ରେପୋ ରେଟ୍ କମିବା ପରେ ଶସ୍ତା ହେଲା ହୋମ୍‌ ଲୋନ୍: କେଉଁ ବ୍ୟାଙ୍କ କେତେ କମାଇଲେ ?

ନୂଆଦିଲ୍ଲୀ: ଋଣ ଶସ୍ତା କରିବା ପାଇଁ ନିକଟରେ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ରେପୋ ରେଟ୍‌କୁ ୨୫ ବେସିସ୍ ପେଣ୍ଟ ହ୍ରାସ କରି ୬.୨୫ ପ୍ରତିଶତ କରିଥିଲା। ଫଳରେ ହୋମ ଲୋନ ନେଉଥିବା ଗ୍ରାହକଙ୍କୁ ସାମାନ୍ୟ ଆଶ୍ୱସ୍ତି ମିଳିଛି। ଆର୍‌ବିଆଇ ରେପୋ ରେଟ୍ ହ୍ରାସ କରିବା ପରେ ଦେଶର ବିଭିନ୍ନ ବ୍ୟାଙ୍କ ହୋମ ଲୋନ୍‌ କମାଇଛନ୍ତି। 

କେଉଁ ବ୍ୟାଙ୍କ କେତେ ଋଣ ହ୍ରାସ କରିଛି ଆସନ୍ତୁ ଜାଣିବା
୧. ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ- ରେପୋ ରେଟ୍ କାଟ ହେବା ପରେ ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ ହୋମ୍ ଲୋନ ହ୍ରାସ କରିଛି। ହୋମ୍ ଲୋନ ପାଇଁ ଏବେ ବ୍ୟାଙ୍କର ବାର୍ଷିକ ସୁଧ ହାର ୮.୧୦ ପ୍ରତିଶତରୁ ଆରମ୍ଭ ହେଉଛି।
୨. ସେଣ୍ଟ୍ରାଲ ବ୍ୟାଙ୍କ-  ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ ଭଳି ସେଣ୍ଟ୍ରାଲ ବ୍ୟାଙ୍କ ମଧ୍ୟ ହୋମ୍ ଲୋନ ଶସ୍ତା କରିଛି। ସେଣ୍ଟ୍ରାଲ ବ୍ୟାଙ୍କର ଗୃହ ଋଣର ବାର୍ଷିକ ସୁଧ ୮.୧୦ ପ୍ରତିଶତରୁ ଆରମ୍ଭ ହେଉଛି। 
୩. ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ- ରେପୋ ରେଟ କାଟ ହେବା ପରେ ଦେଶର ପ୍ରମୁଖ ବ୍ୟାଙ୍କଗୁଡ଼ିକ ଭଳି ଏସ୍‌ବିଆଇ ମଧ୍ୟ ଗ୍ରାହକଙ୍କୁ ଏହାର ଫାଇଦା ଦେଇଛି। ବ୍ୟାଙ୍କ ଏହାର ଫ୍ଲୋଟିଂ ହାର ଗୃହ ଋଣ ସୁଧ ହାରକୁ ୦.୨୫% ହ୍ରାସ କରିଛି। ବର୍ତ୍ତମାନ ଏସ୍‌ବିଆଇର ୮.୨୫%ର ସୁଧରୁ ଆରମ୍ଭ ହେଉଥିବା ଗୃହ ଋଣ ପ୍ରଦାନ କରୁଛି। ଯାହା ଏଚଡିଏଫ୍‌ସି ଓ ଆଇସିଆଇସିଆଇ ବ୍ୟାଙ୍କ ଠାରୁ ଅପେକ୍ଷାକୃତ ଶସ୍ତା।

