ବିଶ୍ୱର ସବୁଠୁ ପୁରୁଣା ଲିପି ଠାବ, ପ୍ରାଚୀନ ଯୁଗର ଲୋକେ ଜାଣିଥିଲେ ଭାବ ବିନିମୟ ଟେକ୍ନୋଲୋଜି

ବିଶ୍ୱର ପ୍ରତ୍ନତତ୍ତ୍ୱବିତଙ୍କୁ ମିଳିଛି ଏକ ବଡ଼ ସଫଳତା। ଜନ୍ ହପକିନ୍ସ ବିଶ୍ୱବିଦ୍ୟାଳୟର ଗବେଷକମାନେ ୪ ହଜାର ୪୦୦ ବର୍ଷର ପୁରୁଣା ବର୍ଣ୍ଣମାଳା ବା ଆଲଫାବେଟ୍ ପାଇଛନ୍ତି, ଯାହାକୁ ପୂର୍ବ ସମୟର ଲୋକେ ବ୍ୟବହାର କରୁଥିଲେ। 

ଆମେରିକୀୟ ଅନୁସନ୍ଧାନକାରୀମାନେ ସିରିଆର ଏକ ସମାଧିରେ ଖୋଦିତ ଆଙ୍ଗୁଠି ଲମ୍ବ ମାଟି ସିଲିଣ୍ଡରରୁ ଏହି ଲିପି ପାଇଛନ୍ତି। ଏହାକୁ ଦୁନିଆର ସର୍ବ ପୁରାତନ ବର୍ଣ୍ଣମାଳା ଲେଖା ବୋଲି କୁହାଯାଉଛି। କାର୍ବନ-୧୪ ଡେଟିଂ ଟେକନିକ୍ ବ୍ୟବହାର କରି ଜନ୍ ହପକିନ୍ସ ବିଶ୍ୱବିଦ୍ୟାଳୟର ଅନୁସନ୍ଧାନକାରୀମାନେ ଏହି ସିଲିଣ୍ଡରର ଆରମ୍ଭ ବାବଦରେ ଜାଣିବାକୁ ପାଇଛନ୍ତି।

ମାଟି ସିଲିଣ୍ଡର

ଅନୁସନ୍ଧାନକାରୀଙ୍କ କହିବା ଅନୁସାରେ, ଏହି ସିଲିଣ୍ଡରଗୁଡିକ ଖ୍ରୀଷ୍ଟପୂର୍ବ ୨୪୦୦ ମସିହାରେ ସୃଷ୍ଟି କରାଯାଇଥିଲା, ଯାହାକି ଅନ୍ୟ ଜଣାଶୁଣା ବର୍ଣ୍ଣମାଳା ସ୍କ୍ରିପ୍ଟ ତୁଳନାରେ ପ୍ରାୟ ୫୦୦ ବର୍ଷ ପୁରୁଣା। ଏହା ବ୍ୟତୀତ ପ୍ରତ୍ନତତ୍ତ୍ୱବିତମାନେ ପ୍ରାରମ୍ଭିକ ବ୍ରୋଞ୍ଜ ଯୁଗରୁ କବର ଆବିଷ୍କାର କରିଥିଲେ, ଯେଉଁଥିରେ ୬ଟି କଙ୍କାଳ ସହିତ ସୁନା ଓ ରୁପା ଅଳଙ୍କାର, ରୋଷେଇ ସାମଗ୍ରୀ, ବର୍ଚ୍ଛା ଏବଂ କୁମ୍ଭାରଙ୍କ ମାଟି ପାତ୍ର ପାଇଛନ୍ତି। 

ଏହି ଅନୁସନ୍ଧାନ ସହ ଜଡ଼ିତ ପ୍ରତ୍ନତତ୍ତ୍ୱବିତ ସ୍କ୍ୱାର୍ଜ କହିଛନ୍ତି, "ଆଙ୍ଗୁଠି ଲମ୍ବର ମାଟି ସିଲିଣ୍ଡରରେ ଲେଖାଥିବା ବର୍ଣ୍ଣମାଳାରୁ ଜଣାଯାଉଛି ଯେ ପ୍ରାଚୀନ ସଭ୍ୟତାର ଲୋକମାନେ ଏକ ଭିନ୍ନ ସ୍ଥାନରେ ନୂତନ ଯୋଗାଯୋଗ ପ୍ରଯୁକ୍ତିବିଦ୍ୟା (କମ୍ୟୁନିକେସନ ଟେକ୍ନୋଲୋଜି)ର ପରୀକ୍ଷଣ କରିଥିଲେ, ଯାହା ଆମେ ପୂର୍ବରୁ କଳ୍ପନା କରିଥିଲୁ।" 

ଏହି ଆବିଷ୍କାର କେବଳ ପ୍ରାରମ୍ଭିକ ଲେଖା ପ୍ରଣାଳୀ ବିଷୟରେ ଆମର ବୁଝାମଣାକୁ ପୁନଃ ରୂପାନ୍ତର କରେ ନାହିଁ ବରଂ ପ୍ରାଚୀନ ସମାଜର ସାଂସ୍କୃତିକ ଏବଂ ବୈଷୟିକ ପ୍ରଗତି ବିଷୟରେ ମଧ୍ୟ ନୂତନ ଜ୍ଞାନ ଦିଏ ବୋଲି ସେ କହିଛନ୍ତି। 

ବାସ୍ତବରେ ଏହି ଆବିଷ୍କାର ୧୬ ବର୍ଷ ପୂର୍ବରୁ କରା ଯାଇଥିଲା। ସ୍କ୍ୱାର୍ଜ ନଭେମ୍ବର ୨୧ରେ ଆମେରିକାନ ସୋସାଇଟି ଅଫ୍ ଓଭରସିଜ୍ ରିସର୍ଚ୍ଚର ବାର୍ଷିକ ବୈଠକରେ ଏହି ଅନୁସନ୍ଧାନ ବାବଦରେ ଉପସ୍ଥାପନ କରିଥିଲେ, ଯାହା ପରେ ଇତିହାସର ଏହି ପୃଷ୍ଠା ସର୍ବ ସମ୍ମୁଖକୁ ଆସିଛି।