ବଜେଟ୍ ଉପରେ ବିଚାର ନ କରି ପ୍ରତିଶ୍ରୁତି ଦିଅନି,ସରକାର ଦେବାଳିଆ ହୋଇଯିବ

କର୍ଣ୍ଣାଟକ ୦୧/୧୧: ଆର୍ଥିକ ସଂକଟ ଭିତରେ ପେଶି ହୋଇଗଲେଣି କର୍ଣ୍ଣାଟକ ସରକାର । ଏସବୁ ଭିତରେ ନିଜ ସରକାର ଉପରେ ବର୍ଷିଛନ୍ତି କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍‌ଗେ । ସିଧା ସିଧା କହିଛନ୍ତି ଯେତିକି ପୂରା କରିପାରିବ ସେତିକି ଗ୍ୟାରେଣ୍ଟି ଦିଅ । ନଚେତ ଦେବାଳିଆ ହୋଇଯିବ ସରକାର । ତେବେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍‌ଗେ ଘୋଷଣାପତ୍ର ଆଲୋଚନା ବେଳେ ଏଇ କଥା ଉଠାଇଛନ୍ତି । ଯେଉଁଥିରେ ସେ କର୍ଣ୍ଣାଟକର ୫ ଗ୍ୟାରେଣ୍ଟି କଥା ଉଠାଇଥିଲେ । ସେ ଦଳର ନେତାଙ୍କୁ କହିଥିଲେ ନିର୍ବାଚନ ସମୟରେ ୫ ଗ୍ୟାରେଣ୍ଟି କଥା କହିଥିଲ ହେଲେ ଏବେ ଗୋଟିଏ ଗ୍ୟାରେଣ୍ଟି ରଦ୍ଦ କରିବା କଥା କହୁଛ । ମନଇଚ୍ଛା ଏମିତି ଗ୍ୟାରେଣ୍ଟି ଦେବା ବଦଳରେ ବଜେଟ୍‌ ଅନୁସାରେ ଗ୍ୟାରେଣ୍ଟି ଦେବାକୁ ନିଜ ଦଳର ନେତାଙ୍କୁ ଚେତାଇ ଦେଇଛନ୍ତି ଖଡ୍‌ଗେ ।

ସେ ଆହୁରି କହିଛନ୍ତି ବଜେଟ୍‌ ଉପରେ ବିଚାର ନକରି ପ୍ରତିଶ୍ରୁତି ଦେଲେ ସରକାର ଦେବାଳିଆ ହୋଇଯିବ ।ସଡକ ଉପରେ ବାଲି ପକାଇବାକୁ ବି ପଇସା ପାଇବନି । ତେଣୁ ଏ ସରକାର ଯଦି ଅସଫଳ ହେବ ଏହାର ପ୍ରଭାବ ଆଗାମୀ ପିଢି ଉପରେ ପଡିବ । ସରକାର ଉପରେ ମଧ୍ୟ ଏହାର ପ୍ରଭାବ ପଡିବ । ତେଣୁ ବଜେଟ୍‌କୁ ଦେଖି ପ୍ରତିଶ୍ରୁତି ଦେବାକୁ ପରାମର୍ଶ ଦେଇଛନ୍ତି ଖଡ୍‌ଗେ । ଏଥର କର୍ଣ୍ଣାଟକ ନିର୍ବାଚନ ପାଇଁ  ୫ଟି ବଡ ଗ୍ୟାରେଣ୍ଟି ଦେଇଥିଲା କଂଗ୍ରେସ । ଏବେ ସେହି ପ୍ରତିଶ୍ରୁତିରୁ ଗୋଟିଏ ରଦ୍ଦ କରିବାକୁ ଚିନ୍ତା କରୁଛି ଦଳ । ଯାହାକୁ ନେଇ ଦଳ ଉପରେ ବିଗିଡି ଯାଇଛନ୍ତି ଖଡ୍‌ଗେ ।