ପଢନ୍ତୁ- ଦେଶର ଭଲ ଚାହୁଁଥିଲେ ଭାରତ ନିଜ ଉତ୍ପାଦନ ଉପରେ ଶୁଳ୍କ କମାଉ: ନୀତି ଆୟୋଗ ସିଇଓ

୪.ବ୍ୟାଙ୍କ ଅଫ୍ ବରୋଦା- ପଞ୍ଜାବ ନ୍ୟାସନାଲ୍ ବ୍ୟାଙ୍କ, କାନାଡ଼ା ବ୍ୟାଙ୍କ, ଏବଂ ଇଣ୍ଡିଆନ୍ ବ୍ୟାଙ୍କ: ଏହି ସମସ୍ତ ପବ୍ଲିକ ସେକ୍ଟର ବ୍ୟାଙ୍କର ଗୃହ ଋଣର ବାର୍ଷିକ ସୁଧ ହାର ୮.୧୫%ରୁ ଆରମ୍ଭ ହେଉଛି। ୨୦ ବର୍ଷ ପାଇଁ ୫୦  ଲକ୍ଷ ଟଙ୍କାର ଗୃହ ଋଣ ଉପରେ ମାସିକ ୪୨,୨୮୯ ଟଙ୍କା ଇଏମ୍‌ଆଇ ମିଳିବ। ଯାହା ଏସ୍‌ବିଆଇ ଠାରୁ ମଧ୍ୟ ଶସ୍ତା ରହୁଛି।  
୫. ବିଭିନ୍ନ ଘରୋଇ ବ୍ୟାଙ୍କ- ଉପରୋକ୍ତ ସରକାରୀ ପବ୍ଲିକ ସେକ୍ଟର ବ୍ୟାଙ୍କ ତୁଳନାରେ ଏଚ୍‌ଡିଏଫ୍‌ସି ବ୍ୟାଙ୍କ, ଆକ୍ସିସ୍ ବ୍ୟାଙ୍କ, କୋଟାକ୍ ମହିନ୍ଦ୍ରା ବ୍ୟାଙ୍କ ଏବଂ ଆଇସିଆଇସିଆଇ ବ୍ୟାଙ୍କ ଭଳି ଘରୋଇ ବ୍ୟାଙ୍କ ଗୁଡ଼ିକର ଗୃହ ଋଣର ସୁଧା ଅଧିକ ରହିଛି। ଏହି ଘରୋଇ ବ୍ୟାଙ୍କମାନେ ବାର୍ଷିକ ୮.୭୫% ଆରମ୍ଭ ସୁଧ ହାରରେ ଗୃହ ଋଣ ପ୍ରଦାନ କରୁଛନ୍ତି। ଏହି ହାରରେ ୨୦ ବର୍ଷ ପାଇଁ ୫୦  ଲକ୍ଷ ଟଙ୍କାର ଗୃହ ଋଣ ପାଇଁ ମାସିକ ୪୪,୧୮୫ଟଙ୍କା ଇଏମଆଇ ଦେବାକୁ ପଡ଼ିବ। ତେବେ ଧ୍ୟାନ ଦେବାର କଥା ଏହା ଯେ ବ୍ୟାଙ୍କମାନଙ୍କ ଦ୍ୱାରା ଦିଆଯାଉଥିବା ଗୃହ ଋଣର ସୁଧ ହାର ଗ୍ରାହକଙ୍କ କ୍ରେଡିଟ୍ ସ୍କୋର ଅନୁସାରେ ଭିନ୍ନ ଭିନ୍ନ ହୋଇଥାଏ।

ଗୃହ ଋଣ ନେବା ସମୟରେ ଏହି ୩ ଟି କଥା ମନେ ରଖନ୍ତୁ

ପ୍ରି-ପେମେଣ୍ଟ ପେନାଲ୍ଟି ବିଷୟରେ ନିଶ୍ଚୟ ଜାଣନ୍ତୁ- ଅନେକ ବ୍ୟାଙ୍କ ସମୟ ସୀମା ପୂର୍ବରୁ ଋଣ ପରିଶୋଧ କରି ଦେଲେ ଗ୍ରାହକଙ୍କ ଉପରେ ଜରିମାନା ଲଗାନ୍ତି। ଏପରି ପରିସ୍ଥିତିରେ, ବ୍ୟାଙ୍କଗୁଡ଼ିକ ଠାରୁ ଏ ବିଷୟରେ ସମ୍ପୂର୍ଣ୍ଣ ବିବରଣୀ ନେଇଯିବା ଉଚିତ୍। କାରଣ ସମୟ ପୂର୍ବରୁ ଋଣ ପରିଶୋଧ କଲେ, ବ୍ୟାଙ୍କଗୁଡ଼ିକୁ ଆଶାଠାରୁ କମ୍ ସୁଧ ମିଳେ। ଏପରି ପରିସ୍ଥିତିରେ, ସେମାନଙ୍କ ଦ୍ୱାରା କିଛି ନିୟମ ଏବଂ ସର୍ତ୍ତାବଳୀ ଲାଗୁ କରାଯାଏ। ତେଣୁ, ଗୃହ ଋଣ ନେବା ସମୟରେ, ଏ ବିଷୟରେ ସମ୍ପୂର୍ଣ୍ଣ ସୂଚନା ଜାଣିନିଅନ୍ତୁ।

