ଗୁରୁଗ୍ରାମ ହସ୍ପିଟାଲରେ ଭେଣ୍ଟିଲେଟରରେ ଥିବା ଏୟାର ହୋଷ୍ଟେସଙ୍କୁ ଯୌନ ନିର୍ଯାତନା

ନୂଆଦିଲ୍ଲୀ,୧୬।୪: ଗୁରୁଗ୍ରାମରରେ ଜଣେ ୪୬ ବର୍ଷୀୟ ଏୟାର ହୋଷ୍ଟେସ ଅଭିଯୋଗ କରିଛନ୍ତି ଯେ ତାଙ୍କୁ ଏକ ଘରୋଇ ହସ୍ପିଟାଲର ଆଇସିୟୁରେ ଭେଣ୍ଟିଲେଟରରେ ଥିବା ସମୟରେ ଯୌନ ନିର୍ଯାତନାର ଶିକାର ହେବାକୁ ପଡିଛି। ଏହି ଘଟଣା ଏପ୍ରିଲ ୬, ୨୦୨୫ରେ ଘଟିଥିଲା, କିନ୍ତୁ ଏପ୍ରିଲ ୧୪ରେ ଥାନାରେ ମାମଲା ରୁଜୁ ହେବା ପରେ ଏହା ସାମ୍ନାକୁ ଆସିଥିଲା।

ସୂଚନା ଅନୁଯାୟୀ ପଶ୍ଚିମବଙ୍ଗର ଏହି ମହିଳା ଜଣଙ୍କ ଏକ ଏୟାରଲାଇନ କମ୍ପାନୀ ପାଇଁ ତାଲିମ ନେବାକୁ ଗୁରୁଗ୍ରାମ ଆସିଥିଲେ ଏବଂ ଏକ ପାଞ୍ଚ ତାରକା ହୋଟେଲରେ ରହୁଥିଲେ। ମାର୍ଚ୍ଚ ୩୧ରେ ଗୁରୁଗ୍ରାମରେ ପହଞ୍ଚିବା ପରେ ହୋଟେଲର ସୁଇମିଂ ପୁଲରେ ବୁଡିଯିବା କାରଣରୁ ତାଙ୍କ ସ୍ୱାସ୍ଥ୍ୟ ବିଗିଡ଼ିଥିଲା। ଏପ୍ରିଲ ୫ରେ ତାଙ୍କ ସ୍ୱାମୀ ତାଙ୍କୁ ମେଦାନ୍ତା ହସ୍ପିଟାଲରେ ଭର୍ତ୍ତି କରିଥିଲେ, ଯେଉଁଠାରେ ତାଙ୍କୁ ଭେଣ୍ଟିଲେଟର ସହାୟତାରେ ଆଇସିୟୁରେ ରଖାଯାଇଥିଲା।

ମହିଳା ଜଣଙ୍କ କହିଛନ୍ତି ଯେ ଏପ୍ରିଲ ୬ରେ, ସେ ଚେତାଶୂନ୍ୟ ଅବସ୍ଥାରେ ଭେଣ୍ଟିଲେଟର ଥିବାବେଳେ, ହସ୍ପିଟାଲର ଜଣେ କର୍ମଚାରୀ ତାଙ୍କୁ ଯୌନ ନିର୍ଯାତନା ଦେଇଥିଲେ। ଏପରି ଅବସ୍ଥାରେ ପ୍ରତିରୋଧ କରିବା ବା ଚିତ୍କାର କରିବା ଅସମ୍ଭବ ଥିଲା। ଅଭିଯୋଗ ଅନୁଯାୟୀ, ସେତେବେଳେ ଦୁଇଜଣ ନର୍ସ ଉପସ୍ଥିତ ଥିଲେ, କିନ୍ତୁ ସେମାନେ କୌଣସି ହସ୍ତକ୍ଷେପ କରି ନଥିଲେ।

ଏପ୍ରିଲ ୧୩ରେ ଡିସଚାର୍ଜ ହେବା ପରେ ମହିଳା ଜଣଙ୍କ ତାଙ୍କ ସ୍ୱାମୀଙ୍କୁ ଘଟଣା ବିଷୟରେ ଜଣାଇଥିଲେ। ପରେ ସେମାନେ ଆଇନଗତ ପରାମର୍ଶଦାତାଙ୍କ ସହାୟତାରେ ଏପ୍ରିଲ ୧୪ରେ ଥାନାରେ ଅଭିଯୋଗ ଦାୟର କରିଥିଲେ। ଭାରତୀୟ ନ୍ୟାୟ ସଂହିତା (BNS)ର ସମ୍ପୃକ୍ତ ଧାରା ଅନୁଯାୟୀ ଅଜଣା ହସ୍ପିଟାଲ କର୍ମଚାରୀଙ୍କ ବିରୋଧରେ ଏଫଆଇଆର ରୁଜୁ ହୋଇଛି।

