ଟିକେଟ ନ ମିଳିବା ପରେ ଆସିଲା ବବିତା ଫୋଗାଟଙ୍କ ପ୍ରଥମ ବୟାନ, କହିଲେ ବ୍ୟକ୍ତିଠୁ ବଡ ଦଳ, ଦଳଠୁ ବଡ…

ନୂଆଦିଲ୍ଲୀ,୬।୯: ନିକଟରେ ଭାରତୀୟ ଜନତା ପାର୍ଟି (ଭାଜପା) ହରିୟାଣା ବିଧାନସଭା ନିର୍ବାଚନ ପାଇଁ ୬୭ ଜଣ ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କରିଛି। ଏଥର ପାର୍ଟି ରେସଲର ବବିତା ଫୋଗାଟଙ୍କୁ ଟିକେଟ ଦେଇ ନାହିଁ। ବବିତା ଫୋଗାଟଙ୍କ ସ୍ଥାନରେ ଚରଖି-ଦାଦରି ବିଧାନସଭା ଆସନରୁ ସୁନୀଲ ସାଙ୍ଗୱାନଙ୍କୁ ଭାଜପା ଟିକେଟ ଦେଇଛି। ଟିକେଟ ନ ପାଇବା ପରେ ବବିତା ଫୋଗାଟ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ତାଙ୍କର ପ୍ରଥମ ପ୍ରତିକ୍ରିୟା ଦେଇଥିଲେ।

ସେ ଶୁକ୍ରବାର ଏକ ଏକ୍ସ-ପୋଷ୍ଟରେ ଲେଖିଛନ୍ତି, ’ପାର୍ଟି ବ୍ୟକ୍ତିବିଶେଷଙ୍କଠାରୁ ବଡ଼ ଏବଂ ଦେଶ ଦଳଠାରୁ ବଡ଼, ଏହା ମୋର ଦଳର ସମସ୍ତଙ୍କ ପାଇଁ ବାର୍ତ୍ତା !’
ବବିତା ଫୋଗାଟ ଆହୁରି ଲେଖିଛନ୍ତି, ମୁଁ ଆମର ଭାରତୀୟ ଜନତା ପାର୍ଟିର ଶୀର୍ଷ ନେତୃତ୍ୱଙ୍କ ନିଷ୍ପତ୍ତିରେ ଛିଡା ହୋଇଛି। ଦଳର ଜଣେ ଉତ୍ସର୍ଗୀକୃତ କର୍ମୀ ହୋଇ ମୁଁ ସଂଗଠନ ଦ୍ୱାରା ଦିଆଯାଇଥିବା ପ୍ରତ୍ୟେକ ଦାୟିତ୍ୱ ତୁଲାଇବି। ମୋର ବିଧାନସଭା ନିର୍ବାଚନମଣ୍ଡଳୀ ଚାଖରି-ଦାଦରିର ଦେବତୁଲ୍ୟ ଜନତା ଜନାର୍ଦ୍ଦନଙ୍କୁ ହୃଦୟରୁ କୃତଜ୍ଞତା ଜଣାଉଛି, ଯିଏ ମୋତେ ସର୍ବଦା ସେମାନଙ୍କ ଝିଅ ଏବଂ ଭଉଣୀ ପରି ଅପାର ପ୍ରେମ ଏବଂ ଆଶୀର୍ବାଦ ଦେଇଥିଲେ। ଭବିଷ୍ୟତରେ ମଧ୍ୟ ମୁଁ ତୁମର ସେବା କରିବାକୁ ସର୍ବଦା ପ୍ରସ୍ତୁତ ରହିବି। ଜୟ ହିନ୍ଦ-ଜୟ ଭାରତ।

ସୂଚନାଯୋଗ୍ୟ, ୨୦୧୯ ବିଧାନସଭା ନିର୍ବାଚନ ପୂର୍ବରୁ ରେସଲର ବବିତା ଫୋଗାଟ ଭାଜପାରେ ଯୋଗ ଦେଇଥିଲେ। ସେ ଭାଜପା ଟିକେଟରେ ଚାରଖୀ-ଦାଦରି ବିଧାନସଭା ଆସନରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ତେବେ ସେ ନିର୍ବାଚନରେ ଜିତିବାରେ ସଫଳ ହୋଇନଥିଲେ।
ନିକଟରେ ଭିଆରଏସ ନେଇଥିବା ସୁନୀଲ ସାଙ୍ଗୱାନଙ୍କୁ ଭାଜପା ଏହି ଆସନରୁ ପ୍ରାର୍ଥୀ କରିଛି। ସେ ତାଙ୍କ ପିତାଙ୍କ ରାଜନୈତିକ କର୍ମକ୍ଷେତ୍ର ଥିବା ଚାଖରି-ଦାଦରି ଆସନରୁ ନିଜ ଭାଗ୍ୟ ପରୀକ୍ଷା କରୁଛନ୍ତି।
ଅକ୍ଟୋବର ୫ରେ ଗୋଟିଏ ପର୍ଯ୍ୟାୟରେ ହରିୟାଣାର ୯୦ ଟି ବିଧାନସଭା ଆସନରେ ଭୋଟ ଅନୁଷ୍ଠିତ ହେବ। ଅକ୍ଟୋବର ୮ରେ ନିର୍ବାଚନର ଫଳାଫଳ ଘୋଷଣା କରାଯିବ।

The post ଟିକେଟ ନ ମିଳିବା ପରେ ଆସିଲା ବବିତା ଫୋଗାଟଙ୍କ ପ୍ରଥମ ବୟାନ, କହିଲେ ବ୍ୟକ୍ତିଠୁ ବଡ ଦଳ, ଦଳଠୁ ବଡ… appeared first on Dharitri Odia News.