Filpkartରୁ ଅଲଗା ହେଲେ କମ୍ପାନିର ଦୁଇ ପ୍ରତିଷ୍ଠାତା, ସଚିନଙ୍କ ପରେ ଏବେ ବିନ୍ନି ବଂଶଲ ଦେଲେ ଇସ୍ତଫା

ନୂଆଦିଲ୍ଲୀ: ଇ-କମର୍ସ ୱେବସାଇଟ୍ ଫ୍ଲିପକାର୍ଟର ସହ-ପ୍ରତିଷ୍ଠାତା ବିନ୍ନି ବଂଶଲ କମ୍ପାନି ବୋର୍ଡରୁ ଇସ୍ତଫା ଦେଇଛନ୍ତି । ଏହାସହ ବିନ୍ନି ବଂଶଲଙ୍କ ଫ୍ଲିପକାର୍ଟ ସହ ୧୬ ବର୍ଷର ଯାତ୍ରା ଶେଷ କରିଛନ୍ତି । ବିନ୍ନି କମ୍ପାନିରେ ନିଜ ଅଂଶଧନ ବିକ୍ରି କରିବାର ଗୋଟିଏ ମାସ ପରେ ଏହି ନିଷ୍ପତ୍ତି ନେଇଛନ୍ତି । କିଛି ବର୍ଷ ପୂର୍ବେ କମ୍ପାନିର ଅନ୍ୟ ଜଣେ ସହ-ପ୍ରତିଷ୍ଠାତା ସଚିନ ବଂଶଲ କମ୍ପାନିରୁ ବାହାର ହୋଇଥିଲେ । ବର୍ତ୍ତମାନ ସମୟରେ ସଚିନ ବଂଶଲ ଏକ ଫିନଟେକ୍ ଭେଞ୍ଚର ନଭି ପାଇଁ କାମ କରୁଛନ୍ତି । କମ୍ପାନିର ପରିଚାଳନା ୱାଲମାର୍ଟ ନିଜ ହାତକୁ ନେବା ପରେ ସଚିନ କମ୍ପାନିରୁ ଇସ୍ତଫା ଦେଇଥିଲେ । ଅନ୍ୟପଟେ ବିନ୍ନି ବଂଶଲଙ୍କ ଇସ୍ତଫା ଏପରି ସମୟରେ ଆସିଛି, ଯେତେବେଳେ ସେ ନିଜର ଏକ କମ୍ପାନି ଆରମ୍ଭ କରୁଥିବା ଚର୍ଚ୍ଚା ଚାଲିଛି ।

କମ୍ପାନିର ବୋର୍ଡରୁ ଇସ୍ତଫା ଦେଇ ବିନ୍ନି ବଂଶଲ ଅନେକ ଗୁରୁତ୍ୱପୂର୍ଣ୍ଣ କଥା କହିଛନ୍ତି । ସେ କହିଛନ୍ତି, 'ଗତ ୧୬ ବର୍ଷରେ ଫ୍ଲିପକାର୍ଟର ଉପଲବ୍ଧିରେ ମୁଁ ଗର୍ବିତ । ଫ୍ଲିପକାର୍ଟ ମଜଭୁତ ସ୍ଥିତିରେ ଅଛି । କମ୍ପାନି ପାଖରେ ଏକ ମଜଭୁତ ନେତୃତ୍ୱ ଏବଂ ଆଗକୁ ବଢିବା ପାଇଁ ସ୍ପଷ୍ଟ ରାସ୍ତା ଅଛି । ମୁଁ କହିପାରିବି ଯେ କମ୍ପାନି ସକ୍ଷମ ଲୋକଙ୍କ ହାତରେ ଅଛି'।

ପଢନ୍ତୁ: ୫ଜିକୁ ଆଗକୁ ବଢ଼ାଇବା ପାଇଁ ହାତ ମିଳାଇଲେ ରିଲାଏନ୍ସ ଜିଓ ଏବଂ ୱାନପ୍ଲସ୍ ଇଣ୍ଡିଆ

ଫ୍ଲିପକାର୍ଟ ବୋର୍ଡର ସଦସ୍ୟ ଲେହ ହପକିଂସ କହିଛନ୍ତି ଯେ ଆମେ ଭାଗ୍ୟାଶାଳୀ ଥିଲୁ ଯେ ୨୦୧୮ରେ ୱାଲମାର୍ଟର ନିବେଶ ପରଠୁ ବିନ୍ନି ବଂଶଲ ବୋର୍ଡରେ ରହିଥିଲେ । ତାଙ୍କ ପରାମର୍ଶ ଏହଂ ଦୂରଦର୍ଶିତା ଆମକୁ ଅନେକ ଲାଭ ପହଞ୍ଚାଇଛି । ଫ୍ଲିପକାର୍ଟର ସିଇଓ କଲ୍ୟାଣ କୃଷ୍ଣମୂର୍ତ୍ତି କହିଛନ୍ତି ଯେ ଆମେ ବିନ୍ନିଙ୍କୁ କୃତଜ୍ଞତା ଜଣାଉଛି । ତାଙ୍କ ଯୋଗୁଁ କମ୍ପାନିର ମଜଭୁତ ବିସ୍ତାର ହୋଇଛି । ଉଲ୍ଲେଖଯୋଗ୍ୟ ଯେ ୨୦୦୭ ମସିହାର ଫ୍ଲିପକାର୍ଟ ଆରମ୍ଭ ହୋଇଥିଲା । ଏହି କମ୍ପାନିକୁ ସଚିନ ଏବଂ ବିନ୍ନି ବଂଶଲ ଆରମ୍ଭ କରିଥିଲେ । ପ୍ରଥମେ ଏହାକୁ ବେଙ୍ଗାଲୁରୁର ଏକ ଆପାର୍ଟମେଣ୍ଟରୁ ଅନଲାଇନ୍ ବୁକଷ୍ଟୋର ରୂପେ ଆରମ୍ଭ କରାଯାଇଥିଲା । ପ୍ରାୟ ୧୬ ବର୍ଷ ପରେ ଆଜି ଫ୍ଲିପକାର୍ଟ ଦେଶର ବୃହତ ଇ-କମର୍ସ ୱେବସାଇଟ୍ ହୋଇଛି ।

The post Filpkartରୁ ଅଲଗା ହେଲେ କମ୍ପାନିର ଦୁଇ ପ୍ରତିଷ୍ଠାତା, ସଚିନଙ୍କ ପରେ ଏବେ ବିନ୍ନି ବଂଶଲ ଦେଲେ ଇସ୍ତଫା appeared first on Prameya News7.