ଟ୍ରମ୍ପଙ୍କ ନାଲି ଆଖି; ଏପ୍ରିଲ ୨ରୁ ‘ଯେସାକୁ ତେସା ଆମଦାନି’ ଶୁଳ୍କ ! ଭାରତ ବର୍ଷକୁ ହରାଇବ ୬୦ ହଜାର କୋଟି

ୱାଶିଂଟନ: ଆମଦାନି ଶୁଳ୍କ ନେଇ ପୁଣି ଭାରତକୁ ଟାର୍ଗେଟ୍ କଲା ଆମେରିକା । କଂଗ୍ରେସର ଯୁଗ୍ମ ଅଧିବେଶନରେ ଭାରତକୁ ନାଲି ଆଖି ଦେଖାଇଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏପ୍ରିଲ ୨ରୁ ‘ଯେସାକୁ ତେସା ଆମଦାନି’ ଶୁଳ୍କ ଲାଗୁ କରିବାକୁ ଦେଇଛନ୍ତି ଧମକ । ଭାରତ ସରକାର ଆମେରିକା ଉପରେ ୧୦୦%ରୁ ଅଧିକ ଶୁଳ୍କ ଲଦୁଛି ତେଣୁ ତାଙ୍କ ଉପରେ ମଧ୍ୟ ସମାନ ଟାରିଫ୍ ଲାଗିବ । ଆମେରିକୀୟ ଅଟୋମୋବାଇଲ୍ କ୍ଷେତ୍ର ଉପରେ ଭାରତର ୧୦୦%ରୁ ଅଧିକ ଆମଦାନି  ଶୁଳ୍କ ଗ୍ରହଣୀୟ ନୁହେଁ । ମୋଟା ଶୁଳ୍କ ଲଦି ଯଦି ଭାରତ ଆମକୁ  ସେଠାକାର ବଜାରରୁ ବଞ୍ଚିତ ରଖୁଛି, ଆମେ ମଧ୍ୟ ସେହିଭଳି ଭାବେ ଆମ ବଜାରରୁ ସେମାନଙ୍କୁ ଦୂରେଇ ରଖିବୁ । ଯେଉଁ ରାଷ୍ଟ୍ର ଆମେରିକୀୟ ସାମଗ୍ରୀ ଉପରେ ଯେତିକି ଟିକସ କଷିବ ଉକ୍ତ ରାଷ୍ଟ୍ର ଉପରେ ସେତିକି ଶୁଳ୍କ ଲଗାଯିବ ବୋଲି ଡୋନାଲ୍ଡ ଟ୍ରମ୍ପ କହିଛନ୍ତି ।

ଏକ ରିପୋର୍ଟ ଅନୁସାରେ, ଆମେରିକାର ଯେସାକୁ ତେସା ନୀତି ପାଇଁ ପ୍ରତି ବର୍ଷ ଭାରତ ରପ୍ତାନି ବାବଦକୁ ୬୦,୦୦୦ କୋଟି ଟଙ୍କାରୁ ଅଧିକ କ୍ଷତି ସହିବ । ଇଣ୍ଡିଆ ରେଟିଙ୍ଗ୍‌ସ ଆଣ୍ଡ୍‌ ରିସର୍ଚ୍ଚ ଅନୁସାରେ, ଆମେରିକାକୁ ରପ୍ତାନି ୨୦୦ କୋଟି ଡଲାରରୁ ୩୫୦ କୋଟି ଡଲାର ଖସିଲେ ଭାରତର ଜିଡିପି ଅଭିବୃଦ୍ଧି ୦.୦୫%ରୁ .୧୦% ସଂକୁଚିତ ହୋଇପାରେ । ଆଜି ଟ୍ରମ୍ପ କହିଲେ ଯେ, ଦଶନ୍ଧି ଦଶନ୍ଧି ଧରି ଅନ୍ୟ ରାଷ୍ଟ୍ରଗୁଡ଼ିକ ଆମେରିକା ଉପରେ ମୋଟା ଶୁଳ୍କ ଲଦି ଚାଲିଛନ୍ତି । ଏବେ ଆମ ପାଳି, ବର୍ତ୍ତମାନ ଉକ୍ତ ରାଷ୍ଟ୍ରଗୁଡ଼ିକ ଉପରେ ସମାନ ମାତ୍ରାରେ ଟିକସ ଲଦିବୁ ।   ୟୁରୋପୀୟ ସଂଘ, ଚୀନ୍‌, ବ୍ରାଜିଲ, ଭାରତ, ମେକ୍ସିକୋ ଏବଂ କାନାଡା ଏସବୁ ରାଷ୍ଟ୍ର ଆମ  ଉପରେ ଚଢ଼ା ଶୁଳ୍କ ଲଗାଉଛନ୍ତି । ଆମେ ଯେତିକି  ଟିକସ ଲଗାଉଛୁ ତା’ଠାରୁ ଢେର ଗୁଣା ଅଧିକ । ଏହା ଅଯୌକ୍ତିକ, ଯେସାକୁ ତେସା ଶୁଳ୍କ ପାଇଁ ରାଷ୍ଟ୍ରଗୁଡ଼ିକ ଏବେ ପ୍ରସ୍ତୁତ ରୁହନ୍ତୁ । 

