ୟୁକ୍ରେନ ସହ ଯୁଦ୍ଧ ମଧ୍ୟରେ ପ୍ରଥମ ଥର ନରମିଲେ Russia ରାଷ୍ଟ୍ରପତି ପୁଟିନ

ମସ୍କୋ,୨୨।୪: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ସୋମବାର ଇରାନ ସହିତ ଏକ ଗୁରୁତ୍ୱପୂର୍ଣ୍ଣ ରଣନୈତିକ ସହଭାଗୀତା ଚୁକ୍ତିକୁ ଅନୁମୋଦନ କରିଛନ୍ତି। ପୂର୍ବରୁ, Russia ସଂସଦ ଏହି ଚୁକ୍ତିନାମାକୁ ଅନୁମୋଦନ କରିସାରିଛି। କ୍ରେମଲିନ ପକ୍ଷରୁ ଜାରି ଏକ ବିବୃତ୍ତିରେ ଏହି ସୂଚନା ଦିଆଯାଇଛି।
ଜାନୁଆରୀ ମାସରେ ଇରାନ ରାଷ୍ଟ୍ରପତି ମାସୁଦ ପେଜେଶକିୟାନ ମସ୍କୋ ଗସ୍ତ କରିବା ସମୟରେ ଏହି ଚୁକ୍ତି ହୋଇଥିଲା। ଏହି ଚୁକ୍ତିନାମାରେ ଜାତୀୟ ସୁରକ୍ଷା, ଶାନ୍ତିପୂର୍ଣ୍ଣ ପରମାଣୁ ଶକ୍ତିର ବ୍ୟବହାର ଏବଂ ପାଶ୍ଚାତ୍ୟ ଦେଶମାନଙ୍କ ଦ୍ୱାରା ଲାଗୁ ଏକପାଖିଆ କଟକଣା ବିରୁଦ୍ଧରେ ଏକାଠି କାମ କରିବା ଭଳି ଅନେକ ପ୍ରସଙ୍ଗରେ ଦୁଇ ଦେଶ ମଧ୍ୟରେ ସହଯୋଗ ବିଷୟରେ ଆଲୋଚନା କରାଯାଇଛି। କିନ୍ତୁ, ଏହି ଚୁକ୍ତିନାମାରେ ଏପରି କୌଣସି ବ୍ୟବସ୍ଥା ନାହିଁ ଯେ ଯଦି କୌଣସି ତୃତୀୟ ଦେଶରୁ ଆକ୍ରମଣ ହୁଏ ତେବେ ଉଭୟ ଦେଶ ମିଳିତ ଭାବରେ ପ୍ରତିଶୋଧ ନେବେ। ଏହି ଚୁକ୍ତିନାମାକୁ ଦୁଇ ଦେଶ ମଧ୍ୟରେ ରଣନୈତିକ ସମ୍ପର୍କକୁ ଆହୁରି ଗଭୀର କରିବା ଦିଗରେ ଏକ ବଡ଼ ପଦକ୍ଷେପ ଭାବରେ ବିବେଚନା କରାଯାଉଛି।
Russia ରାଷ୍ଟ୍ରପତି ଭ୍ଲାଦିମିର ପୁଟିନ ଶନିବାର ୩୦ ଘଣ୍ଟାର ଇଷ୍ଟର ଅସ୍ତ୍ରବିରତି ଘୋଷଣା କରିଥିଲେ କିନ୍ତୁ ରବିବାର (ଏପ୍ରିଲ ୨୦) ରେ ପୁଣି ସଂଘର୍ଷ ଆରମ୍ଭ ହୋଇଥିଲା। Russia ଏବଂ ୟୁକ୍ରେନ ପରସ୍ପର ଉପରେ ଅସ୍ତ୍ରବିରତି ଭଙ୍ଗ ପାଇଁ ଅଭିଯୋଗ କରୁଛନ୍ତି। ୟୁକ୍ରେନ ଆରମ୍ଭରୁ ଏହି ଅସ୍ତ୍ରବିରତିକୁ ‘ପ୍ରହସନ’ ବୋଲି ବର୍ଣ୍ଣନା କରିଆସୁଛି। ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସକି କହିଛନ୍ତି ଯେ ଯଦି Russia ଯୁଦ୍ଧବିରତି ଘୋଷଣା କରେ ତେବେ ୟୁକ୍ରେନ ମଧ୍ୟ ଶାନ୍ତିପୂର୍ଣ୍ଣ ରହିବ କିନ୍ତୁ ଯଦି ଆକ୍ରମଣ ହୁଏ ତେବେ ନିଶ୍ଚିତ ଭାବରେ ଜବାବ ଦିଆଯିବ। ଜେଲେନସ୍କି, ଆମେରିକା, ବ୍ରିଟେନ ଏବଂ ଫ୍ରାନ୍ସ ସହିତ ମିଶି ନିଃସର୍ତ୍ତ ଯୁଦ୍ଧବିରତି ଏବଂ ଶାନ୍ତି ବିଷୟରେ କଥା ହୋଇଛନ୍ତି। ତାଙ୍କର ବ୍ରିଟିଶ ପ୍ରଧାନମନ୍ତ୍ରୀ କୀର ଷ୍ଟାରମରଙ୍କ ସହ ମଧ୍ୟ ଭଲ ଆଲୋଚନା ହୋଇଥିଲା।

The post ୟୁକ୍ରେନ ସହ ଯୁଦ୍ଧ ମଧ୍ୟରେ ପ୍ରଥମ ଥର ନରମିଲେ Russia ରାଷ୍ଟ୍ରପତି ପୁଟିନ appeared first on Dharitri Odia News.