ଗୁକେଶ ଏବଂ ଲିରେନଙ୍କ ପ୍ରଦର୍ଶନରେ କାର୍ଲସେନ ନିରାଶ, କହିଲେ-ଦୁହିଁଙ୍କ ଖେଳକୁ ଦେଖିଲେ ଲାଗୁନି...

ନୂଆଦିଲ୍ଲୀ: ଭାରତୀୟ ଗ୍ରାଣ୍ଡ ମାଷ୍ଟର ଡି ଗୁକେଶ ଏବଂ ଡିଫେଣ୍ଡିଂ ଚାମ୍ପିୟନ ଡିଙ୍ଗ ଲିରେନଙ୍କ ମଧ୍ୟରେ ବିଶ୍ୱ ଚେସ୍ ଚାମ୍ପିଅନଶିପ ଖେଳାଯାଉଛି । ଦୁହିଁଙ୍କ ମଧ୍ୟରେ ବର୍ତ୍ତମାନ ସୁଦ୍ଧା ୧୨ ରାଉଣ୍ଡ ଖେଳ ସରିଛି । ଦୁହେଁ ୬-୬ ପଏଣ୍ଟରେ ବରାବର ଅଛନ୍ତି । ପ୍ରଥମେ ୭.୫ ପଏଣ୍ଟ ହାସଲ କରିବା ଖେଳାଳି ବିଜେତା ହେବେ । ଶେଷ ଦୁଇ ରାଉଣ୍ଡରେ ଫଳାଫଳ ନବାହାରିଲେ ଫାଷ୍ଟର ଟାଇମ୍ କଣ୍ଟ୍ରୋଲରେ ରେଜଲ୍ଟ ବାହାରିବ । ତେବେ ଏହା ପୂର୍ବରୁ ଦୁନିଆର ଅନ୍ୟତମ ମହାନ ଚେସ୍ ଖେଳାଳି ମାଗନସ କାର୍ଲସେନ ଏକ ବଡ଼ ବୟାନ ଦେଇଛନ୍ତି । ୱାର୍ଲଡ ଚେସ୍ ଚାମ୍ପିଅନଶିପରେ ଡି ଗୁକେଶ ଏବଂ ଡିଙ୍ଗ ଲିରେନଙ୍କ ପ୍ରଦର୍ଶନ ଅତ୍ୟନ୍ତ ନିରାଶଜନକ ବୋଲି କହିଛନ୍ତି ।

୫ ଥର ବିଶ୍ୱ ଚେସ୍ ଚାମ୍ପିଅନଶିପ୍ ଜିତିଥିବା କାର୍ଲସନ କହିଛନ୍ତି ଯେ ଦୁହିଙ୍କ ଖେଳକୁ ଦେଖିଲେ ଏହା ବିଶ୍ୱ ଚେସ୍ ଚାମ୍ପିଅନଶିପ ସ୍ତରର ବୋଲି ଅନୁଭବ ହେଉ ନାହିଁ । କାର୍ଲସେନ କହିଛନ୍ତି, 'ମ୍ୟାଚ୍‌କୁ ଦେଖିଲେ ବିଶ୍ୱ ଚେସ୍ ଚାମ୍ପିଅନଶିପ ପାଇଁ ଲଢେଇ କରୁଥିବା ପ୍ରତିଯୋଗୀଙ୍କ ଖେଳ ପରି ଅନୁଭବ ହେଉ ନାହିଁ । ଓପନ ଟୁର୍ଣ୍ଣାମେଣ୍ଟର ଦ୍ୱିତୀୟ କିମ୍ୱା ତୃତୀୟ ରାଉଣ୍ଡ ମ୍ୟାଚ୍ ପରି ଅନୁଭବ ହେଉଛି ।' Take Take Take app ପଡକାଷ୍ଟରେ କାର୍ଲସେନ ଏହା କହିଛନ୍ତି ।

୧୮ ବର୍ଷୀୟ ଗୁକେଶ ରବିବାର ୧୧ତମ ରାଉଣ୍ଡରେ ବିଜୟୀ ହୋଇ ଗୋଟିଏ ଅଙ୍କ ଲିଡ୍ ନେଇଥିଲେ, କିନ୍ତୁ ଲିରେନ ପୁଣିଥରେ କମବ୍ୟାକ୍ କରିଥିଲେ । ଗୁକେଶ ଏବଂ ଲିରେନଙ୍କ ମଧ୍ୟରେ ଲଗାତାର ସାତ ମ୍ୟାଚ୍ ଡ୍ର ରହିବା ପରେ ୧୧ତମ ରାଉଣ୍ଡରେ ରେଜଲ୍ଟ ବାହାରିଥିଲା । ଲଗାତାର ଦୁଇ ରାଉଣ୍ଡରେ ରେଜଲ୍ଟ ବାହାରିଛି । ରବିବାର ଗୁକେଶ ଜିତିଥିବା ବେଳେ ସୋମବାର ଲିରେନ ଜିତି ବରାବର କରିଥିଲେ । ଗୁକେଶ ଏବଂ ଲିରେନଙ୍କ ମଧ୍ୟରେ ୧୪ ରାଉଣ୍ଡର କ୍ଲାସିକାଲ ଗେମ୍‌ରେ ଏବେ ଦୁଇଟି ମୁକାବିଲା ବଳକା ରହିଛି । 

ବିଶ୍ୱ ଚେସ୍ ଚାମ୍ପିୟନଶିପରେ ପ୍ରଥମେ ୭.୫ ଅଙ୍କ ହାସଲ କରିଥିବା ଖେଳାଳି ବିଜେତା ହେବେ । ଦୁଇ ଖେଳାଳି ବିଜୟଠାରୁ ୧.୫ ଅଙ୍କ ଦୂରରେ ଅଛନ୍ତି । ଯଦି ବଳକା ଥିବା ଅନ୍ୟ ଦୁଇ ରାଉଣ୍ଡ ଡ୍ର' ଯାଏ, ତେବେ ଫାଷ୍ଟର ଟାଇମ୍ କଣ୍ଟ୍ରୋଲ ଜରିଆରେ ବିଜେତାଙ୍କ ନାଁ ଘୋଷଣା କରାଯିବ । ମଙ୍ଗଳବାର ବିଶ୍ରାମ ଦିନ ଥିବା ବେଳେ ବୁଧବାର ୧୩ତମ ଏବଂ ଗୁରୁବାର ୧୪ତମ ତଥା ଅନ୍ତିମ ରାଉଣ୍ଡ ଖେଳାଯିବ । ବିଜେତାଙ୍କୁ ପୁରସ୍କାର ରାଶି ବାବଦକୁ ୨.୫ ମିଲିୟନ ଡଲାର ଭାରତୀୟ ମୁଦ୍ରାରେ ୨୦.୮ କୋଟି ଟଙ୍କା ମିଳିବ ।