ରାଷ୍ଟ୍ରପତି ପଦ ପାଇଁ ଟ୍ରମ୍ପ ଆଉ ପାଦେ ଆଗରେ

ଓ୍ବାଶିଂଟନ,୨୫ା୨: ଆମେରିକାର ରାଷ୍ଟ୍ରପତି ନିର୍ବାଚନ ଚଳିତ ବର୍ଷ ଆମେରିକାରେ ଅନୁଷ୍ଠିତ ହେବ। ଏହି ନିର୍ବାଚନରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ପ୍ରତିଦ୍ୱନ୍ଦ୍ୱୀଙ୍କୁ କଡ଼ା ଟକ୍କର ଦେଉଛନ୍ତି। ଦକ୍ଷିଣ କାରୋଲିନାରେ ଅନୁଷ୍ଠିତ ରିପବ୍ଲିକାନ ପ୍ରାଥମିକ ନିର୍ବାଚନରେ ଟ୍ରମ୍ପ ଜିତିଛନ୍ତି। ସେ ଦକ୍ଷିଣ କାରୋଲିନାର ପୂର୍ବତନ ଗଭର୍ନର ନିକ୍କି ହେଲିଙ୍କୁ ପରାସ୍ତ କରିଛନ୍ତି। ଏହାପୂର୍ବରୁ ପୂର୍ବତନ ରାଷ୍ଟ୍ରପତି ଆଇଓ୍ବା, ନ୍ୟୁ ହାମ୍ପସାୟର୍‌, ନେଭାଡା ଏବଂ ଆମେରିକାର ଭର୍ଜିନ ଆଇଲାଣ୍ଡରେ ଜିତିଥିଲେ। ଏବେ ଦକ୍ଷିଣ କାରୋଲିନାରେ ଜିତିଛନ୍ତି। ଏହି ବିଜୟ ସହିତ ଟ୍ରମ୍ପ ରାଷ୍ଟ୍ରପତି ଦୌଡ଼ରେ ଆଉ ପାଦେ ଆଗକୁ ବଢ଼ିଛନ୍ତି।

ପୂର୍ବତନ ରାଷ୍ଟ୍ରପତି ଟ୍ରମ୍ପଙ୍କ ବିଜୟ ୨୦୧୧ରୁ ୨୦୧୭ ପର୍ଯ୍ୟନ୍ତ ଦକ୍ଷିଣ କାରୋଲିନାର ପୂର୍ବତନ ଗଭର୍ନର ଥିବା ନିକ୍କି ହାଲିଙ୍କ ଉପରେ ଚାପ ବୃଦ୍ଧି କରିବ। ତେବେ ଦକ୍ଷିଣ କାରୋଲିନାରେ ପରାସ୍ତ ହେବା ପରେ ମାର୍ଚ୍ଚ ୫ ରେ ସେ ‘ସୁପର ମଙ୍ଗଳବାର’ ମାଧ୍ୟମରେ ରାଷ୍ଟ୍ରପତି ଦୌଡ଼ରେ ରହିବାକୁ ପ୍ରତିଶ୍ରୁତି ଦେଇଛନ୍ତି। ମାର୍ଚ୍ଚ ୫ରେ ହେବାକୁ ଥିବା ରିପବ୍ଲିକାନ ପ୍ରାଥମିକ ନିର୍ବାଚନ ପାଇଁ ସେ ସିଧାସଳଖ ମିଚିଗାନ ଯିବେ ବୋଲି ନିକ୍କି ହେଲି କହିଛନ୍ତି।

ଟ୍ରମ୍ପ ଏବଂ ତାଙ୍କର ସହଯୋଗୀମାନେ ଦାବି କରିଛନ୍ତି, ବାଇଡେନଙ୍କ ଶାସନରେ ଆମେରିକା ଦୁର୍ବଳ ହୋଇଯାଇଛି। ଏଥିସହ ସେ ବାଇଡେନଙ୍କୁ ଆଫଗାନିସ୍ତାନରେ ତାଲିବାନ ଫେରିବା ଏବଂ ୟୁକ୍ରେନରେ ଯୁଦ୍ଧ କରିଥିବା ଅଭିଯୋଗ କରିଛନ୍ତି। ବାଇଡେନ ତାଙ୍କର ଦ୍ୱିତୀୟ କାର୍ଯ୍ୟକାଳ ପାଇଁ ଅତ୍ୟଧିକ ପୁରୁଣା କି ବୋଲି ଟ୍ରମ୍ପ ପ୍ରଶ୍ନ କରିଛନ୍ତି।

ପୂର୍ବତନ ରାଷ୍ଟ୍ରପତିଙ୍କ ବିରୋଧରେ ପ୍ରଥମ ଆପରାଧିକ ମାମଲାର ଶୁଣାଣି ମାର୍ଚ୍ଚ ୨୫ରେ ନ୍ୟୁୟର୍କରେ ଆରମ୍ଭ ହେବ। ଯେଉଁଠାରେ ତାଙ୍କୁ ୨୦୧୬ର ଶେଷ ସପ୍ତାହରେ ପର୍ନ ଷ୍ଟାର୍‌ ଷ୍ଟର୍ମି ଡାନିଏଲ୍ସଙ୍କୁ ଟଙ୍କା ପ୍ରଦାନ ସହ ଜଡ଼ିତ ୩୪ଟି ସାମଲାର ସାମ୍ନା କରିବାକୁ ପଡ଼ିବ।

The post ରାଷ୍ଟ୍ରପତି ପଦ ପାଇଁ ଟ୍ରମ୍ପ ଆଉ ପାଦେ ଆଗରେ appeared first on Dharitri Odia News.