ପ୍ରଧାନମନ୍ତ୍ରୀଙ୍କ ‘ଧ୍ୟାନ’କୁ ନେଇ PMOଙ୍କୁ ନିର୍ବାଚନ ଆୟୋଗଙ୍କ ପରାମର୍ଶ, ଜାଣନ୍ତୁ କହିଛନ୍ତି କ’ଣ?

ନୂଆଦିଲ୍ଲୀ ୩୧।୫: ନିର୍ବାଚନ ଆୟୋଗ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ)କୁ ଏହା ସୁନିଶ୍ଚିତ କରିବାକୁ ପରାମର୍ଶ ଦେଇଛନ୍ତି ଯେ ନରେନ୍ଦ୍ର ମୋଦିଙ୍କ ଦୁଇ ଦିନ ପର୍ଯ୍ୟନ୍ତ ଚାଲିବାକୁ ଥିବା ଦୁଇ ଦିବସୀୟ ‘ଧ୍ୟାନ’ କାଳରେ ଆଦର୍ଶ ଆଚରଣ ସଂହିତା (ଏମସିସି)ର ଉଲ୍ଲଂଘନ ଯେପରି ନ ହୁଏ। ପିଏମଓ ପକ୍ଷରୁ ବୁଧବାର ଇସିଆଇଙ୍କୁ ମୋଦିଙ୍କ ଯୋଜନା ସମ୍ପର୍କରେ ‘ସୂଚିତ’ କରିବା ପରେ ନିର୍ବାଚନ ଆୟୋଗ ଏହି ପରାମର୍ଶ ଦେଇଛନ୍ତି। 

ଉଲ୍ଲେଖଯୋଗ୍ୟ ଯେ ବିରୋଧୀ ଦଳ କଂଗ୍ରେସ ନିର୍ବାଚନ ଆୟୋଗରେ ଅଭିଯୋଗ କରିଥିଲା ଯେ ‘କନ୍ୟାକୁମାରୀରେ ପ୍ରଧାନମନ୍ତ୍ରୀଙ୍କ ମେଡିଟେସନ ଅବକାଶ ଶନିବାର ଦେଶରେ ସପ୍ତମ ପର୍ଯ୍ୟାୟ ଭୋଟ ଗ୍ରହଣ ସହ ହେବ’। କଂଗ୍ରେସର କହିବା କଥା ଏହା ମତଦାନ ପୂର୍ବର ୪୮ ଘଣ୍ଟାର ମୌନ ଅବଧି ଓ ଆଚାର ସଂହିତାର ଉଲ୍ଲଂଘନ ଅଟେ। ଗଣମାଧ୍ୟମ ରିପୋର୍ଟ ଅନୁସାରେ ନିର୍ବାଚନ ଆୟୋଗଙ୍କ କହିବା କଥା ହେଉଛି ପ୍ରଧାନମନ୍ତ୍ରୀ ମୋଦିଙ୍କ ଯାତ୍ରା ନିମନ୍ତେ କୌଣସି ଅନୁମତିର ଆବଶ୍ୟକତା ନାହିଁ, କାରଣ ସେ କୌଣସି ଭାଷଣ ଦେଉ ନାହାନ୍ତି। 

ନିର୍ବାଚନ ଆୟୋଗ ଅଧିକାରୀ କହିଛନ୍ତି ଯେ ଏହି ପ୍ରକ୍ରିୟା ୨୦୧୯ ଲୋକସଭା ନିର୍ବାଚନ ଶେଷରେ ଆପଣାଯାଇଥିବା ପ୍ରକ୍ରିୟା ସହ ସମାନ। ଯେତେବେଳେ ମୋଦି ନିର୍ବାଚନର ଶେଷ ପର୍ଯ୍ୟାୟ ପୂର୍ବରୁ ମୌନ ଅବଧିରେ ବଦ୍ରିନାଥ ଓ କେଦାରନାଥକୁ ଏହିଭଳି ଯାତ୍ରା କରିଥିଲେ। ନିର୍ବାଚନ ଆୟୋଗ ଅଧିକାରୀ କହିଛନ୍ତି ଯେ ଆୟୋଗ ଗଣମାଧ୍ୟମକୁ ଏହା କହିପାରିବେନି ଯେ ସେ ଏହାର ରିପୋର୍ଟ ନ କରନ୍ତୁ। ତେବେ ସମସ୍ତଙ୍କ ପାଇଁ ସମାନ ଅବସର ସୁନିଶ୍ଚିତ କରାଯିବ, ଯାହା ଦ୍ୱାରା ରାଜ୍ୟ ସଂସାଧନ ପର୍ଯ୍ୟନ୍ତ କୌଣସି ପ୍ରକାର ଅନୁଚିତ ପହଞ୍ଚ ନ ହୁଏ ବୋଲି କହିଛନ୍ତି।