ବନ୍ଦ ହେବ କି ଲାଞ୍ଚ ମାମଲା, ଆଦାନୀଙ୍କୁ ଏବେ ଟ୍ରମ୍ଫ୍‌ ଭରସା

ନୂଆଦିଲ୍ଲୀ: ଆଦାନୀ ଗ୍ରୁପ ଅଧ୍ୟକ୍ଷ ଗୌତମ ଆଦାନୀଙ୍କୁ ଆମେରିକା କୋର୍ଟରୁ ଲାଞ୍ଚ ମାମଲାରେ କୌଣସି ପ୍ରକାର ଆଶ୍ବସ୍ତି ମିଳିନାହିଁ। ସୌର ପ୍ରକଳ୍ପ ଚୁକ୍ତି ପାଇଁ ଆଦାନୀ ଭାରତୀୟ ଅଧିକାରୀଙ୍କୁ ଲାଞ୍ଚ ଦେଇଥିବାର ଅଭିଯୋଗ ହୋଇଛି। ଏହି ମାମଲାରେ ଆମେରିକା କୋର୍ଟ ଗୌତମ ଆଦାନୀ ଏବଂ ତାଙ୍କ ପୁତୁରା ସାଗର ଆଦାନୀଙ୍କ ବିରୋଧରେ ଗିରଫ ପରୱାନା ଜାରି କରିଛନ୍ତି। ଯଦିବା ତାଙ୍କ ବିରୋଧରେ ଆସିଥିବା ଅଭିଯୋଗକୁ ଭିତ୍ତିହୀନ ବୋଲି ଆଦାନୀ କହିଛନ୍ତି। ତେବେ ଆମେରିକାର କୋର୍ଟ ଆଦାନୀଙ୍କୁ କୋର୍ଟକୁ ଆସି ତାଙ୍କ ସ୍ପଷ୍ଟୀକରଣ ଦେବାକୁ କହିଛନ୍ତି। ଏହାର ଅର୍ଥ ହେଉଛି ଯଦି ଆଦାନୀ ଆମେରିକା ଯାଆନ୍ତି, ତେବେ ତାଙ୍କୁ ଗିରଫ କରାଯାଇପାରେ। ଏପରି ପରିସ୍ଥିତିରେ ତାଙ୍କର ବ୍ୟବସାୟ ଉପରେ ଏକ ପ୍ରତିକୂଳ ପ୍ରଭାବିତ ପଡିପାରେ। ଅନ୍ୟ କମ୍ପାନୀଗୁଡିକ ଏହାର ଫାଇଦା ନେଇପାରନ୍ତି। କିନ୍ତୁ ବର୍ତ୍ତମାନ ଆଦାନୀ ଏହି କ୍ଷେତ୍ରରେ ଏକ ଆଶାର କିରଣ ଦେଖୁଛନ୍ତି। କାରଣ ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଦାନୀଙ୍କ ତ୍ରାଣକର୍ତ୍ତା ହୋଇପାରନ୍ତି। ବାସ୍ତବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଟ୍ରମ୍ପଙ୍କ ବନ୍ଧୁତା ଅତ୍ୟନ୍ତ ଗଭୀର। ବ୍ଲୁମବର୍ଗ ରିପୋର୍ଟ ଅନୁଯାୟୀ ଆଦାନୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘନିଷ୍ଠ ସହଯୋଗୀ। ସେ ଦୃଷ୍ଟିରୁ ଟ୍ରମ୍ପ ଦାୟିତ୍ୱ ଗ୍ରହଣ କରିବା ପରେ ଆଦାନୀଙ୍କ ମାମଲା ଖାରଜ କରିଦେଇପାରନ୍ତି।

ଏଭଳି ପରିସ୍ଥିତିରେ ଭାରତ ଆଦାନୀଙ୍କ ପ୍ରତ୍ୟର୍ପଣକୁ ଆମେରିକା କୋର୍ଟରେ ଦୋଷୀ ସାବ୍ୟସ୍ତ କରିବାକୁ ଦେବନାହିଁ। ଏଭଳି ବିପଦ ଆସିବା ପୂର୍ବରୁ ମୋଦୀ ଟ୍ରମ୍ପଙ୍କ ଆଗରେ ଏହି ପ୍ରସଙ୍ଗ ଉଠାଇପାରିବେ। ଆସନ୍ତା ମାସରେ ଟ୍ରମ୍ପ ଶପଥ ଗ୍ରହଣ କରିବେ। ତେଣୁ ଟ୍ରମ୍ପ ପ୍ରଶାସନ ଆଦାନୀଙ୍କ ମାମଲାକୁ ଖାରଜ କରିବାକୁ ନିଷ୍ପତ୍ତି ନେଇପାରେ।