ବେଆଇନ ବନ୍ଧୁକ କାରବାର ମାମଲା: ଆଉ ଜଣେ ପେସାଦାର ଅପରାଧୀ ଗିରଫ

କଟକ,୧୭ା୩ (କାର୍ତ୍ତିକ ସାହୁ) ଜଗତପୁର ଥାନା ପୋଲିସ ବେଆଇନ ବନ୍ଧୁକ କାରବାର ମାମଲାରେ ଆଉ ଜଣେ ପେସାଦାର ଅପରାଧିକୁ ଗିରଫ କରି ରବିବାର କୋର୍ଟ ଚାଲାଣ କରିଛି। ଅଭିଯୁକ୍ତ ଜଣକ ହେଲେ ଢେଙ୍କନାଳ ସଦର ଥାନା ଅନ୍ତର୍ଗତ ଗୋବିନ୍ଦପ୍ରସାଦ ଗ୍ରାମର ପିଙ୍କୁ ଓରଫ ପ୍ରିୟବ୍ରତ ସାମଲ(୩୨)। ଅଭିଯୁକ୍ତ ନିକଟରୁ ଗୋଟିଏ ବନ୍ଧୁକ ଓ ଗୋଟିଏ କାର (ଓଡି-୦୫-ଏଏଫ୍‌-୯୧୨୧) ଜବତ କରାଯାଇଛି। ପିଙ୍କୁ ଜଣେ ପେସାଦାର ଅପରାଧି ହୋଇଥିବା ବେଳେ ଢେଙ୍କାନାଳ ସଦର ଥାନାରେ ତାଙ୍କ ନାମରେ ଏକାଧିକ ମାମଲା ରହିଛି। ଜଗତପୁର ଥାନାରେ ରୁଜୁ ହୋଇଥିବା କେସ୍‌ ନଂ ୧୪୭/୨୦୨୪ରେ ପୂର୍ବରୁ ଗିରଫ ହୋଇଥିବା ପିଣ୍ଟୁ ଓରଫ ପ୍ୟାରୀମୋହନ ଦାଶଙ୍କ ସହଯୋଗୀ ଭାବେ ଚୋରା ବନ୍ଧୁକ କାରବାର ସହ ସମ୍ପୃକ୍ତ ଅଛନ୍ତି। ଏହି କାରବାରର ମୁଖ୍ୟ ପିଣ୍ଟୁ ହୋଇଥିବା ବେଳେ ସେ ପିଙ୍କୁକୁ ମଧ୍ୟ ଏକ ଦେଶୀ ରିଭଲଭର ଦେଇଥିବା ପୋଲିସ ସୂଚନା ଦେଇଛି।
ସୂଚନାଯୋଗ୍ୟ ଯେ, ଜଗତପୁର ଥାନା ପୋଲିସ ଉପରୋକ୍ତ ମାମଲାରେ ବେଆଇନ ବନ୍ଧୁକ କାରବାର କରୁଥିବା ଗ୍ୟାଙ୍ଗର ତିନି ପେସାଦାର ଅପରାଧିଙ୍କୁ ଗତ ୧୧ ତାରିଖରେ ଗିରଫ କରି କୋର୍ଟ ଚାଲାଣ କରିଥିଲା। ସେମାନେ ହେଲେ ଲାଲବାଗ ଥାନା ସେକ ବଜାରର ପ୍ରକାଶ ବେହେରା ଓରଫ ବାବୁଆ (୪୨), ତିର୍ତ୍ତୋଲ ଥାନା ମଙ୍ଗଳା ସାହିର ପ୍ୟାରୀମୋହନ ଦାଶ ଓରଫ ପିଣ୍ଟୁ (୪୧) ଓ ତିର୍ତ୍ତୋଲ ଥାନା କେଉଳୋ ଗ୍ରାମର ମିହିର କୁମାର ରାୟ (୩୯)। ଅଭିଯୁକ୍ତମାନଙ୍କ ନିକଟରୁ ତିନୋଟି ପିସ୍ତଲ ଓ ଗୋଟିଏ ରିଭଲଭର ସହ ବାର ରାଉଣ୍ଡ ଜୀବନ୍ତ ଗୁଳି, ଦୁଇଟି ମୋଟର ସାଇକେଲ ଓ ତିନୋଟି ମୋବାଇଲ ଫୋନ ଜବତ କରାଯାଇଥିଲା।

The post ବେଆଇନ ବନ୍ଧୁକ କାରବାର ମାମଲା: ଆଉ ଜଣେ ପେସାଦାର ଅପରାଧୀ ଗିରଫ appeared first on Dharitri Odia News.