ହସ୍ ମନି କେସ୍ ମାମଲାରେ ବଢିଲା ଡୋନାଲ୍ଡ ଟ୍ରମ୍ପଙ୍କ ଅଡୁଆ, ଶପଥ ପୂର୍ବରୁ ହେବେ କୋର୍ଟରେ ହାଜର

ନୂଆଦିଲ୍ଲୀ ୦୪/୦୧: ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଡୁଆ ବଢିବାକୁ ଯାଉଛି । ୭୮ ବର୍ଷୀୟ ଟ୍ରମ୍ପ ଶପଥ ପୂର୍ବରୁ ଏକ ବଡ଼ ସଙ୍କଟର ସମ୍ମୁଖୀନ ହେବାକୁ ଯାଉଛନ୍ତି । ହସ୍ ମନି କେସ୍ ମାମଲାର ଶୁଣାଣି ପାଇଁ ଟ୍ରମ୍ପଙ୍କୁ କୋର୍ଟରେ ହାଜର ହେବାକୁ ପଡ଼ିପାରେ । ଜାନୁଆରୀ ୧୦ରେ କୋର୍ଟ ଏହି ଦଣ୍ଡ ଘୋଷଣା କରିବେ । ଏହି ସମୟ ମଧ୍ୟରେ ଟ୍ରମ୍ପଙ୍କୁ ନିଜେ କୋର୍ଟରେ ହାଜର ହେବାକୁ ପଡ଼ିବ। ତେବେ ଜେଲ ନ ଯିବାକୁ ବିଚାରପତି ସୂଚିତ କରିଛନ୍ତି। 

ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବାର ଦୁଇ ସପ୍ତାହ ତଳେ ଏହି କୋର୍ଟର ନିର୍ଦ୍ଦେଶ ଆସିଛି। ଜାନୁଆରୀ ୨୦ରେ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବେ । ଏହାପୂର୍ବରୁ ଟ୍ରମ୍ପ ପର୍ଣ୍ଣ ଷ୍ଟାରଙ୍କୁ ଟଙ୍କା ଦେବା ଅଭିଯୋଗକୁ ପ୍ରତ୍ୟାଖ୍ୟାନ କରି ଏହାକୁ ଏକ ରାଜନୈତିକ ଷଡଯନ୍ତ୍ର ବୋଲି କହିଥିଲେ । ନ୍ୟୁୟର୍କର ଜଜ୍ ଜୁଆନ୍ ମାର୍ଚେନ୍ ସୂଚାଇ ଦେଇଛନ୍ତି ଯେ ସେ ଟ୍ରମ୍ପଙ୍କୁ ଜେଲ ଦଣ୍ଡ କିମ୍ବା ଜୋରିମାନା ଦେବେ ନାହିଁ । ବରଂ ତାଙ୍କୁ 'ସର୍ତ୍ତମୂଳକ ମୁକ୍ତି' ଦେବେ। ସେ ତାଙ୍କ ଆଦେଶରେ ଲେଖିଛନ୍ତି ଯେ ନବ ନିର୍ବାଚିତ ରାଷ୍ଟ୍ରପତି ବ୍ୟକ୍ତିଗତ ଭାବରେ କିମ୍ବା ଶୁଣାଣି ପାଇଁ ହାଜର ହୋଇପାରିବେ ।

ଜଷ୍ଟିସ୍ ଜୁଆନ୍ ମାର୍ଚାନଙ୍କ ନିଷ୍ପତ୍ତି ମୁତାବକ ଟ୍ରମ୍ପଙ୍କୁ ଜାନୁଆରୀ ୨୦ରେ ଶପଥ ନେବାର ଠିକ୍ ୧୦ ଦିନ ପୂର୍ବରୁ କୋର୍ଟରେ ହାଜର ହେବାକୁ ପଡିବ, ଯାହା ଆମେରିକାର ଇତିହାସରେ ଏକ ଅଦ୍ଭୁତପୂର୍ବ ଘଟଣା । ଟ୍ରମ୍ପଙ୍କ ପୂର୍ବରୁ ଆମେରିକାର କୌଣସି ପୂର୍ବତନ କିମ୍ବା ବର୍ତ୍ତମାନର ରାଷ୍ଟ୍ରପତି ଏପରି ଅପରାଧରେ ଦୋଷୀ ସାବ୍ୟସ୍ତ ହୋଇ ନାହାଁନ୍ତି ।