ଭାରତ କୌଣସି ଘଟଣାରେ ଗମ୍ଭୀର ନୁହେଁ – ସମାଲୋଚନା କରୁଛନ୍ତି ବିଶେଷଜ୍ଞ

ଡେସ୍କ: ତୁର୍କୀ ସହ ଭାରତର ନିରନ୍ତର ବାଣିଜ୍ୟିକ ଏବଂ କୂଟନୈତିକ ସମ୍ପର୍କକୁ ଜାତୀୟ ସୁରକ୍ଷା ବିଶେଷଜ୍ଞ ଏବଂ ନୀତି ସମୀକ୍ଷକମାନେ ତୀବ୍ର ସମାଲୋଚନା କରିଛନ୍ତି। ବିଶେଷକରି ପାକିସ୍ତାନ ସହିତ ଆଙ୍କାରାର ଗଭୀର ପ୍ରତିରକ୍ଷା ସମ୍ପର୍କ ଏବଂ କାଶ୍ମୀର ପ୍ରସଙ୍ଗରେ ଇସ୍ଲାମାବାଦର ଆଭିମୁଖ୍ୟକୁ ବାରମ୍ବାର ସମର୍ଥନ କରିବା ପରିପ୍ରେକ୍ଷୀରେ ଭାରତକୁ ସମାଲୋଚନାର ଶିକାର ହେବାକୁ ପଡିଛି।

ଭାରତର ସର୍ବବୃହତ ଏୟାରଲାଇନ୍ ଇଣ୍ଡିଗୋ ସହ ସହଭାଗିତାରୁ ତୁର୍କୀ ଏୟାରଲାଇନ୍ସ ବଡ଼ ଫାଇଦା ଉଠାଉଛି ବୋଲି ଏକ ରିପୋର୍ଟ ପ୍ରକାଶ ପାଇବା ପରେ ପ୍ରତିକ୍ରିୟା ତୀବ୍ର ହୋଇଥିଲା। ଇକୋନୋମିକ୍ ଟାଇମ୍ସର ଏକ ରିପୋର୍ଟ ଅନୁଯାୟୀ, ଦୀର୍ଘ ଦିନର ଚୁକ୍ତି ଅନୁଯାୟୀ ଏହି ଦୁଇ ବିମାନ କମ୍ପାନୀ ୩୦ରୁ ଅଧିକ ୟୁରୋପୀୟ ଏବଂ ଆମେରିକାର ଗନ୍ତବ୍ୟସ୍ଥଳକୁ ମିଳିତ ବିମାନ ଚଳାଚଳ କରୁଛନ୍ତି ଏବଂ ତୁର୍କୀ ଏୟାରଲାଇନ୍ସ ଅଧିକ ଲାଭ ହାସଲ କରିଛି।

ଅବଜର୍ଭର ରିସର୍ଚ୍ଚ ଫାଉଣ୍ଡେସନର ସିନିୟର ଫେଲୋ ସୁଶାନ୍ତ ସରିନ୍ ତୁର୍କୀ ସହ ଭାରତର ଚାଲିଥିବା ସହଯୋଗକୁ ତୀବ୍ର ବିରୋଧ କରିଛନ୍ତି। ଭାରତ କୌଣସି ଗମ୍ଭୀର ଦେଶ ନୁହେଁ। ଆମେ ସାପମାନଙ୍କୁ ଖାଇବାକୁ ଦେଇଥାଉ ଏବଂ ତା’ପରେ ଆଶ୍ଚର୍ଯ୍ୟ ହୋଇଥାଉ ଯେ ସେମାନେ ଆମକୁ କାହିଁକି କାମୁଡ଼ିଥାନ୍ତି ବୋଲି ସେ ରିପୋର୍ଟରେ ଲେଖିଛନ୍ତି। “ଆମେ ଆମର ଶତ୍ରୁମାନଙ୍କୁ ପୁରସ୍କୃତ କରୁ ଏବଂ ଆମର ବନ୍ଧୁମାନଙ୍କ ସହିତ ଖରାପ ବ୍ୟବହାର କରୁ। ତୁର୍କୀ ଭଳି ଦେଶ ଶତ୍ରୁତା ତ୍ୟାଗ କରିବେ ବୋଲି ଆମେ ନିଜକୁ ଭ୍ରମିତ କରୁଛୁ। ସେମାନେ ଆମଠାରୁ ଫାଇଦା ପାଆନ୍ତି ଏବଂ ପରେ ଆମକୁ ଖୋଲାଖୋଲି ଛୁରାମାଡ଼ କରନ୍ତି।

ଜାତୀୟ ନିରାପତ୍ତା ବନାମ ଅର୍ଥନୈତିକ କୂଟନୀତି ପ୍ରତି ଭାରତ ସରକାରଙ୍କ ଆଭିମୁଖ୍ୟକୁ ସମାଲୋଚନା କରିଛନ୍ତି ନବମ କ୍ୟାପିଟାଲର ପ୍ରତିଷ୍ଠାତା ତଥା ପରିଚାଳନା ନିର୍ଦ୍ଦେଶକ ରାଜୀବ ମନ୍ତ୍ରୀ। ସେ କହିଛନ୍ତି ଯେ ୩ରୁ ୪ ବର୍ଷ ତଳେ ତୁର୍କୀ ସ୍ପଷ୍ଟ କରିଦେଇଥିଲା ଯେ ଡ୍ରୋନ୍ ଭାରତକୁ ନୁହେଁ ବରଂ ପାକିସ୍ତାନକୁ ବିକ୍ରି କରାଯିବ।

ଗତ ରବିବାର ତୁର୍କୀର ୬ଟି ସାମରିକ ପରିବହନ ବିମାନ ପ୍ରତିରକ୍ଷା ସାମଗ୍ରୀ ପରିବହନ କରି ପାକିସ୍ତାନରେ ଅବତରଣ କରିବା ପରେ ଉତ୍ତେଜନା ବୃଦ୍ଧି ପାଇଛି। ଜମ୍ମୁ-କଶ୍ମୀରର ପହଲଗାମରେ ପାକିସ୍ତାନୀ ଆତଙ୍କବାଦୀ ସଂଗଠନ ଦ୍ୱାରା କରାଯାଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ସାଧାରଣ ନାଗରିକଙ୍କ ମୃତ୍ୟୁ ହେବାର କିଛି ଦିନ ପରେ ଏହି ଘଟଣା ଘଟିଛି।