ନାଇଜେରିଆରେ ଉଗ୍ରବାଦୀ ଆକ୍ରମଣରେ ୨୧ ଯବାନ ମୃତ

ନୂଆଦିଲ୍ଲୀ: ନାଇଜେରିଆର ଉତ୍ତର ପଶ୍ଚିମ ରାଜ୍ୟ କଟସିନାରେ ଉଗ୍ରବାଦୀଙ୍କ ଆକ୍ରମଣରେ ୨୧ ଜଣ ଯବାନଙ୍କ ମୃତ୍ୟୁ ହୋଇଛି । ସ୍ଥାନୀୟ ଅଧିକାରୀ ଏହି ସୂଚନା ଦେଇଛନ୍ତି । କଟସିନା ପୋଲିସ ମୁଖପାତ୍ର ଅବୁବକର ସିଦ୍ଦୀକ ଅଲିୟୁ ନ୍ୟୁଜ୍ ଏଜେନ୍ସିକୁ କହିଛନ୍ତି ଯେ ସରକାର ସମର୍ଥିତ ଯବାନଙ୍କ ଗାଡ଼ି ଉପରକୁ ଉଗ୍ରବାଦୀମାନେ ଆକ୍ରମଣ କରିଛନ୍ତି ।

ପୋଲିସ ମୁଖପାତ୍ରଙ୍କ ସୂଚନା ଅନୁସାରେ, ଯବାନମାନେ ନିଜର ଜଣେ ସହକର୍ମୀଙ୍କ ମୃତ୍ୟୁରେ ଶୋକସନ୍ତପ୍ତ ପରିବାରକୁ ସମବେଦନା ଜଣାଇ ଫେରୁଥିଲେ । ସାଫାନା ଜିଲ୍ଲାର ବଉରେ ଗାଁରେ ଯବାନଙ୍କ ଗାଡ଼ି ପହଞ୍ଚିବା ବେଳେ ଉଗ୍ରବାଦୀମାନେ ଲୁଚି ରହି ଆକ୍ରମଣ କରିଥିଲେ । ଏହି ଆକ୍ରମଣରେ ୨୧ ଜଣଙ୍କ ମୃତ୍ୟୁ ହୋଇଛି । ଆକ୍ରମଣ ପଛରେ ଥିବା ଦୋଷୀଙ୍କୁ ଧରିବା ପାଇଁ ପୋଲିସ ସମସ୍ତ ବ୍ୟବସ୍ଥା ଗ୍ରହଣ କରୁଛି ବୋଲି ଆଲିୟୁ କହିଛନ୍ତି ।

ଅନ୍ୟପଟେ ପ୍ରତ୍ୟକ୍ଷଦର୍ଶୀ ନାଇଜେରିଆର ପ୍ରିମିୟମ ଟାଇମ୍ସକୁ ମୃତକଙ୍କ ସଂଖ୍ୟା ଅଧିକ ଥିବା କହିଛନ୍ତି । ଏହି ଆକ୍ରମଣରେ ଅତି କମରେ ୨୫ ଜଣଙ୍କ ମୃତ୍ୟୁ ହୋଇଥିବା ସେମାନେ ଦାବି କରିଛନ୍ତି । ଏହାସହ ଅନେକ ଗ୍ରାମବାସୀ ନିଖୋଜ ଥିବା କହିଛନ୍ତି ।