ପରମାଣୁ ଶକ୍ତି ସମ୍ପନ୍ନ ୫ ଦେଶ ଡାକିଲେ ଗୁରୁତ୍ୱପୂର୍ଣ୍ଣ ବୈଠକ, ଉତ୍ତେଜନା ଭିତରେ ରୁଷ ମନ୍ତ୍ରୀଙ୍କ ଦାବି

ମୁମ୍ୱାଇ: ଦୁନିଆର ପାଞ୍ଚ ପରମାଣୁ ହତିଆର ସମ୍ପନ୍ନ ଦେଶ ଆମେରିକାର ନ୍ୟୁୟର୍କରେ ବୈଠକ କରିବାକୁ ଯାଉଛନ୍ତି । ପାଞ୍ଚ ଦେଶଙ୍କ ଏହି ବୈଠକ ଆଗାମୀ ଦୁଇ ସପ୍ତାହରେ ହୋଇପାରେ । ରୁଷ ମିଡିଆ ଦେଶର ଉପବିଦେଶ ମନ୍ତ୍ରୀ ସର୍ଗେଇ ରୟାବକୋଭାଙ୍କ ବୟାନକୁ ନେଇ ଏହି ସୂଚନା ଦେଇଛି । ତେବେ ରାୟବକୋଭ ବୈଠକ ହେବା ନେଇ କୌଣସି ସଠିକ୍ ତାରିଖ ଏବଂ କେଉଁ ଅଧିକାରୀ ସାମିଲ ହେବେ ସେ ବାବଦରେ ସୂଚନା ଦେଇନାହାନ୍ତି ।

ଯୁକ୍ରେନ ଯୁଦ୍ଧ ଆରମ୍ଭ ପରଠୁ ରୁଷ ଏବଂ ପାଶ୍ଚାତ୍ୟ ଦେଶ ମଧ୍ୟରେ ପରମାଣୁ ଶକ୍ତି ପ୍ରୟୋଗ ଉପରେ ବୟାନବାଦି ଜାରି ରହିଛି । ଏହାରି ଭିତରେ ରୁଷ ମନ୍ତ୍ରୀଙ୍କ ଦାବି ଯଦି ସତ ହୁଏ ତେବେ ଏହି ବୈଠକ ଗୁରୁତ୍ୱପୂର୍ଣ୍ଣ ହେବାକୁ ଯାଉଛି । ରୁଷ, ଆମେରିକା, ଚୀନ, ଫ୍ରାନ୍ସ ଏବଂ ବ୍ରିଟେନକୁ ଗୋଟିଏ ମଞ୍ଚରେ ଆଣିପାରେ । ଏହି ସବୁ ରାଷ୍ଟ୍ର ପରମାଣୁ ଶକ୍ତି ସମ୍ପନ୍ନ ଏବଂ ଜାତିସଂଘ ସୁରକ୍ଷା ପରିଷଦର ସ୍ଥାୟୀ ସଦସ୍ୟ ମଧ୍ୟ ଅଛନ୍ତି ।

ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଗତ ମାସରେ ଦେଶର ପରମାଣୁ ନୀତିରେ ପରିବର୍ତ୍ତନ ଘୋଷଣା କରିଥିଲେ । ସେ କହିଥିଲେ ଯେ ରୁଷ ସେହି ସବୁ ପରିଦୃଶ୍ୟ ଉପରେ ବିଚାର କରୁଛି, ଯାହା ପରମାଣୁ ହତିଆର ପ୍ରୟୋଗ ଉପରେ ବିଚାର ପାଇଁ ପ୍ରେରିତ କରିବ ।

୨୦୨୨ ଫେବ୍ରୁଆରୀରେ ଭ୍ଲାଦିମିର ପୁଟିନ ୟୁକ୍ରେନରେ ସୈନ୍ୟ ଅପରେସନ ପାଇଁ ଘୋଷଣା କରିଥିଲେ । ଏହାର କିଛି ସପ୍ତାହ ପୂର୍ବରୁ 'ନ୍ୟୁକ୍ଲିୟର ଫାଇଭ୍' ଏକ ମିଳିତ ବୟାନ ଜାରି କରିଥିଲେ । ଯେଉଁଥିରେ କୁହାଯାଉଥିଲା ଯେ ପରମାଣୁ ଶକ୍ତିଙ୍କ ମଧ୍ୟରେ ଯୁଦ୍ଧ ଉତ୍ତେଜନା ଏବଂ ରଣନୀତିକ ବିପଦ କମ କରିବା ପାଇଁ ପ୍ରାଥମିକତା ଦିଆଯିବ । ବୟାନରେ ଏହା ବି କୁହାଯାଇଥିଲା ଯେ ପରମାଣୁ ଯୁଦ୍ଧ କେହି ଜିତିପାରିବେ ନାହିଁ ଏବଂ କେବେ ବି ଏଥିରେ ଯୁଦ୍ଧ ନ ଲଢାଯିବା ଦରକାର ।