କାନାଡା, ମେକ୍ସିକୋ ଏବଂ ଚୀନ୍‌ ଟ୍ରମ୍ପଙ୍କ ଟାରିଫ୍‌ ବାଣକୁ ସାମ୍ନା କରୁଥିବାବେଳେ ଭାରତ  ବର୍ତ୍ତମାନ ସୁଦ୍ଧା ଏଥିରୁ ବାହାରେ ଅଛି । କିନ୍ତୁ ଏପ୍ରିଲ ୨ରେ ଯେତେବେଳେ ରେସିପ୍ରୋକାଲ   ଟାରିଫ୍‌ ରାଷ୍ଟ୍ରଗୁଡ଼ିକ ଉପରେ ଲାଗୁ ହେବ ଭାରତ ମଧ୍ୟ ବର୍ତ୍ତିପାରିବ ନାହିଁ । ଅର୍ଥନୀତିଜ୍ଞଙ୍କ ମତରେ, ଆମେରିକୀୟ ସାମଗ୍ରୀ ଉପରେ ଭାରତ ଯେତିକି ଆମଦାନୀ ଶୁଳ୍କ ଲଗାଉଛି ତାହା ଭାରତୀୟ ସାମଗ୍ରୀ ଉପରେ ଆମେରିକାର ଶୁଳ୍କ ତୁଳନାରେ ୧୦%ରୁ ଅଧିକ ।  ଟ୍ରମ୍ପଙ୍କ ଯେସାକୁ ତେସା ଶୁଳ୍କ ନୀତିକୁ ନେଇ  ଭାରତର ଅଟୋ ଶିଳ୍ପଠାରୁ ଆରମ୍ଭ କରି କୃଷି  ପର୍ଯ୍ୟନ୍ତ କ୍ଷେତ୍ର ଚିନ୍ତିତ । ସର୍ବାଧିକ ପ୍ରଭାବିତ ହେବାକୁ ଥିବା   କ୍ଷେତ୍ରଗୁଡ଼ିକ ହେଲା କେମିକାଲ, ଧାତବ  ଉତ୍ପାଦ, ଗହଣା, ଅଟୋମୋବାଇଲ, ଫାର୍ମା ଏବଂ ଖାଦ୍ୟ ସାମଗ୍ରୀ । 

