ଭାରତରେ ପୁଣି ହେଉଛି କୋଭିଡ ସଂକ୍ରମଣ, ଏହି ସବୁ ରାଜ୍ୟରେ ବଢୁଛି ମାମଲା, ଦେଖନ୍ତୁ ସୂଚୀରେ ଆପଣଙ୍କ ରାଜ୍ୟ ନାହିଁ ତ?

ନୂଆଦିଲ୍ଲୀ ୨୧।୫: ଭାରତରେ ପୁଣି ଥରେ କୋଭିଡ-୧୯ ମାମଲା ବଢିବା ଆରମ୍ଭ ହୋଇଛି। କେତେକ ରାଜ୍ୟର ଗ୍ରାଫ ଏବେ ଉପରମୁହାଁ ହେଲାଣି। ବିଭିନ୍ନ ଏସିୟ ଦେଶ ସମେତ ହଂକଂ, ଥାଇଲ୍ୟାଣ୍ଡ, ସିଙ୍ଗାପୁର ଓ ଚୀନ ଭଳି ଦେଶର ସହରାଞ୍ଚଳରେ ସଂକ୍ରମଣ ବଢିବା ପରେ ଭାରତରେ ସଂକ୍ରମଣ ହୋଇଛି। କେନ୍ଦ୍ରୀୟ ସ୍ୱାସ୍ଥ୍ୟ ମନ୍ତ୍ରାଳୟଙ୍କ ଅନୁସାରେ କେରଳ, ମହାରାଷ୍ଟ୍ର ଓ ତାମିଲନାଡୁରେ ସବୁଠୁ ଅଧିକ ସକ୍ରିୟ ମାମଲା ସାମ୍ନାକୁ ଆସିଛି। 

ଉଲ୍ଲେଖଯୋଗ୍ୟ ଯେ ଏବେ ସାରା ଦେଶରେ ମୋଟ ୨୫୭ଟି ସକ୍ରିୟ ମାମଲା ରହିଛି। ତେବେ କେରଳରେ ସଂକ୍ରମିତଙ୍କ ସଂଖ୍ୟା ସବୁଠୁ ଅଧିକ ୯୫ ବୋଲି କୁହାଯାଇଛି। ଏଥି ମଧ୍ୟରେ ମହାରାଷ୍ଟ୍ରରେ ୫୬ ଓ ତାମିଲନାଡୁରେ ୬୬ଟି ମାମଲା ରେକର୍ଡ କରାଯାଇଛି। ଏହା ଛଡା ପୁଡୁଚେରୀ, ଦିଲ୍ଲୀ, ଗୁଜୁରାଟ, ରାଜସ୍ଥାନ, ସିକ୍କିମ, ହରିୟାଣା, କର୍ଣ୍ଣାଟକ ଓ ପଶ୍ଚିମବଙ୍ଗରେ ମଧ୍ୟ କୋଭିଡ ସଂକ୍ରମଣର ସୂଚନା ମିଳିଛି। ତେବେ ହେଉଥିବା ସଂକ୍ରମଣ ଖୁବ୍ ହାଲୁକା ଓ ଏଥିଯୋଗୁ ଏପର୍ଯ୍ୟନ୍ତ କୌଣସିଠାରେ ମୃତ୍ୟୁ ଅଭିଯୋଗ ହୋଇ ନାହିଁ। 

ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟଙ୍କ କୋଭିଡ-୧୯ ଡ୍ୟାସବୋର୍ଡ ଅନୁସାରେ ୧୨ ମେରୁ ସାରା ଭାରତରେ ୧୬୪ଟି କୋଭିଡ ମାମଲା ରେକର୍ଡ ହୋଇଛି। ଏଣୁ ସ୍ୱାସ୍ଥ୍ୟ ଅଧିକାରୀମାନେ ବୟଷ୍କ ଲୋକ, ଗର୍ଭବତୀ ମହିଳା ଓ ପୂର୍ବରୁ କୌଣସି ରୋଗରେ ଆକ୍ରାନ୍ତ ଥିଲେ ଲୋକଙ୍କୁ ମାସ୍କ ପିନ୍ଧିବା ଲାଗି ପରାମର୍ଶ ଦେଇଛନ୍ତି।  

ନୂଆ ଭାରିଆଣ୍ଟ ଜେଏନ.୧
ଏସିଆରେ କୋଭିଡ-୧୯ର ଏପରି ସଂକ୍ରମଣ ବୃଦ୍ଧି ପଛରେ ଜେଏନ.୧ ଓ ଏହାର ବଂଶଜ ଭାରିଆଣ୍ଟର ଉପସ୍ଥିତି ଦେଖାଯାଇଛି, ଯାହା ଓମିକ୍ରନ ବଂଶର ଉପପ୍ରକାର। ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଜେଏନ.୧କୁ ଭାରିଆଣ୍ଟ ଅଫ ଇଣ୍ଟରେଷ୍ଟ ବୋଲି କହିଛି। ତେବେ ଏ ପର୍ଯ୍ୟନ୍ତ ଏହାକୁ ଚିନ୍ତାର ଭାରିଆଣ୍ଟ କୁହାଯାଇ ନାହିଁ। ଏଥିରୁ ଜଣାପଡୁଛି ଅଧିକାରୀ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ତେବେ ଏହା ଅନ୍ୟ ଓମିକ୍ରନ ଉପପ୍ରକାର ଭଳି ଘାତକ ବୋଲି ଏ ପର୍ଯ୍ୟନ୍ତ କୌଣସି ଠାରେ କୁହାଯାଇ ନାହିଁ।