ବର୍ଡରରେ ଭାରତ-ବାଂଲାଦେଶ ଉତ୍ତେଜନା: ସେନା କଲା ବଡ଼ ଖୁଲାସା

ଢାକା,୨୯।୫: ଭାରତ ସରକାର ଦେଶରେ ରହୁଥିବା ଅବୈଧ ବାଂଲାଦେଶୀମାନଙ୍କୁ ଫେରାଇବା ପାଇଁ ଏକ ଅଭିଯାନ ଆରମ୍ଭ କରିଛନ୍ତି। ବାଂଲାଦେଶ ସରକାର ଦୀର୍ଘ ଦିନ ଧରି ନିଜ ନାଗରିକଙ୍କୁ ଭାରତରେ ଅବୈଧ ଭାବରେ ରହୁଛନ୍ତି ବୋଲି ଅସ୍ବୀକାର କରିଆସୁଛନ୍ତି। କିନ୍ତୁ ବର୍ତ୍ତମାନ ବାଂଲାଦେଶ ସେନାର ଏକ ବିବୃତ୍ତି ସ୍ପଷ୍ଟ କରିଛି ଯେ ଭାରତ ଦ୍ୱାରା ନିଆଯାଉଥିବା କାର୍ଯ୍ୟାନୁଷ୍ଠାନ ଉପଯୁକ୍ତ ଏବଂ ସଠିକ।

ବିଜିବି ମୁଖ୍ୟାଳୟର ଏକ ବିବୃତ୍ତିରେ କୁହାଯାଇଛି ଯେ ମେ 7 ତାରିଖ ପରଠାରୁ, ବିଭିନ୍ନ ସୀମାରୁ ଭାରତରୁ ଅତି କମରେ 1,053 ଜଣଙ୍କୁ ବାଂଲାଦେଶ ପଠାଯାଇଛି। ଏହି ବିବୃତ୍ତିରେ, ଏହା ସ୍ବୀକାର କରାଯାଇଛି ଯେ ଏହି ନାଗରିକମାନେ ବାଂଲାଦେଶୀ ଏବଂ ଭାରତରେ ରହୁଥିଲେ। ପୂର୍ବରୁ, ବାଂଲାଦେଶ ସରକାର ଭାରତର ଦାବିକୁ ପ୍ରତ୍ୟାଖ୍ୟାନ କରିଆସୁଛନ୍ତି।

ବିଜିବି ନିର୍ଦ୍ଦେଶକ ମେଜର ଜେନେରାଲ ମହମ୍ମଦ ଅଶରଫୁଜାମାନ ସିଦ୍ଦିକି ବାଂଲାଦେଶୀ ଗଣମାଧ୍ୟମକୁ କହିଛନ୍ତି ଯେ ଫ୍ଲାଗ ମିଟିଂ ଏବଂ କୂଟନୈତିକ ଚ୍ୟାନେଲ ମାଧ୍ୟମରେ ବାରମ୍ବାର ପ୍ରତିବାଦ ସତ୍ତ୍ୱେ, ବିଏସଏଫ ଏବଂ ଅନ୍ୟାନ୍ୟ ଭାରତୀୟ ଏଜେନ୍ସି ଦ୍ୱାରା ଏପରି ଘଟଣା ଦୁଃଖଦ ଭାବରେ ଜାରି ରହିଛି। ସେ କହିଛନ୍ତି, “ବିଜିବି ଉଚ୍ଚ ସତର୍କତାରେ ଅଛି ଏବଂ ସମ୍ବେଦନଶୀଳ ସୀମାବର୍ତ୍ତୀ ଅଞ୍ଚଳରେ ନଜର ଏବଂ ପାଟ୍ରୋଲିଂ ବୃଦ୍ଧି କରିଛି।” ତଥାପି, ଭାରତୀୟ ସେନା ଆଇନ ଏବଂ ମାନବାଧିକାରର କୌଣସି ଉଲ୍ଲଂଘନକୁ ଅସୱୀକାର କରିଛି। କିନ୍ତୁ ବାଂଲାଦେଶ ଭାରତୀୟ ଏଜେନ୍ସିଗୁଡ଼ିକ ବିରୁଦ୍ଧରେ ଗମ୍ଭୀର ଅଭିଯୋଗ ଜାରି ରଖିଛି।

ସିଦ୍ଦିକ ବୟାନରେ ସୱୀକାର କରିଛନ୍ତି ଯେ ଫେରାଇ ଦିଆଯାଇଥିବା ଲୋକଙ୍କ ମଧ୍ୟରୁ ଅନେକ ବାଂଲାଦେଶୀ ନାଗରିକ ଯେଉଁମାନେ ବର୍ଷ ବର୍ଷ ଧରି ଭାରତରେ ରହୁଥିଲେ। ସେ କହିଛନ୍ତି ଯେ ସେମାନଙ୍କର କିଛି ସନ୍ତାନ ଭାରତରେ ଜନ୍ମଗ୍ରହଣ କରିଥିଲେ ଏବଂ ସେମାନଙ୍କ ପାଖରେ ଭାରତୀୟ କାଗଜପତ୍ର ଥିଲା, ଯାହାକୁ ବଳପୂର୍ବକ ସେମାନଙ୍କଠାରୁ ଛଡ଼ାଇ ନିଆଯାଇଥିଲା। ତାଙ୍କ ବୟାନରୁ ସ୍ପଷ୍ଟ ହୋଇଛି ଯେ ବାଂଲାଦେଶୀ ଅବୈଧ ନାଗରିକମାନଙ୍କୁ ଭାରତ ଫେରାଇ ଦେଉଛି।

ବାଂଲାଦେଶ କହିଛି ଯେ ଏହି କ୍ଷେତ୍ରରେ ଏକପାଖିଆ କାର୍ଯ୍ୟାନୁଷ୍ଠାନ ଭୁଲ ଏବଂ ଉଭୟ ଦେଶ ପାଇଁ ଏହା ଉପରେ ଏକ ପାରସ୍ପରିକ ଚୁକ୍ତିନାମାରେ ପହଞ୍ଚିବା ଆବଶ୍ୟକ। କିନ୍ତୁ ଭାରତ ଏହାର ଦୃଢ଼ ରଣନୀତି ସହିତ ଦେଶର ସୁରକ୍ଷା ପାଇଁ ପଦକ୍ଷେପ ନେଇ ଚାଲିଛି।

The post ବର୍ଡରରେ ଭାରତ-ବାଂଲାଦେଶ ଉତ୍ତେଜନା: ସେନା କଲା ବଡ଼ ଖୁଲାସା appeared first on Dharitri Odia News.