ବିଶେଷଜ୍ଞଙ୍କ ଅନୁସାରେ, ୨୦୨୪ରେ ଭାରତ  ଆମେରିକାକୁ ପ୍ରାୟ ୭୪୦୦ କୋଟି ଡଲାର  ମୂଲ୍ୟର ସାମଗ୍ରୀ ରପ୍ତାନି କରିଛି । ଏଥିମଧ୍ୟରେ ୮୫୦ କୋଟି ଡଲାର ମୂଲ୍ୟର ମୋତି,  ରତ୍ନପଥର ଏବଂ ଗହଣା ରହିଥିବାବେଳେ ୮୦୦   କୋଟି ଡଲାର ମୂଲ୍ୟର ଫାର୍ମା ଉତ୍ପାଦ ଏବଂ ୪୦୦ କୋଟି ଡଲାର ମୂଲ୍ୟର ପେଟ୍ରୋକେମିକାଲ ରହିଛି ।  ୨୦୨୪ରେ ଭାରତକୁ ଆସିଛି ପ୍ରାୟ ୪୨୦୦ କୋଟି ଡଲାରର ଆମେରିକୀୟ ସାମଗ୍ରୀ । ତେବେ ଏସବୁ   ସାମଗ୍ରୀ ପାଇଁ ଆମେରିକା ଯେତିକି ଟିକସ ଲଗାଉଛି ତା’ଠାରୁ ଢେର ଅଧିକ ଶୁଳ୍କ କଷୁଛି ଭାରତ । କାଠ  ଉତ୍ପାଦ ଓ ଯନ୍ତ୍ରପାତିରେ ୭% ଅଧିକ, ଫୁଟ୍‌ୱେର୍‌ ଓ ପରିବହନ ଉପକରଣରେ ୧୫%ରୁ ୨୦% ଅଧିକ  ଏବଂ ଖାଦ୍ୟ ସାମଗ୍ରୀରେ ପ୍ରାୟ ୬୮% ଅଧିକ ଟିକସ  ଲଦୁଛି ଭାରତ । ଟ୍ରମ୍ପଙ୍କ ଯେସାକୁ ତେସା ଶୁଳ୍କ ନୀତି  ଦ୍ୱାରା ଭାରତୀୟ କୃଷି ଉତ୍ପାଦ ଉପରେ ଅଧିକ ପ୍ରଭାବ  ପଡ଼ିପାରେ । କାରଣ ଉଭୟ ଦେଶଗୁଡ଼ିକ ପକ୍ଷରୁ ଏ କ୍ଷେତ୍ରରେ ଲଗାଯାଉଥିବା ପାରସ୍ପରିକ ଶୁଳ୍କ ପାର୍ଥକ୍ୟ  ଅଧିକ ରହିଛି । ବିଶେଷ କରି ଏ କ୍ଷେତ୍ରରେ କାରବାର  କମ୍‌ ରହିଛି । କିନ୍ତୁ ଶୁଳ୍କ ପାର୍ଥକ୍ୟ ଅଧିକ । ବୟନ ଶିଳ୍ପ  ସାମଗ୍ରୀ, ଚମଡ଼ା ଏବଂ କାଠ ଉତ୍ପାଦଗୁଡ଼ିକ ପାଇଁ ରିସ୍କ  କମ୍‌ ଅଛି । କାରଣ ଉଭୟ ରାଷ୍ଟ୍ର ମଧ୍ୟରେ ଏ କ୍ଷେତ୍ରରେ  ଶୁଳ୍କ ବ୍ୟବଧାନ କମ୍‌  । 

ଗତ ସପ୍ତାହରେ ଇଣ୍ଡିଆ ରେଟିଙ୍ଗ୍‌ସ ଆଣ୍ଡ୍‌  ରିସର୍ଚ୍ଚ ପ୍ରକାଶ କରିଥିଲା ଯେ, ଟ୍ରମ୍ପଙ୍କ ଯେସାକୁ ତେସା  ଆମଦାନି ଶୁଳ୍କ ନୀତି ଲାଗୁ ହେଲେ ୨୦୨୫-୨୬  ଆର୍ଥିକବର୍ଷରେ ଆମେରିକାକୁ ଭାରତର ରପ୍ତାନି ୨୦୦ କୋଟି ଡଲାରରୁ ୭୦୦ କୋଟି ଡଲାର ପର୍ଯ୍ୟନ୍ତ ହ୍ରାସ   ପାଇବ । ଚଳିତ ଆର୍ଥିକବର୍ଷର ଏପ୍ରିଲ-ଡିସେମ୍ବରରେ  ଆମେରିକାକୁ ଭାରତର ରପ୍ତାନି ୫.୫୭% ବଢ଼ି  ୫୯୯୩ କୋଟି ଡଲାର ରହିଛି । ସେହିଭଳି ଆର୍ଥିକ  ବର୍ଷର ପ୍ରଥମ ୯ ମାସରେ ସେଠାରୁ ଭାରତକୁ ଆମଦାନୀ  ୧.୯୧% ବଢ଼ି ୩୩୪୦ କୋଟି ଡଲାର ରହିଛି ।