୨୦୨୫ରୁ ସବୁ ସ୍ମାର୍ଟଫୋନ୍ରେ ଟାଇପ୍-ସି ଚାର୍ଜର
ନୂଆଦିଲ୍ଲୀ : ମୋବାଇଲ ଫୋନ୍ଗୁଡ଼ିକୁ ଚାର୍ଜ କରିବା ପାଇଁ ଅତ୍ୟାଧୁନିକ ଜ୍ଞାନକୌଶଳ ସମ୍ୱଳିତ ସି ପୋର୍ଟ ବ୍ୟବସ୍ଥାକୁ ୟୁରୋପୀୟ ସଂଘ (ଇୟୁ) ବାଧ୍ୟତାମୂଳକ କରିବା ପରେ ଭାରତ ମଧ୍ୟ ଅନୁରୂପ ବ୍ୟବସ୍ଥା ଆପଣାଇବ ବୋଲି ଜଣାପଡିଛି। ଗତ ଦୁଇ ବର୍ଷ ଧରି ଆପଲ୍ ଏବଂ ସାମସଙ୍ଗ ପରି କମ୍ପାନୀଗୁଡିକ ଫୋନ୍ ସହିତ ଆଡାପ୍ଟର ଯୋଗାଇବା ବନ୍ଦ କରି ଦେଇଛନ୍ତି। ଏଭଳି ପରିସ୍ଥିତିରେ ଉପଭୋକ୍ତାମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଭାରତରେ ଇଲେକ୍ଟ୍ରୋନିକ୍ସ ଡିଭାଇସ୍ଗୁଡିକରେ ଟାଇପ୍-ସି ପୋର୍ଟ ବ୍ୟବସ୍ଥା […]
ନୂଆଦିଲ୍ଲୀ : ମୋବାଇଲ ଫୋନ୍ଗୁଡ଼ିକୁ ଚାର୍ଜ କରିବା ପାଇଁ ଅତ୍ୟାଧୁନିକ ଜ୍ଞାନକୌଶଳ ସମ୍ୱଳିତ ସି ପୋର୍ଟ ବ୍ୟବସ୍ଥାକୁ ୟୁରୋପୀୟ ସଂଘ (ଇୟୁ) ବାଧ୍ୟତାମୂଳକ କରିବା ପରେ ଭାରତ ମଧ୍ୟ ଅନୁରୂପ ବ୍ୟବସ୍ଥା ଆପଣାଇବ ବୋଲି ଜଣାପଡିଛି। ଗତ ଦୁଇ ବର୍ଷ ଧରି ଆପଲ୍ ଏବଂ ସାମସଙ୍ଗ ପରି କମ୍ପାନୀଗୁଡିକ ଫୋନ୍ ସହିତ ଆଡାପ୍ଟର ଯୋଗାଇବା ବନ୍ଦ କରି ଦେଇଛନ୍ତି। ଏଭଳି ପରିସ୍ଥିତିରେ ଉପଭୋକ୍ତାମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଭାରତରେ ଇଲେକ୍ଟ୍ରୋନିକ୍ସ ଡିଭାଇସ୍ଗୁଡିକରେ ଟାଇପ୍-ସି ପୋର୍ଟ ବ୍ୟବସ୍ଥା ଆଣିବାକୁ ଏଥିପାଇଁ ବିଚାର କରାଯାଉଛି, କାରଣ ଅନେକ କମ୍ପାନୀ ସେମାନଙ୍କର ଲାପଟପ୍ ଏବଂ ମୋବାଇଲରେ ଏଭଳି ପୋର୍ଟ ଯୋଗାଉଛନ୍ତି। ଆସନ୍ତା ବର୍ଷ ଜୁନ୍ ମାସରୁ ଦେଶର ଫୋନ୍ ନିର୍ମାତାମାନେ ସେମାନଙ୍କର ଫୋନ୍ ଓ ଟାବଲେଟ୍ଗୁଡ଼ିକରେ କେବଳ ଟାଇଫ୍-ସି ବା ସି-ପୋର୍ଟ ଚାର୍ଜିଂ ବ୍ୟବସ୍ଥା ରଖିବାକୁ ସରକାର ସମୟ ଧାର୍ଯ୍ୟ କରିଛନ୍ତି।
ୟୁରୋପୀୟ ସଂଘ (ଇୟୁ) ପରି ଭାରତରେ ମଧ୍ୟ ବର୍ତ୍ତମାନ ଏକ ପ୍ରକାର ଡିଭାଇସ୍ ବା ଉପକରଣ ପାଇଁ କେବଳ ଏକ ପ୍ରକାର ଚାର୍ଜର ବ୍ୟବହାର କରାଯିବ। ଏହି ନିୟମ ୟୁରୋପୀୟ ସଂଘରେ ୨୦୨୨ ମସିହାରେ କାର୍ଯ୍ୟକାରୀ ହୋଇଛି। ବର୍ତ୍ତମାନ ଭାରତ ସରକାର ମଧ୍ୟ ଏଭଳି ଆଇନ କାର୍ଯ୍ୟକାରୀ କରିବାକୁ ପ୍ରସ୍ତୁତ ହେଉଛନ୍ତି। ରିପୋର୍ଟ ଅନୁଯାୟୀ, ୨୦୨୫ ମସିହାରୁ ଭାରତରେ ବିକ୍ରି ହୋଇଥିବା ସମସ୍ତ ମୋବାଇଲ୍ ଏବଂ ଟାବଲେଟ୍ ଏକ ସାଧାରଣ ଚାର୍ଜର ବ୍ୟବହାର କରିବ ଯାହା ୟୁଏସ୍ବି ଟାଇପ୍ ସି ହେବ। କୁହାଯାଉଛି ଯେ ଏହି ଆଇନ ଜୁନ୍ ୨୦୨୫ରୁ କାର୍ଯ୍ୟକାରୀ ହେବ। ଏହି ଅନୁସାରେ ଆସୁଥିବା ରିପୋର୍ଟ ଅନୁଯାୟୀ, ଦେଶରେ ବିକ୍ରି ହେଉଥିବା ସମସ୍ତ ଲାପଟପରେ ଟାଇପ୍-ସି ପୋର୍ଟ ଉପଲବ୍ଧ ହେବ। ବୈଶିଷ୍ଟ୍ୟ ଫୋନ୍, ଅଡିଓ ଉତ୍ପାଦ ଏବଂ ପରିଧାନ ଯୋଗ୍ୟ ଉତ୍ପାଦ ପାଇଁ ଏହି ନିୟମ ପ୍ରଯୁଜ୍ୟ ହେବନାହିଁ।
ରିପୋର୍ଟ ଅନୁଯାୟୀ, ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ (ମାଇଟି) ଖୁବ ଶୀଘ୍ର ଏହି ପ୍ରସଙ୍ଗରେ ଗ୍ୟାଜେଟ୍ କମ୍ପାନୀଗୁଡିକ ସହିତ ଚୂଡ଼ାନ୍ତ ଆଲୋଚନା କରିବାକୁ ଯାଉଛି। ଏହି ନିୟମ ଲାପଟପ୍ ପାଇଁ ମଧ୍ୟ ପ୍ରଯୁଜ୍ୟ ହେବ, କିନ୍ତୁ ଲାପଟପ୍ ପାଇଁ ଏହା ୨୦୨୬ରେ କାର୍ଯ୍ୟକାରୀ ହେବ। ତେବେ ବର୍ତ୍ତମାନ ପାଇଁ ହେଡ୍ଫୋନ୍ ଓ ଇୟରଫୋନ୍ ପାଇଁ ଏହା ଲାଗୁ ହେବନାହିଁ। ଏହି ନିୟମ ଲାଗୁ କରିବାର ମୁଖ୍ୟ କାରଣ ହେଉଛି ବୈଦ୍ୟୁତିକ ବର୍ଜ୍ୟବସ୍ତୁ ହ୍ରାସ କରିବା।
ଦେଶରେ ଇ-ବର୍ଜ୍ୟ ପରିମାଣ କମାଇବା ପାଇଁ ସରକାର ଏଭଳି ପଦକ୍ଷେପ ନେଇଛନ୍ତି। ସମ୍ପ୍ରତି ଏହି ଇ-ବର୍ଜ୍ୟ ଏକ ସମସ୍ୟା ଭାବେ ଉଭା ହୋଇଥିବା ବେଳେ ତାହାର କ୍ରମବର୍ଦ୍ଧିଷ୍ଣୁ ବୃଦ୍ଧିରେ ରୋକ୍ ଲଗାଇବା ପାଇଁ ବିଭିନ୍ନ ଦେଶ ପକ୍ଷରୁ ଏପରି ଦୃଢ଼ କଟକଣାମାନ ଲାଗୁ କରାଯାଉଛି। ଏହା ବ୍ତୀତ ଉପଭୋକ୍ତାମାନେ ମଧ୍ୟ ସୁବିଧା ପାଇବେ। ତାଙ୍କୁ ବିଭିନ୍ନ ଗ୍ୟାଜେଟ୍ ପାଇଁ ବିଭିନ୍ନ ଚାର୍ଜର କିଣିବା ଆବଶ୍ୟକ ନାହିଁ। ଅପରପକ୍ଷେ, ଅଳ୍ପ ମୂଲ୍ୟର ସାଧାରଣ ଫୋନ୍ ବ୍ୟବହାର କରୁଥିବା ନିମ୍ନ ବର୍ଗର ଗ୍ରାହକଙ୍କ ପାଇଁ ଏହା ସାମୟିକ ଭାବେ କଷ୍ଟକର ହେବ ନିଶ୍ଚୟ । ତେଣୁ ସମସ୍ତଙ୍କ ପାଇଁ ଏକ ପ୍ରକାର ଚାର୍ଜିଂ ବ୍ୟବସ୍ଥା କରାଇବା ଦ୍ୱାରା ବ୍ୟବହାରକାରୀମାନେ ଗୋଟିଏ ପ୍ରକାର ଚାର୍ଜରେ ସମସ୍ତ ଫୋନ୍ ସମେତ ଟାବଲେଟ୍, ଲାପଟପ୍ ଆଦି ଚାର୍ଜିଂ କରିପାରିବେ।
