ଯୌନ ଉତ୍ପୀଡ଼ନ ମାମଲାରେ ଦୋଷୀ ସିଆରପିଏଫ ଅଧିକାରୀ ଚାକିରିରୁ ବିଦା, ଗୃହ ମନ୍ତ୍ରଣାଳୟ ଜାରି କଲା ଆଦେଶ

ନୂଆଦିଲ୍ଲୀ: କେନ୍ଦ୍ରୀୟ ରିଜର୍ଭ ପୋଲିସ ବଳର ଜଣେ ବରିଷ୍ଠ ଅଧିକାରୀଙ୍କ ବିରୋଧରେ ଯୌନ ଉତ୍ପୀଡ଼ନର ଅଭିଯୋଗ ଆସିଛି । ସୂତ୍ର ଅନୁସାରେ ସିଆରପିଏଫ ଡିଆଇଜିଙ୍କ ବିରୋଧରେ ଅସଦାଚରଣ ନେଇ ମହିଳାମାନେ ଅଭିଯୋଗ କରିଥିଲେ । ଅଭିଯୋଗ ପରେ ଅଧିକାରୀଙ୍କୁ ବହିଷ୍କାର କରାଯିବା ପାଇଁ ନିର୍ଦ୍ଦେଶ ଦିଆଯାଇଛି । ସରକାରୀ ଯାଞ୍ଚରେ ଅଭିଯୋଗର ସତ୍ୟତା ମିଳିବା ପରେ ୟୁପିଏସସିର ସୁପାରିସ ଏବଂ ଗୃହ ମନ୍ତ୍ରଣାଳୟର ମଞ୍ଜୁରୀ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଅନେକ ମହିଳା ସିଆରପିଏଫ କର୍ମୀ ଦ୍ୱାରା ଯୌନ ଉତ୍ପୀଡ଼ନର ଅଭିଯୋଗ ପରେ ଦେଶର ସବୁଠୁ ବଡ଼ ଅର୍ଦ୍ଧ ସାମରିକ ବାହିନୀ ୟୁପିଏସସିକୁ ଏକ ରିପୋର୍ଟ ଦେଇଥିଲା, ଯାହାପରେ ଏମଏଚଏ ତାଙ୍କୁ ବହିଷ୍କାର କରିବା ପାଇଁ ଅନୁରୋଧ କରିଥିଲା ।

ଜଣେ ବରିଷ୍ଠ ଅଧିକାରୀ ନ୍ୟୁଜ୍ ଏଜେନ୍ସି ଏଏନଆଇକୁ କହିଛନ୍ତି ଯେ ସିଆରପିଏଫ ସେହି ଅଧିକାରୀଙ୍କ ଆଚରଣ ଯାଞ୍ଚ କରିଥିଲା, ନିୟମ ଅନୁସାରେ ପ୍ରକ୍ରିୟା ପୂରା କରିଛି ଏବଂ ୟୁପିଏସସିକୁ ରିପୋର୍ଟ ପଠାଇଛି । ୟୁପିଏସସି ପରେ ସେବାରୁ ବହିଷ୍କାର ପାଇଁ ପରାମର୍ଶ ଦେଇଛି, ଯାହାକୁ ଗୃହ ମନ୍ତ୍ରଣାଳୟ ମଧ୍ୟ ମଞ୍ଜୁରୀ ଦେଇଛି । ଏହି ଆଧାରରେ ସିଆରପିଏଫ ବହିଷ୍କାର ପାଇଁ ନୋଟିସ୍ ଜାରି କରିଛି । ଉଲ୍ଲେଖଯୋଗ୍ୟ ଯେ ସିଆରପିଏଫର ମୁଖ୍ୟ ଖେଳ ଅଧିକାରୀ ହେବା ପୂର୍ବରୁ ଖଜାନ ସିଂ ୧୯୮୬ରେ ସିଓଲ ଏସିଆନ୍ ଖେଳରେ ୨୦୦ ମିଟର ବଟରଫ୍ଲାଇ ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରି ବ୍ରୋଞ୍ଜ ପଦକ ଜିତିଥିଲେ । ଉଲ୍ଲେଖଯୋଗ୍ୟ ଯେ ଏହି ପଦକ ଭାରତ ପାଇଁ ୧୯୫୧ ପରେ ଏହି ଖେଳରେ ପ୍ରଥମ ପଦକ ଥିଲା । 

ଖଜାନ ସିଂ ଏବେ ମୁମ୍ୱାଇରେ ମୁତୟନ ଅଛନ୍ତି । ଏହି ଘଟଣା ଉପରେ ତାଙ୍କ ଦ୍ୱାରା କୌଣସି ବୟାନ ଜାରି କରାଯାଇ ନାହିଁ । ତାଙ୍କୁ ବହିଷ୍କାର ନୋଟିସର ଜବାବ ଦେବା ପାଇଁ ୧୫ ଦିନର ସମୟ ଦିଆଯାଇଛି । ତାଙ୍କ ବିରୋଧରେ ଦୁଇଟି ଅଭିଯୋଗ ରହିଛି, ଯେଉଁଥିରୁ ଗୋଟିଏ ମାମଲାରେ ବହିଷ୍କାର କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି, ଅନ୍ୟ ମାମଲାର ତଦନ୍ତ ଚାଲିଛି । ସେ ପ୍ରଥମେ ଏହି ଅଭିଯୋଗକୁ ପୂରା ମିଛ କହି ଖଣ୍ଡନ କରିଥିଲେ ଏବଂ ଦାବି କରିଥିଲେ ଯେ ତାଙ୍କ ଛବିକୁ ମଳିନ କରିବା ପାଇଁ ଉଦ୍ୟମ କରାଯାଉଛି ।