୧୪୭ ବର୍ଷ କ୍ରିକେଟ୍‌ ଇତିହାସରେ ପ୍ରଥମ ଖେଳାଳି ଭାବେ ଏମିତି ରେକର୍ଡ କଲେ ଆର୍‌. ଅଶ୍ୱିନ

ଚେନ୍ନାଇ,୨୦।୯: ଚେନ୍ନାଇରେ ଭାରତ ଏବଂ ବାଂଲାଦେଶ ମଧ୍ୟରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚରେ ରବିଚନ୍ଦ୍ରନ ଅଶ୍ୱିନ ବିଶ୍ୱ ରେକର୍ଡ ସୃଷ୍ଟି କରିଛନ୍ତି। ମ୍ୟାଚ୍‌ର ପ୍ରଥମ ଦିନରେ ସେ ନିଜ ଟେଷ୍ଟ କ୍ୟାରିୟରର ଷଷ୍ଠ ଶତକ ସ୍କୋର କରି ଏପର୍ଯ୍ୟନ୍ତ ଅପରାଜିତ ରହିଛନ୍ତି। ସେ ବ୍ୟାଟିଂରେ ନୁହେଁ ବରଂ ଅଲରାଉଣ୍ଡର ଭାବରେ ବିଶ୍ୱ ରେକର୍ଡ ସୃଷ୍ଟି କରିଛନ୍ତି। ୬ ଶତକ ବ୍ୟତୀତ ଅଶ୍ୱିନ ମଧ୍ୟ ତାଙ୍କ କ୍ୟାରିୟରରେ ୧୬ଟି ଅର୍ଦ୍ଧଶତକ ସ୍କୋର କରିଛନ୍ତି।
ଟେଷ୍ଟ କ୍ରିକେଟରେ ବ୍ୟାଟ୍ସମ୍ୟାନ ଭାବରେ ୨୦ ଥର ୫୦ କିମ୍ବା ଅଧିକ ସ୍କୋର କରିଥିବା ତଥା ବୋଲିଂରେ ୩୦ ରୁ ଅଧିକ ୫ ଉଇକେଟ ନେଇଥିବା ରବିଚନ୍ଦ୍ରନ ଅଶ୍ୱିନ ପ୍ରଥମ କ୍ରିକେଟର ହୋଇଛନ୍ତି। ଟେଷ୍ଟ କ୍ରିକେଟର ୧୪୭ ବର୍ଷ ପୁରୁଣା ଇତିହାସରେ ଏହା ପୂର୍ବରୁ କେବେ ହୋଇ ନ ଥିଲା, ତେଣୁ ଅଶ୍ୱିନ ଦୁନିଆର ପ୍ରଥମ କ୍ରିକେଟର ଭାବରେ ଏହା କରିଛନ୍ତି।

ବାଂଲାଦେଶ ବିପକ୍ଷ ମ୍ୟାଚ ଅଶ୍ୱିନଙ୍କ ଟେଷ୍ଟ କ୍ୟାରିୟରର ୧୦୧ ତମ ମ୍ୟାଚ ଅଟେ। ସେ ବ୍ୟାଟିଂରେ ୩,୪୦୦ରୁ ଅଧିକ ରନ ସଂଗ୍ରହ କରିଛନ୍ତି ଏବଂ ଏହି ସମୟ ମଧ୍ୟରେ ୬ ଶତକ ସ୍କୋର କରିବା ବ୍ୟତୀତ ସେ ୧୪ ଅର୍ଦ୍ଧଶତକ ହାସଲ କରିଛନ୍ତି। ବୋଲିଂରେ ସେ ଟେଷ୍ଟ ମ୍ୟାଚ୍‌ରେ ୩୬ରୁ ଅଧିକ ଥର ଗୋଟିଏ ଇନିଂସରେ ୫ କିମ୍ବା ଅଧିକ ଉଇକେଟ ନେଇଛନ୍ତି।

ଅଶ୍ୱିନ ଅଷ୍ଟମ ସ୍ଥାନ କିମ୍ବା ତା’ଠାରୁ କମ୍‌ରେ ବ୍ୟାଟିଂ କରି ୪ଟି ଶତକ ହାସଲ କରିଛନ୍ତି। ନ୍ୟୁଜିଲାଣ୍ଡର ପୂର୍ବତନ ଅଧିନାୟକ ଡାନିଏଲ ଭିଟୋରୀଙ୍କ ନାମରେ ୮ କିମ୍ବା ନିମ୍ନ କ୍ରମରେ ସର୍ବାଧିକ ଶତକ ସ୍କୋର କରିବାର ରେକର୍ଡ ରହିଛି। ଏହି ଅର୍ଡରରେ ବ୍ୟାଟିଂ କରୁଥିବା ବେଳେ ସେ ୫ ଶତକ ହାସଲ କରିଥିଲେ।

ରବିଚନ୍ଦ୍ରନ ଅଶ୍ୱିନ ତାମିଲନାଡୁରୁ ଆସିଛନ୍ତି ଏବଂ ତାଙ୍କ ଘରୋଇ ଗ୍ରାଉଣ୍ଡରେ ବ୍ୟାଟିଂ ରେକର୍ଡ ମଧ୍ୟ ବହୁତ ଭଲ। ବର୍ତ୍ତମାନ ପର୍ଯ୍ୟନ୍ତ ସେ ଚେନ୍ନାଇର ଏମ ଚିଦାମ୍ବରମ ଷ୍ଟାଡିୟମରେ ୫ଟି ଟେଷ୍ଟ ମ୍ୟାଚର ୭ ଇନିଂସରେ ୩୩୧ ରନ ସଂଗ୍ରହ କରିଛନ୍ତି। ଏଥିରେ ତାଙ୍କର ହାରାହାରି ୫୫ରୁ ଅଧିକ ରହିଛି। ଅନ୍ୟପକ୍ଷରେ ବୋଲିଂରେ ଚେନ୍ନାଇ ଷ୍ଟାଡିୟମରେ ପ୍ରଫେସର ଅଶ୍ୱିନ ଏପର୍ଯ୍ୟନ୍ତ ୩୦ରୁ ଅଧିକ ଉଇକେଟ ନେଇଛନ୍ତି।

The post ୧୪୭ ବର୍ଷ କ୍ରିକେଟ୍‌ ଇତିହାସରେ ପ୍ରଥମ ଖେଳାଳି ଭାବେ ଏମିତି ରେକର୍ଡ କଲେ ଆର୍‌. ଅଶ୍ୱିନ appeared first on Dharitri Odia News.