ପାଣିପାଗ ବିଭାଗର ବଡ଼ ଚେତାବନୀ, ଡେଞ୍ଜର ଜୋନରେ ୨୧ ସହର! ପାରଦ ଡେଇଁଲା ୪୨

ନୂଆଦିଲ୍ଲୀ,୭।୪: ଏଥର ସାରା ଦେଶରେ ଗ୍ରୀଷ୍ମ ପ୍ରବାହ ଏପ୍ରିଲ ଆରମ୍ଭରୁ ରେକର୍ଡ ଭାଙ୍ଗିଛି। ଦିଲ୍ଲୀ ସମେତ ପାଞ୍ଚଟି ରାଜ୍ୟର ୨୧ଟି ସହରରେ ତାପମାତ୍ରା ୪୨ ଡିଗ୍ରୀ ସେଲସିୟସ ଉପରେ ରେକର୍ଡ କରାଯାଇଛି। ପାଣିପାଗ ବିଭାଗ ଅନୁଯାୟୀ, ରାଜଧାନୀ ଦିଲ୍ଲୀକୁ ଆଗାମୀ ତିନି ଦିନ ପାଇଁ ପ୍ରବଳ ଗରମ ସହିବାକୁ ପଡିବ। ଦିଲ୍ଲୀ ବ୍ୟତୀତ, ରାଜସ୍ଥାନ, ମଧ୍ୟପ୍ରଦେଶ, ମହାରାଷ୍ଟ୍ର, ଗୁଜରାଟ ଏବଂ ଓଡ଼ିଶାର ଅନେକ ସ୍ଥାନରେ ଗ୍ରୀଷ୍ମ ପ୍ରବାହ ଜାରି ରହିଛି। ପାଣିପାଗ ବିଭାଗ କହିଛି ଯେ ପବନର ବେଗ ହ୍ରାସ ପାଇବା ଯୋଗୁଁ ତାପମାତ୍ରା ଅଧିକ ଅନୁଭୂତ ହେଉଛି। ସୋମବାର ସକାଳେ ପବନର ବେଗ ଘଣ୍ଟା ପ୍ରତି ୮-୧୦କିଲୋମିଟର ରହିବାର ସମ୍ଭାବନା ଅଛି, ଯାହା ଅପରାହ୍ନ ସୁଦ୍ଧା ଘଣ୍ଟା ପ୍ରତି ୪-୬ କିଲୋମିଟରକୁ ହ୍ରାସ ପାଇପାରେ।
ରବିବାର ରାଜସ୍ଥାନର ବାରମେରରେ ସର୍ବାଧିକ ତାପମାତ୍ରା ୪୫.୬ ଡିଗ୍ରୀ ସେଲସିୟସ ରେକର୍ଡ କରାଯାଇଛି, ଯାହା ଏପ୍ରିଲ ପ୍ରଥମ ସପ୍ତାହରେ ଏପର୍ଯ୍ୟନ୍ତ ସର୍ବାଧିକ ତାପମାତ୍ରା। ଏହା ସ୍ବାଭାବିକ ତୁଳନାରେ ୬.୮ ଡିଗ୍ରୀ ଅଧିକ।
ପାଣିପାଗ ବିଭାଗ ୬ରୁ ୧୦ ଏପ୍ରିଲ ପର୍ଯ୍ୟନ୍ତ ଗୁଜୁରାଟର କିଛି ଅଞ୍ଚଳରେ ଗରମ ଲହରୀ ଆଶଙ୍କା ନେଇ ସତର୍କ କରିଛି। ବିଶେଷକରି ସୌରାଷ୍ଟ୍ର ଏବଂ କଚ୍ଛ ଅଞ୍ଚଳରେ ପରିସ୍ଥିତି ଅଧିକ ଗମ୍ଭୀର ହୋଇପାରେ। ଏହା ବ୍ୟତୀତ ହିମାଚଳ ପ୍ରଦେଶ, ହରିୟାଣା, ଚଣ୍ଡିଗଡ଼, ପଞ୍ଜାବ, ମଧ୍ୟ ପ୍ରଦେଶ ଏବଂ ପଶ୍ଚିମ ଉତ୍ତର ପ୍ରଦେଶର କିଛି ସ୍ଥାନରେ ମଧ୍ୟ ଗରମ ଲହରୀ ଅନୁମାନ କରାଯାଉଛି।
୧୦ ଏବଂ ୧୧ ଏପ୍ରିଲରେ ଉତ୍ତର ପ୍ରଦେଶ (ପୂର୍ବାଞ୍ଚଳ), ଝାଡ଼ଖଣ୍ଡ, ଛତିଶଗଡ଼ ଏବଂ ଓଡ଼ିଶାରେ ଗ୍ରୀଷ୍ମ ପ୍ରବାହ ସମ୍ଭାବନା ରହିଛି। ପାଣିପାଗ ବିଭାଗ ମଧ୍ୟ ଏହି ରାଜ୍ୟଗୁଡ଼ିକ ପାଇଁ ସତର୍କ ସୂଚନା ଜାରି କରିଛି।
ପ୍ରବଳ ଗରମ ପବନ ଏବଂ ଆର୍ଦ୍ରତା ଯୋଗୁଁ, ଲୋକମାନଙ୍କୁ ଅତିରିକ୍ତ ସତର୍କ ରହିବାକୁ ପରାମର୍ଶ ଦିଆଯାଇଛି। ଅପରାହ୍ନରେ ବାହାରକୁ ନ ଯିବା ଏବଂ ଅଧିକ ପାଣି ପିଇବାକୁ ନିର୍ଦ୍ଦେଶ ଦିଆଯାଇଛି।

The post ପାଣିପାଗ ବିଭାଗର ବଡ଼ ଚେତାବନୀ, ଡେଞ୍ଜର ଜୋନରେ ୨୧ ସହର! ପାରଦ ଡେଇଁଲା ୪୨ appeared first on Dharitri Odia News.