ସିବିଲ ସ୍କୋର ଧ୍ୟାନ ରଖନ୍ତୁ- ସିବିଲ ସ୍କୋର ଜଣେ ବ୍ୟକ୍ତିଙ୍କ କ୍ରେଡିଟ୍ ଇତିହାସ ବତାଏ। ବ୍ୟକ୍ତିଗତ ଋଣ କ୍ଷେତ୍ରରେ, ବ୍ୟାଙ୍କଗୁଡ଼ିକ ନିଶ୍ଚିତ ଭାବରେ ଆବେଦନକାରୀଙ୍କ ସିବିଲ ସ୍କୋରକୁ ଚେକ୍ କରନ୍ତି। ଆୁ ଏହି କ୍ରେଡିଟ୍ ସ୍କୋର କିଛି ଖାସ୍‌ କ୍ରେଡିଟ୍ ପ୍ରୋଫାଇଲିଂ କମ୍ପାନୀ ଦ୍ୱାରା ନିର୍ଣ୍ଣୟ କରାଯାଏ। ଏଥିରେ, ଆପଣ ପୂର୍ବରୁ ଋଣ ନେଇଛନ୍ତି କି ନାହିଁ କିମ୍ବା ଆପଣ କ୍ରେଡିଟ୍ କାର୍ଡ କିପରି ବ୍ୟବହାର କରିଛନ୍ତି ଇତ୍ୟାଦି ଦେଖାଯାଏ। ଜଣେ ବ୍ୟକ୍ତିଙ୍କ କ୍ରେଡିଟ୍ ସ୍କୋର ସେ ପୂର୍ବରୁ କରିଥିବା ଋଣ ପରିଶୋଧ ଇତିହାସ, କ୍ରେଡିଟ୍ ବ୍ୟବହାର ଅନୁପାତ, ବର୍ତ୍ତମାନ ଥିବା ଋଣ ଏବଂ ସମୟାନୁସାରେ ବିଲ୍ ଭରିବା ଆଦିକୁ ବିଚାର କରି ନିର୍ଣ୍ଣୟ କରାଯାଏ। ସ୍କୋର ୩୦୦-୯୦୦ ମଧ୍ୟରେ ହୋଇଥାଏ। କିନ୍ତୁ ୭୦୦ କିମ୍ବା ତା’ଠାରୁ ଅଧିକ ସ୍କୋର ଥିଲେ ଭଲ।

ପଢନ୍ତୁ- ଡିଟିଏଚ୍ ବ୍ୟବସାୟକୁ ମିଶ୍ରଣ କରିବେ ଟାଟା ଓ ଏୟାରଟେଲ: ୩ କୋଟି ପହଞ୍ଚିବ ଗ୍ରାହକଙ୍କ ସଂଖ୍ୟା, ବଢ଼ିବେ କି ଟିଭି ଦର୍ଶକ ?

ଅଫର ଚେକ୍ କରନ୍ତୁ- ଋଣ ନେଉଥିବା ବ୍ୟକ୍ତିଙ୍କ ପାଇଁ ବ୍ୟାଙ୍କଗୁଡ଼ିକ ସମୟ ସମୟରେ ଭଲ ଅଫର ଦେଇଥାନ୍ତି। ଏପରି ପରିସ୍ଥିତିରେ, ଋଣ ନେବା ପୂର୍ବରୁ, ଆପଣଙ୍କୁ ସମସ୍ତ ବ୍ୟାଙ୍କର ଅଫର ବିଷୟରେ ଜାଣିବା ଉଚିତ। କାରଣ ଶୀଘ୍ର ଋଣ ନେବା ଆପଣଙ୍କ ପାଇଁ ଭୁଲ ପ୍ରମାଣିତ ହୋଇପାରେ। ଋଣ ନେବା ପୂର୍ବରୁ ସଠିକ୍ ଯାଞ୍ଚ କରନ୍ତୁ।