ପର୍ଯ୍ୟଟକଙ୍କ ପାଇଁ ଖୁସି ଖବର, ଦ୍ଵିତୀୟ ଥର ମାଆ ହେଲା ସିଂହୀ ରେୱା

ଭୁବନେଶ୍ୱର ୨୪/୦୩: ନନ୍ଦନକାନନରେ ଖୁସିର ଲହରୀ । ମାଆ ହେଲା ସିଂହୀ ରେୱା । ଦ୍ଵିତୀୟ ଥର ମାଆ ହୋଇଛି ସିଂହୀ ରେୱା । ଏପର୍ଯ୍ୟନ୍ତ ଦୁଇଟି ଶାବକ ଜନ୍ମ ଦେଇଛି ସିଂହୀ ରେୱା । ମାଆ ହେବା ପରେ ତାର ସ୍ୱାସ୍ଥ୍ୟ ପ୍ରତି ସମସ୍ତେ ରଖିଛନ୍ତି ନଜର । ସିସିଟିଭି କ୍ୟାମେରାରେ କରାଯାଉଛି ମନିଟର । 

ସୂଚନା ଥାଉକି, ୬ ବର୍ଷ ବୟସ୍କା ସିଂହୀ ରେୱା ମା’ ହେବାକୁ ଯାଉଛି । ରେୱା ପ୍ରଥମ ଥର ତା’ର ଶାବକମାନଙ୍କ ଠିକ୍‌ରେ ଯତ୍ନ ନେଇ ପାରିନଥିଲା । ତା’ର ଦୁଇ ନବଜାତକକୁ ମାରି ଦେଇଥିବାରୁ ଆରମ୍ଭରୁ ପ୍ରାଣୀ ଚିକିତ୍ସକମାନେ ରେୱାର ସ୍ୱାସ୍ଥ୍ୟ  ଉପରେ ଅଧିକ ଧ୍ୟାନ ଦେଇଛନ୍ତି । ତାକୁ ଦରକାରୀ ଭିଟାମିନ ଖୁଆଇ ଏବଂ ପ୍ରତିଶୋଧକ ଟିକା ଦେଇତା’ର ସ୍ୱାସ୍ଥ୍ୟ ଉପରେ ଯତ୍ନ ନିଆଯାଉଥିଲା । 

ସଫାରୀର ଫିଡିଂ ଚ୍ୟାମ୍ବରକୁ ସିସିଟିଭି ନଜରରେ ରଖାଯାଇଛି । ପ୍ରାୟ ୧୦୦ ଦିନ ପୂର୍ବରୁ କମଳା ନେହରୁ ପ୍ରାଣୀ ସଂଗ୍ରହାଳୟରୁ ଆସିଥିବା ସିଂହୀ ‘ରେୱା’ ସହିତ  ନନ୍ଦନକାନନରେ ଜନ୍ମିତ ସିଂହ ‘ଜିତ୍‌’ର ମିଳନ କରାଯାଇଥିଲା । ୨୦୨୩ ଜାନୁଆରୀ ୧୦ରେ ସିଂହୀ ରେୱା  ୪ଟି ଶାବକ ଜନ୍ମ ଦେଇଥିଲା । 

ସେଥିମଧ୍ୟରୁ ସକାଳେ  ଗୋଟିକର ମୃତ୍ୟୁ ହୋଇଥିବା ବେଳେ ଗୋଟିକର  କେବଳ ମୁଣ୍ଡ ପଡ଼ିଥିଲା । ତେଣୁ ମା’ ଗୋଟିକୁ ମାରି  ଖାଇଥିବା ଓ ଅନ୍ୟଟିକୁ ମାରିଥିବା ଅନୁମାନ କରି  କର୍ତ୍ତୃପକ୍ଷ ଜୀବିତ ଦୁଇ ଶାବକକୁ ମା’ଠାରୁ ଅଲଗା କରି  ଶିଶୁଯତ୍ନ କେନ୍ଦ୍ରରେ ଛାଡ଼ିଥିଲେ । ଏବେ ଦୁଇ ଶାବକ  ପ୍ରାୟ ୧୪ ମାସର ହେଲେଣି । ଗତ ନନ୍ଦନକାନନ ପ୍ରତିଷ୍ଠା  ଦିବସରେ ସେମାନଙ୍କ ନାମ ମାୟା ଓ ଶିବମ୍‌ ରଖାଯାଇଛି ।