ଡାକ୍ତରାଣୀଙ୍କୁ ଏଡିଏମଓ ଯୌନ ନିର୍ଯ୍ୟାତନା ଦେଉଥିବା ଅଭିଯୋଗ

ସୁନ୍ଦରଗଡ଼: ସୁନ୍ଦରଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଜନୈକା ଡାକ୍ତରାଣୀ ଅତିରିକ୍ତ ଜିଲ୍ଲା ଚିକିତ୍ସାଧାକାରୀଙ୍କ ବିରୋଧରେ ଯୌନ ନିର୍ଯ୍ୟାତନା ଅଭିଯୋଗ ଆଣିଛନ୍ତି । ଏ ନେଇ ଟାଉନ ଥାନାରେ ଲିଖିତ ଅଭିଯୋଗ ହୋଇଛି। ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି ।

ଆଖଣ୍ଡଳଣି ଅଂଚଳର ମହିଳା ଡାକ୍ତର ଜଣକ ଡିଏମଏଫ ତରଫରୁ ନିଯୁକ୍ତି ପାଇ ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଅଛନ୍ତି । ଏଡିଏମଓ ପ୍ରକାଶ ବଳ ଅନେକ ସମୟରେ ମହିଳା ଡାକ୍ତରଙ୍କୁ ଯୌନ ନିର୍ଯ୍ୟାତନା ଦେଉଥିବା ଅଭିଯୋଗ ହୋଇଛି। ଏଡିଏମଓ (ମେଡିକାଲ) ଭାବେ ପଦୋନ୍ନତି ପାଇବା ପୂର୍ବରୁ ଡାକ୍ତର ପ୍ରକାଶ ବଳ (୫୨) ଗତ ୨୦୨୨ ମସିହାରେ ତାଙ୍କ ପ୍ରତି ଅଶ୍ଲିଳ ଆଚରଣ ପ୍ରଦର୍ଶନ କରି ଆସୁଥିଲେ । ବିଭିନ୍ନ ସମୟରେ ଦ୍ୱିଅର୍ଥବୋଧକ କଥା ହେଉଥିବା ବେଳେ ତାଙ୍କ ଦେହରେ ହାତ ମାରୁଥିଲେ । ଡାକ୍ତରାଣୀ ଏହାକୁ ବିରୋଧ କଲେ ସେ ଡିଏମଏଫରେ ନିଯୁକ୍ତି ପାଇଥିବାରୁ ତାଙ୍କୁ ଚାକିରୀରୁ ବାହାର କରି ଦେବାକୁ ଧମକ ଦେଉଥିଲେ ।

ତେବେ ଏଡିଏମଓ ଡାକ୍ତର ବଳ ଉକ୍ତ ଅଭିଯୋଗକୁ ଖଣ୍ଡନ କରିଛନ୍ତି । ଚିକିତ୍ସା ବିଭାଗରେ କାର୍ଯ୍ୟରତ ମହିଳା ଡାକ୍ତରଙ୍କ ମଧ୍ୟରେ ଗଣ୍ଡଗୋଳ ଲାଗି ରହୁଥିବାରୁ ଜିଲ୍ଲାପାଳଙ୍କ ପରାମର୍ଶ କ୍ରମେ ତାଙ୍କୁ ବଦଳି କରା ଯାଇଥିବା କହିଛନ୍ତି ।