ବଙ୍ଗୋପସାଗରରେ ଘୂର୍ଣ୍ଣିବଳୟ; ପ୍ରଭାବରେ ରାଜ୍ୟରେ ୪ଦିନ ବର୍ଷା, ବାହୁଡ଼ାରେ ଭିଜିବେ ମହାବାହୁ

ଭୁବନେଶ୍ୱର, ୧୫/୦୭: ଗାଙ୍ଗେୟ ପଶ୍ଚିମବଙ୍ଗ ଓ ପାଶ୍ୱବର୍ତ୍ତୀ  ଝାଡ଼ଖଣ୍ଡ ଏବଂ ଓଡ଼ିଶାରେ  ଏକ   ଘୂର୍ଣ୍ଣିବଳୟ ସୃଷ୍ଟି ହୋଇଛି । ଏହାର ପ୍ରଭାବରେ ରାଜ୍ୟରେ ୪ଦିନ ବର୍ଷା । ସୋମବାର ଦକ୍ଷିଣ ଓଡ଼ିଶା ଓ ଉତ୍ତର ଓଡ଼ିଶାର କିଛି ସ୍ଥାନରେ ପ୍ରବଳ ବର୍ଷା ହୋଇପାରେ । ନବରଙ୍ଗପୁର, ରାୟଗଡ଼ା, କୋରାପୁଟ, ନୂଆପଡ଼ା,  ବଲାଙ୍ଗୀର ଓ କଳାହାଣ୍ଡିରେ ପ୍ରବଳ ବର୍ଷା ହେବା ନେଇ ଭୁବନେଶ୍ବର ଅଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି ।  

ପାଣିପାଗ ବିଭାଗର ଆକଳନ  ଅନୁସାରେ, ବାହୁଡ଼ା ଦିନ ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓ ପଶ୍ଚିମ ଓଡ଼ିଶାରେ କାଁ ଭାଁ ବର୍ଷା ହୋଇପାରେ। କିନ୍ତୁ ଦକ୍ଷିଣ ଓ ଉତ୍ତର   ଓଡ଼ିଶାର କିଛି ସ୍ଥାନରେ ପ୍ରବଳ ବର୍ଷା ହେବ । ୧୭ ଓ ୧୮ ତାରିଖରେ ବି ଦକ୍ଷିଣ ଓଡ଼ିଶାର ଅଧିକାଂଶ ସ୍ଥାନରେ ବର୍ଷା  ଜାରି ରହିବ । 

ରବିବାର ରାଜ୍ୟର ବିଭିନ୍ନ ସ୍ଥାନରେ ସ୍ୱଳ୍ପ ପରିମାଣର ବର୍ଷା ହୋଇଥିଲା । ନବରଙ୍ଗପୁରରେ ୨୩ମି.ମି, ଟିଟିଲାଗଡ଼ରେ ୧୮ମି.ମି, ବଲାଙ୍ଗୀରରେ ୧୭.୫ମି.ମି, ଜଗତ୍‌ସିଂହପୁରରେ ୧୬.୪ମି.ମି,   ଖୋର୍ଦ୍ଧାରେ ୧୫ମି.ମି ଓ ବରଗଡ଼ରେ  ୧୨ମି.ମି ବର୍ଷା ରେକର୍ଡ କରାଯାଇଛି ।