ଲଦାଖରେ ସ୍ଥାପନ ହେଲା ଏସିଆର ସବୁଠୁ ବଡ଼ ଟେଲିସ୍କୋପ୍, ଖୋଲିବ ବ୍ରହ୍ମାଣ୍ଡର ରହସ୍ୟ

ନୂଆଦିଲ୍ଲୀ: ଭାଭା ଅଟୋମିକ୍ ରିସର୍ଚ୍ଚ ସେଣ୍ଟର (BARC) ଏବଂ ଇଲେକ୍ଟ୍ରୋନିକ୍ସ କର୍ପୋରେସନ ଅଫ୍ ଇଣ୍ଡିଆ ଲିମିଟେଡ୍ ମିଳିତ ଭାବେ ଏସିଆର ସବୁଠୁ ବଡ଼ ଇମେଜିଂ ଟେଲିସ୍କୋପ ନିର୍ମାଣ କରିଛନ୍ତି । ଏହି ଟେଲିସ୍କୋପର ନାଁ ମେଜର ଆଟମସ୍ଫେରିକ ଚେରେନକୋଭ ଏକ୍ସପେରିମେଣ୍ଟ (MACE) ଦିଆଯାଇଛି । ଏହି ଟେଲିସ୍କୋପକୁ ଲଦାଖର ହାନଲେ ବେଦଶାଳାରେ ସ୍ଥାପନ କରାଯାଇଛି, ଯାହା ସମୁଦ୍ର ସ୍ଥଳରୁ ୪୩୦୦ ମିଟର ଉଚ୍ଚରେ ଅବସ୍ଥିତ ରହିଛି । ଏହି ଟେଲିସ୍କୋପ ସ୍ଥାପନ ଦ୍ୱାରା ବିଶ୍ୱ ସ୍ତରରେ ଭାରତକୁ କସ୍ମିକ-ରେ ରିସର୍ଚ୍ଚ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ସ୍ଥାନ ଦେଉଛି ।

MACE ଟେଲିସ୍କୋପର ଉଦ୍ଦେଶ୍ୟ ବ୍ରହ୍ମାଣ୍ଡର ସବୁଠାରୁ ଉର୍ଜାବାନ ଘଟଣାର ଅଧ୍ୟୟନ କରିବା, ଯାହା ଗାମା ରଶ୍ମି ରୂପେ ପ୍ରକଟ ହୋଇଥାଏ । ଏହି ଅତ୍ୟଧିକ ଉର୍ଜା ସମ୍ପନ୍ନ ରଶ୍ମି ବିଭିନ୍ନ ଖଗୌଳିକ ଘଟଣା, ଯେପରି ସୁପରନୋଭା ବିସ୍ଫୋରଣ ଏବଂ ବ୍ଲାକ୍ ହୋଲରୁ ଉତ୍ପନ୍ନ ହୋଇଥାଏ ।

ଅଟୋମିକ୍ ଏନର୍ଜି ବିଭାଗ ସଚିବ ଅଜିତ କୁମାର ମହାନ୍ତିଙ୍କ ଅନୁସାରେ, ଏହି ଟେଲିସ୍କୋପ ବୈଜ୍ଞାନିକଙ୍କୁ ଗାମା ରଶ୍ମିର ଗଭୀର ଅଧ୍ୟୟନ କରିବାରେ ସହାୟକ ହେବ । ଏହି ରଶ୍ମିର ଅଧ୍ୟୟନରୁ ବ୍ରହ୍ମାଣ୍ଡର ସଂରଚନା ଏବଂ ଏହା ଉତ୍ପତ୍ତି ଉପରେ ନୂଆ ସୂଚନା ମିଳିପାରିବ । ଯାହାଦ୍ୱାରା ମହାକଶ ବିଜ୍ଞାନ କ୍ଷେତ୍ରରେ ନୂଆ ଅନୁସନ୍ଧାନ ମାର୍ଗ ପ୍ରଶସ୍ତ ହେବ । ଏହି ପରିଯୋଜନା ଦ୍ୱାରା ବୈଜ୍ଞାନିକ ଅନୁସନ୍ଧାନକୁ ପ୍ରୋତ୍ସାହନ ମିଳିବା ସହ ଲଦାଖ କ୍ଷେତ୍ରର ସାମାଜିକ ଏବଂ ଆର୍ଥିକ ବିକାଶ ପାଇଁ ମଧ୍ୟ ଲାଭଦାୟକ ହେବ ।