ଶ୍ରୀଲଙ୍କା ନୌସେନାର ଗୁଳିମାଡ଼ରେ ୫ ଭାରତୀୟ ମତ୍ସ୍ୟଜୀବୀ ଆହତ, ହାଇକମିଶନରଙ୍କୁ ତଲବ କଲା ଭାରତ

ନୂଆଦିଲ୍ଲୀ: ଶ୍ରୀଲଙ୍କା ନୌସେନାର ଗୁଳିମାଡ଼ରେ ୫ ଭାରତୀୟ ମତ୍ସ୍ୟଜୀବୀ ଆହତ ହୋଇଛନ୍ତି । ଡେଲଫ୍ଟ ଦ୍ୱୀପ ନିକଟରେ ମଙ୍ଗଳବାର ସକାଳେ ଏହି ଗୁଳିମାଡ଼ ହୋଇଥିଲା । ୫ ଆହତଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଂକଟାପନ୍ନ ଥିବା କୁହାଯାଉଛି । ଏହି ଘଟଣା ପରେ ଭାରତର ବିଦେଶ ମନ୍ତ୍ରଣାଳୟ କଡ଼ା ପ୍ରତିକ୍ରିୟ ହେଇଛି  । ଏହି କାର୍ଯ୍ୟାନୁଷ୍ଠାନ ଉପରେ ଆନୁଷ୍ଠାନିକ ଆପତ୍ତି ଉଠାଇ ଶ୍ରୀଲଙ୍କାର କାର୍ଯ୍ୟକାରୀ ହାଇକମିଶନରଙ୍କୁ ତଲବ କରିଛି ।

ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି, ମଙ୍ଗଳବାର ସକାଳେ ଡେଲଫ୍ଟ ଦ୍ୱୀପ ନିକଟରେ ୧୩ ଜଣ ଭାରତୀୟ ମତ୍ସ୍ୟଜୀବୀଙ୍କୁ ଧରିବା ପାଇଁ ଶ୍ରୀଲଙ୍କା ନୌସେନା ଦ୍ୱାରା ଗୁଳିମାଡ଼ ଖବର ହସ୍ତଗତ ହୋଇଛି । ଏଭଳି ପଦକ୍ଷେପ ଅଗ୍ରହଣୀୟ । ଏମ୍‌ଇଏ କହିଛି, 'ମାଛ ଧରିବା ପାଇଁ ଯାଇଥିବା ଡଙ୍ଗାରେ ଥିବା ୧୩ ଭାରତୀୟ ମତ୍ସ୍ୟଜୀବୀଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ଜାଫନା ଟିଚିଙ୍ଗ ହସ୍ପିଟାଲରେ ଆହତଙ୍କ ଚିକିତ୍ସା ଚାଲିଛି । ଜାଫାନାରେ ଭାରତୀୟ ବାଣିଜ୍ୟ ଦୂତାବାସର ଅଧିକାରୀ ଆହତ ମତ୍ସ୍ୟଜୀବୀଙ୍କୁ ଭେଟି ଯଥାସମ୍ଭବ ସାହାଯ୍ୟ ପାଇଁ ପ୍ରତିଶ୍ରୁତି ଦେଇଛନ୍ତି ।'

ସୂଚନା ଅନୁସାରେ ମତ୍ସ୍ୟଜୀବୀମାନେ ପରୁଥି ଥୁରାଇ ନିକଟରେ ମାଛ ମାରୁଥିଲେ । ଏହି ସମୟରେ ଶ୍ରୀଲଙ୍କା ନୌସେନାର ପାଟ୍ରୋଲିଂ ବୋଟ୍ ଏମାନଙ୍କୁ ଘେରିଥିଲା । ମତ୍ସ୍ୟଜୀବୀମାନେ ଡଙ୍ଗାକୁ ତାମିଲନାଡ଼ୁ ଆଡ଼କୁ ନେବା ପାଇଁ ଉଦ୍ୟମ କରିବା ବେଳେ ନୌସେନା କଥିତ ରୂପେ ଗୁଳିମାଡ଼ କରିଥିଲା । ଶ୍ରୀଲଙ୍କା ନୌସେନା ସାମୁଦ୍ରିକ ସୀମା ପାର୍ କରିଥିବା ଅଭିଯୋଗରେ ମାଛମରା ଡଙ୍ଗା ଏବଂ ୧୩ ମତ୍ସ୍ୟଜୀବୀଙ୍କୁ ଗିରଫ କରିଛି । ଗିରଫ ମତ୍ସ୍ୟଜୀବୀଙ୍କୁ କାଙ୍ଗେସନ୍ତୁରଇ ପୋଲିସକୁ ହସ୍ତାନ୍ତର କରାଯାଇଛି ।