ଗୁରୁଗ୍ରାମ ପୋଲିସ ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ହସ୍ପିଟାଲର ସିସିଟିଭି ଫୁଟେଜ ଯାଞ୍ଚ କରୁଛି। ଏହା ସହିତ ହସ୍ପିଟାଲର ଡ୍ୟୁଟି ଚାର୍ଟ ଓ କର୍ମଚାରୀଙ୍କ ତାଲିକା ମଧ୍ୟ ଯାଞ୍ଚ କରାଯାଉଛି। ଘଟଣା ସମ୍ପର୍କରେ ପୋଲିସ କହିଛି ଯେ ପୀଡ଼ିତାଙ୍କ ବୟାନ ମାଜିଷ୍ଟ୍ରେଟଙ୍କ ସମ୍ମୁଖରେ ରେକର୍ଡ କରାଯାଇଛି। ପୋଲିସ ଏହି ମାମଲାକୁ ଗମ୍ଭୀରତାର ସହ ତଦନ୍ତ କରୁଛି ଏବଂ ଅଭିଯୁକ୍ତଙ୍କୁ ଶୀଘ୍ର ଗିରଫ କରାଯିବ ବୋଲି ପ୍ରତିଶ୍ରୁତି ଦେଇଛି।

ଏଥିସହିତ ପୋଲିସ ଘଟଣା ସମୟରେ ଉପସ୍ଥିତ ଥିବା ଅନ୍ୟ କର୍ମଚାରୀଙ୍କ ଭୂମିକା ମଧ୍ୟ ଯାଞ୍ଚ କରୁଛି, ବିଶେଷତ ଦୁଇଜଣ ନର୍ସ ଯେଉଁମାନେ ଘଟଣାକୁ ରୋକି ନଥିଲେ।

ଏହି ମାମଲାରେ ମେଦାନ୍ତା ହସ୍ପିଟାଲ ଏକ ବିବୃତି ଜାରି କରି କହିଛି ଯେ ସେମାନେ ପୋଲିସ ତଦନ୍ତରେ ପୂର୍ଣ୍ଣ ସହଯୋଗ କରୁଛନ୍ତି। ହସ୍ପିଟାଲ ଅନୁଯାୟୀ, ଏପର୍ଯ୍ୟନ୍ତ ଅଭିଯୋଗ ସମ୍ପୃକ୍ତ କୌଣସି ପ୍ରମାଣ ମିଳି ନାହିଁ, ଏବଂ ସମସ୍ତ ସମ୍ପୃକ୍ତ ସିସିଟିଭି ଫୁଟେଜ ଓ ଡକ୍ୟୁମେଣ୍ଟ ପୋଲିସକୁ ହସ୍ତାନ୍ତର କରାଯାଇଛି।

ତେବେ ଏହି ଘଟଣା ହସ୍ପିଟାଲରେ ରୋଗୀଙ୍କ ସୁରକ୍ଷା, ବିଶେଷତ ମହିଳା ରୋଗୀଙ୍କ ସୁରକ୍ଷା ଉପରେ ଗମ୍ଭୀର ପ୍ରଶ୍ନ ଉଠାଇଛି। ଆଇସିୟୁ ଭଳି ସମ୍ବେଦନଶୀଳ ଅଞ୍ଚଳରେ ସୁରକ୍ଷା ବ୍ୟବସ୍ଥାର ଅଭାବ ଏବଂ କର୍ମଚାରୀଙ୍କ ଜବାବଦେହିତା ସମ୍ପର୍କରେ ଆଲୋଚନା ଆରମ୍ଭ ହୋଇଛି।

The post ଗୁରୁଗ୍ରାମ ହସ୍ପିଟାଲରେ ଭେଣ୍ଟିଲେଟରରେ ଥିବା ଏୟାର ହୋଷ୍ଟେସଙ୍କୁ ଯୌନ ନିର୍ଯାତନା appeared first on Dharitri Odia News.