ପ୍ରାକୃତିକ ବିପର୍ଯ୍ୟୟ ମୁକାବିଲା ପାଇଁ ପରିଚିତ ନବୀନ, ୨୮ ବର୍ଷର ରାଜନୀତିରେ ୨୪ ବର୍ଷ ମୁଖ୍ୟମନ୍ତ୍ରୀ

ଭୁବନେଶ୍ବର : ନବୀନ ପଟ୍ଟନାୟକ। ଓଡ଼ିଶାର ସବୁଠାରୁ ଅଧିକ ସମୟର ମୁଖ୍ୟମନ୍ତ୍ରୀ । ଲଗାତର ୫ ଥର ମୁଖ୍ୟମନ୍ତ୍ରୀ । ଜାତୀୟ ରାଜନୀତିକୁ ଦେଖିଲେ ବି ଅଧିକ ସମୟ ଧରି ମୁଖ୍ୟମନ୍ତ୍ରୀ ରହିବାରେ ସେ ଅନ୍ୟତମ ନେତା। କେବଳ ତ୍ରିପୁରାର ପୂର୍ବତନ ମୁଖ୍ୟମନ୍ତ୍ରୀ ମାଣିକ ସରକାର ନବୀନ ପଟ୍ଟନାୟକଙ୍କଠାରୁ ଅଧିକ ସମୟ ମୁଖ୍ୟମନ୍ତ୍ରୀ ରହିଛନ୍ତି। ତେବେ ମୁଖ୍ୟମନ୍ତ୍ରୀ ପଦରେ ରହିବାର ରେକର୍ଡ ଅପେକ୍ଷା ଓଡ଼ିଶାର ବିକାଶରେ, ରାଜ୍ୟ ତଥା ଦେଶ ରାଜନୀତିରେ ଯେଉଁ ଛାପ ଛାଡ଼ିଛନ୍ତି ନବୀନ ପଟ୍ଟନାୟକ, ତାହା ଅନନ୍ୟ। ପ୍ରାୟ ୨୮ ବର୍ଷର ରାଜନୈତିକ କ୍ୟାରିଅରରେ ୨୪ ବର୍ଷ ସେ ମୁଖ୍ୟମନ୍ତ୍ରୀ ରହିଛନ୍ତି  । ୨୦୦୦ ମସିହାରୁ ୨୦୨୪ ଯାଏ ଓଡ଼ିଶା ରାଜନୀତିର କେନ୍ଦ୍ର ବିନ୍ଦୁ ଥିଲେ। ତେବେ ରାଜ୍ୟରେ ବିକାଶରେ ସେ ଯେଉଁ ଛାପ ଛାଡ଼ିଛନ୍ତି, ତାହା ହିଁ ତାଙ୍କୁ ଜନନାୟକ କରିଛି । ତିଆରି ହୋଇଛି ନବୀନ ବ୍ରାଣ୍ଡ । ୨୦୦୦ ମସିହାରେ ସେ ଯେତେବେଳେ ଓଡ଼ିଶାର ମୁଖ୍ୟମନ୍ତ୍ରୀ ହୋଇଥିଲେ, ସଦ୍ୟ ମହାବାତ୍ୟାରେ ଛାରଖାର ହୋଇଥିଲା ଉପକୂଳ ଓଡ଼ିଶା। ତା ସହିତ ମରୁଡ଼ି, ଅଭାବ ଅନାଟନ, ଅନାହାର, ଆର୍ଥିକ ଦୁର୍ଗତି ଦେଇ ଗତି କରୁଥିଲା ଓଡ଼ିଶା। ନବୀନଙ୍କ ଦୃଢ଼ ନେତୃତ୍ଵ ଓ ବିକାଶ ଦୃଷ୍ଟିକୋଣରୁ ଆଜି ଓ଼ଡ଼ିଶାର ଚେହେରା ବଦଳିଛି। ରାଜନୀତି, ଶିଳ୍ପ, କ୍ରୀଡ଼ା, ଆର୍ଥିକ ପ୍ରଗତି ସବୁ କ୍ଷେତ୍ରରେ ଆଗେଇଛି ଓଡ଼ିଶା। ସବୁବେଳେ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଥିବା ଓଡ଼ିଶା ପାଇଁ ସେ ତିଆରି କରିଥିଲେ ଏକ ଅସାଧାରଣ ଢାଞ୍ଚା। ଯେଉଁଥିରେ ଜିରୋ କାଜୁଆଲିଟି ଥିଲା ମୁଖ୍ୟ ଲକ୍ଷ୍ୟ । ଏଥିପାଇଁ ଅନ୍ତର୍ଜାତୀୟ ସ୍ତରରେ ବି ସ୍ଵୀକୃତି ମିଳିଛି। କ୍ଷମତାର ଅଳିନ୍ଦରେ ବି ନବୀନଙ୍କ ଷ୍ଟ୍ରାଟେଜି ଆଗରେ ହାର୍ ମାନିଛନ୍ତି ବହୁ ବଡ଼ ବଡ଼ ନେତା। ତାଙ୍କର ସାଦାସିଧା ଜୀବନଶୈଳୀ, ଧଳା କୁର୍ତ୍ତା ପାଇଜାମା ଓ କୋହ୍ଲାପୁରୀ ଚପଲ ହିଁ ତାଙ୍କର ବ୍ୟକ୍ତିତ୍ଵକୁ ଆହୁରି ପ୍ରସ୍ଫୁଟିତ କରେ। ରାଜନୀତିରେ ଏତେ ଦିନ ଧରି ଥିଲେ ବି କାହା ପ୍ରତି ତାଙ୍କର କୁତ୍ସାରଟନା ନାହିଁ । କଥା କମ୍‌, କାମ ବେଶି ହିଁ ତାଙ୍କର ମୂଳମନ୍ତ୍ର। ଏଥିପାଇଁ ତ ନବୀନ ପଟ୍ଟନାୟକ ଆଜି ଏତେ ଲୋକପ୍ରିୟ ଯେ ବିପକ୍ଷ ଦଳର ନେତା ବି ତାଙ୍କ ପାଇଁ ଭାରତ ରତ୍ନ ଦାବି କରୁଛନ୍ତି।

The post ପ୍ରାକୃତିକ ବିପର୍ଯ୍ୟୟ ମୁକାବିଲା ପାଇଁ ପରିଚିତ ନବୀନ, ୨୮ ବର୍ଷର ରାଜନୀତିରେ ୨୪ ବର୍ଷ ମୁଖ୍ୟମନ୍ତ୍ରୀ appeared first on .