୧୯, ୧୦୬ ଜଣ ହିତାଧିକାରୀ ପାଇଲେ ବର୍ଦ୍ଧିତ ଭତ୍ତା

ଖୋର୍ଦ୍ଧା,୧୫ା୧(ପ୍ରଭାତ ପାଣିଗ୍ରାହୀ): ସାମାଜିକ ସୁରକ୍ଷା ଭତ୍ତା ୩୫୦୦ ଟଙ୍କାକୁ ବୃଦ୍ଧି ପାଇଲା। ମଧୁବାବୁ ଭତ୍ତା ଯୋଜନା ଓ ଜାତୀୟ ସାମାଜିକ ସୁରକ୍ଷା ଅଧୀନରେ ବୃଦ୍ଧାବୃଦ୍ଧଙ୍କୁ ମିଳିବ ଏହି ବର୍ଦ୍ଧିତ ଭତ୍ତା। ୮୦ ବର୍ଷରୁ ଅଧିକ ବରିଷ୍ଠ ନାଗରିକ ଏବଂ ୮୦ ପ୍ରତିଶତ କିମ୍ବା ତା’ଠାରୁ ଅଧିକ ବିକଳାଙ୍ଗ ଥିବା ଦିବ୍ୟାଙ୍ଗ ଏହା ଦ୍ବାରା ହେବେ ଉପକୃତ। ଖୋର୍ଦ୍ଧା ଜିଲାରେ ୧୯,୧୦୬ଜଣ ଏହି ବର୍ଦ୍ଧିତ ଭତ୍ତା ପାଇବେ। ଓଡ଼ିଶା ସରକାରଙ୍କ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ପକ୍ଷରୁ ଏହି ସୂଚନା ଦିଆଯାଇଛି।

ବୁଧବାର ସାମାଜିକ ସୁରକ୍ଷା ଓ ସଶକ୍ତିକରଣ ବିଭାଗ ଖୋର୍ଦ୍ଧା ଜିଲାର ବିଜେବି ହାଇସ୍କୁଲ ସମ୍ମିଳନୀ କକ୍ଷରେ ବର୍ଦ୍ଧିତ ଭତ୍ତା ବିତରଣ ସମାରୋହ ଅନୁଷ୍ଠିତ ହୋଇଯାଇଛି। ଅତିରିକ୍ତ ଜିଲାପାଳ ପ୍ରତାପ ଚନ୍ଦ୍ର ବେଉରାଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ବିଧାୟକ ପ୍ରଶାନ୍ତ ଜଗଦ୍ଦେବ ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଉଦ୍‌ଘାଟନ କରିଥିଲେ। ଜିଲା ପରିଷଦ ଉନ୍ନୟନ ଅଧିକାରୀ ଜ୍ୟୋତିଶଙ୍କର ସାହୁ, ଉପଜିଲାପାଳ ଦିପ୍ତୀରଞ୍ଜନ ସେଠୀ, ସିଡିଏମ୍‌ଓ ରାଜଶ୍ରୀ ପଟ୍ଟନାୟକ, ଜିଲା ସମାଜ ମଙ୍ଗଳ ଅଧିକାରୀ ସୁଷମା ପ୍ରହରାଜ, ଖୋର୍ଦ୍ଧା ପଞ୍ଚାୟତ ସମିତି ଅଧ୍ୟକ୍ଷା ରୁପଶ୍ରୀ ପ୍ରିୟଦର୍ଶିନୀ, ଏମ୍‌ପି ପ୍ରତିନିଧି ଦିଲ୍ଲୀପ ହୋତା, ଜିଲା ସାମାଜିକ ଓ ସୁରକ୍ଷା ଅଧିକାରୀ ଦିଲ୍ଲୀପ କୁମାର ଦିହାଲ, ଜିଲା ପଞ୍ଚାୟତ ଅଧିକାରୀ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ।

