ କୋଟି ଲୋକ ବାସ କରନ୍ତି। ଆମର ପ୍ରୟାସ ସମସ୍ତଙ୍କୁ ଏକାଠି ରଖିବା।

ୟୁନୁସ ଆମେରିକୀୟ ଅନ୍ତର୍ଜାତୀୟ ଧାର୍ମିକ ସ୍ବାଧୀନତା କମିଶନର ଅଧ୍ୟକ୍ଷ ଷ୍ଟିଫେନ ସ୍କେନେଙ୍କୁ ଭେଟିଥିଲେ। ଏହି ସମୟରେ ୟୁନୁସ କହିଥିଲେ, ମୋର ପ୍ରୟାସ ହେଉଛି ଏଠାକାର ସମସ୍ତ ସମ୍ପ୍ରଦାୟକୁ ସୁରକ୍ଷା ଦେବା। ମୁଁ ଏହା ନିଷ୍ପତ୍ତି ନେଇଛି। ଏଠାରେ ସଂଖ୍ୟାଲଘୁଙ୍କ ଉପରେ କୌଣସି ଅତ୍ୟାଚାର ହେବ ନାହିଁ।

ଅଗଷ୍ଟ ୨୦୨୪ରେ, ୟୁନୁସଙ୍କୁ ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ କରାଯାଇଥିଲା। ସେବେଠାରୁ ଏଠାରେ ହିନ୍ଦୁମାନଙ୍କ ଉପରେ ଅତ୍ୟାଚାର ଜାରି ରହିଛି। ୨୦୨୪ରେ ହିନ୍ଦୁମାନଙ୍କ ଉପରେ ୧୦୦୦ରୁ ଅଧିକ ଛୋଟ ବଡ଼ ଆକ୍ରମଣ ହୋଇଥିଲା।

ୟୁନୁସଙ୍କ ସରକାର ଏହାକୁ ରୋକିବାରେ ଅସମର୍ଥ ମନେ ହେଉଥିଲା। ମୌଳବାଦୀ ଇସଲାମିକ ନେତାମାନଙ୍କ ପ୍ରଭାବ ଯୋଗୁ ସରକାର ଏହାକୁ ବନ୍ଦ କରିପାରିଲେ ନାହିଁ। ସେବେଠାରୁ ୟୁନୁସଙ୍କ ଉପରେ ପ୍ରଶ୍ନ ଉଠାଯାଉଥିଲା। ଭାରତ ମଧ୍ୟ ଅନେକ ଥର ୟୁନୁସଙ୍କ ପ୍ରତି ନିଜର ଅସନ୍ତୋଷ ପ୍ରକାଶ କରିଥିଲା।

ବାଂଲାଦେଶର ସେନା ଏବଂ ବିରୋଧୀ ଦଳଗୁଡ଼ିକ ଯେପରି ୟୁନୁସଙ୍କୁ ଘେରି ରହିଛନ୍ତି। ସେଥିପାଇଁ ସେମାନଙ୍କ ପାଇଁ ଆଗକୁ ଯିବାର ପଥ ସହଜ ନୁହେଁ। ୟୁନୁସ ହିନ୍ଦୁମାନଙ୍କ ପ୍ରତି ମଧ୍ୟ ଯେଉଁଭଳି ପ୍ରେମ ଦେଖାଉଛନ୍ତି। ତାହାକୁ ମଧ୍ୟ ପ୍ରତିଛବି ନିର୍ମାଣ ସହିତ ଯୋଡାଯାଉଛି। ଏହାର ଅର୍ଥ ହେଉଛି ଯିବା ପୂର୍ବରୁ ୟୁନୁସ ଚାହାଁନ୍ତି ନାହିଁ ଯେ ତାଙ୍କ ସମୟରେ କୌଣସି ଦାଗ ରହୁ।

The post ଗାଦି ଟଳମଳ ଦେଖି ହିନ୍ଦୁ ପାଇଁ ବଡ଼ ଘୋଷଣା କଲେ ମହମ୍ମଦ ୟୁନୁସ appeared first on Dharitri Odia News.