ଘୋଷଣା ହେଲା କଂଗ୍ରେସର ‘ଜୟ ବାପୁ, ଜୟ ଭୀମ, ଜୟ ସମ୍ବିଧାନ’ ଅଭିଯାନର ନୂଆ ତାରିଖ

ନୂଆଦିଲ୍ଲୀ,୨୯।୧୨: କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି ଯେ ତାଙ୍କ ଦଳ ଜାନୁଆରୀ ୩ ପରେ ଜୟ ବାପୁ, ଜୟ ଭୀମ ଏବଂ ଜୟ ସମ୍ବିଧାନ ଅଭିଯାନ ଆରମ୍ଭ କରିବ। ଏହି ଅଭିଯାନ ଅଧୀନରେ କଂଗ୍ରେସ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଇସ୍ତଫା ଦାବି କରିବ। କଂଗ୍ରେସ ଅଭିଯୋଗ କରିଛି ଯେ ଅମିତ ଶାହା ନିକଟରେ ସଂସଦରେ ଭାଷଣ ଦେବାବେଳେ ଡକ୍ଟର ଆମ୍ବେଦକରଙ୍କୁ ଅପମାନିତ କରିଥିଲେ। ସୂଚନାଯୋଗ୍ୟ ଯେ କଂଗ୍ରେସ ୱାର୍କିଂ କମିଟି ବବୈଠକରେ ଏହି ଅଭିଯାନ ଘୋଷଣା କରାଯାଇଥିଲା, କିନ୍ତୁ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ମୃତ୍ୟୁ ହେତୁ ସାତ ଦିନ ଶୋକ ପାଇଁ ଏହାକୁ କିଛି ଦିନ ପାଇଁ ସ୍ଥଗିତ ରଖାଯାଇଥିଲା।
ଜୟରାମ ରମେଶ କହିଛନ୍ତି ଯେ ‘ବେଲାଗାଭିରେ ଏହି ଅଭିଯାନ ଘୋଷଣା କରାଯାଇଥିଲା, କିନ୍ତୁ ମନମୋହନ ସିଂଙ୍କ ମୃତ୍ୟୁ ପାଇଁ ସାତ ଦିନ ଶୋକ ହେତୁ ଏହାକୁ ଜାନୁୟାରୀ ୩, ୨୦୨୫ ପର୍ଯ୍ୟନ୍ତ ବନ୍ଦ କରିଦିଆଯାଇଛି। ଏହି ଅଭିଯାନର ଏକ ଅଂଶ ଭାବରେ ଦଳ ରାଲି ଆୟୋଜନ କରିବ। ୨୬ ଜାନୁଆରୀ ୨୦୨୫ରେ ଡକ୍ଟର ବାବାସାହେବ ଆମ୍ବେଦକରଙ୍କ ଜନ୍ମସ୍ଥାନରେ ଏକ ବଡ ରାଲିର ଆୟୋଜନ କରାଯିବ। ସମ୍ବିଧାନ ବଞ୍ଚାଅ ରାଷ୍ଟ୍ରୀୟ ପଦଯାତ୍ରାକୁ ୨୫ ଜାନୁଆରୀ ୨୦୨୫ ରୁ ୨୫ ଜାନୁଆରୀ ୨୦୨୬ ପର୍ଯ୍ୟନ୍ତ ସାରା ଦେଶରେ ନିଆଯିବ। ଆମର ଦାବି ହେଉଛି ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କ୍ଷମା ମାଗନ୍ତୁ ଏବଂ ଇସ୍ତଫା ଦିଅନ୍ତୁ।
ସୂଚନାଯୋଗ୍ୟ, ଶୀତ ଅଧିବେଶନରେ ରାଜ୍ୟ ସଭାରେ ତାଙ୍କ ଅଭିଭାଷଣରେ ଅମିତ ଶାହା କହିଥିଲେ ଯେ ଆଜିକାଲି କଂଗ୍ରେସ ଲୋକମାନେ ଆମ୍ବେଦକରଙ୍କ ନାମ ବହୁତ ନେଉଛନ୍ତି, ଯଦି ସେମାନେ ଭଗବାନଙ୍କ ଏତେ ନାମ ନେଇଥାନ୍ତେ ତେବେ ସେମାନେ ସ୍ବର୍ଗ ପାଇଥାନ୍ତେ। କଂଗ୍ରେସ ଏହାକୁ ଡକ୍ଟର ଆମ୍ବେଦକରଙ୍କ ପ୍ରତି ଅପମାନ ବୋଲି କହିଛି ଏବଂ ଏହି ପ୍ରସଙ୍ଗରେ ଅମିତ ଶାହାଙ୍କ ଇସ୍ତଫା ଦାବି କରିଛି।

The post ଘୋଷଣା ହେଲା କଂଗ୍ରେସର ‘ଜୟ ବାପୁ, ଜୟ ଭୀମ, ଜୟ ସମ୍ବିଧାନ’ ଅଭିଯାନର ନୂଆ ତାରିଖ appeared first on Dharitri Odia News.