ବିଧାୟକ ଜଗଦ୍ଦେବ କହିଛନ୍ତି, ନିର୍ବାଚନ ସମୟରେ ଭାଜପା ସରକାର ଦେଇଥିବା ପ୍ରତିଶ୍ରୁତି ରଖିଛନ୍ତି। ସମସ୍ତ ସରକାରୀ ଯୋଜନା ଲୋକଙ୍କ ନିକଟରେ ପହଞ୍ଚିବ। ଲୋକଙ୍କ ସରକାର ଲୋକଙ୍କ ସୁଖଦୁଃଖ ସାଥୀ ଭାବେ ସମସ୍ତ ସୁବିଧା ସୁଯୋଗ ଯୋଗାଇ ଦେବେ। ଖୋର୍ଦ୍ଧାର ନବ ନିର୍ମାଣ ପାଇଁ ସମନ୍ବୟ, ସହଭାଗିତା ଜରୁରୀ ବୋଲି କହିଥିଲେ। ବୃଦ୍ଧ ମାତାପିତାଙ୍କୁ ପରିଣତ ବୟସରେ ହେୟଜ୍ଞାନ କରନାହିଁ। ସେମାନଙ୍କୁ ଯଥୋଚିତ ସମ୍ମାନ ଦେବେ ପ୍ରତ୍ୟେକ ଝିଅପୁଅଙ୍କ ନୈତିକ ଦାୟିତ୍ୱ।

ଅତିରିକ୍ତ ଜିଲାପାଳ କହିଛନ୍ତି , ବରିଷ୍ଠ ନାଗରିକ ପରିବାର, ସମାଜର ମାର୍ଗଦର୍ଶକ। ପିଲାମାନଙ୍କ ପଥପ୍ରଦର୍ଶକ। ତାଙ୍କୁ ଯଥୋଚିତ ସମ୍ମାନ ଦେବା ଉଚିତ। ବୃଦ୍ଧାବସ୍ଥାରେ ତାଙ୍କୁ ସମ୍ମାନର ସହ ବଞ୍ଚିବାର ଅଧିକାର ରହିଛି। ବରିଷ୍ଠ ନାଗରିକ ଭରଣପୋଷଣ, ସେବା ଶୁଶ୍ରୁଷା ପାଇଁ ବିଭିନ୍ନ ଯୋଜନା କରିଛନ୍ତି। ସେମାନଙ୍କୁ ହଇରାଣ କରିଲେ ଆଇନରେ ଦଣ୍ଡ ବିଧାନ ମଧ୍ୟ ରହିଛି। ବରିଷ୍ଠ ନାଗରିକ ସେବା ଶୁଶ୍ରୁଷା କରିବା ପ୍ରତ୍ୟେକଙ୍କ ଦାୟିତ୍ୱ ଏବଂ କର୍ତ୍ତବ୍ୟ। ରାମାୟଣ ଓ ମହାଭାରରେ ମଧ୍ୟ ବରିଷ୍ଠଙ୍କ ମାର୍ଗଦର୍ଶନକୁ ସମ୍ମାନ, ପରାମର୍ଶ ନେବା ଦେଖିବାକୁ ମିଳେ। ପ୍ରତ୍ୟେକଙ୍କ ଯୁବାବସ୍ଥା ପରେ ବୃଦ୍ଧାବସ୍ଥା ଆସିବ। ଏ ବୟସରେ ସେମାନଙ୍କ ଉପଯୁକ୍ତ ସେବା, ଯତ୍ନ ନେବା ପ୍ରତ୍ୟେକଙ୍କ ନୈତିକ ଦାୟିତ୍ୱ ବୋଲି ସେ କହିଥିଲେ।

The post ୧୯, ୧୦୬ ଜଣ ହିତାଧିକାରୀ ପାଇଲେ ବର୍ଦ୍ଧିତ ଭତ୍ତା appeared first on Dharitri Odia News.