L&T ଅଧ୍ୟକ୍ଷଙ୍କ ପରେ ଏବେ ଗୁଗଲ ନିଜ କର୍ମଚାରୀଙ୍କୁ ଦେଲା ପରାମର୍ଶ, କହିଲା- ୬୦ ଘଣ୍ଟା କାମ କର

ନୂଆଦିଲ୍ଲୀ: ଆର୍ଟିଫିସିଆଲ୍ ଜେନେରାଲ୍ ଇଣ୍ଟେଲିଜେନ୍ସିର ପ୍ରତିଦ୍ୱନ୍ଦ୍ୱୀତାରେ ଗୁଗଲ କାହାଠୁ ପଛରେ ରହିବା ପାଇଁ ଚାହୁଁନାହିଁ । ଏହି ଚିନ୍ତାରେ କମ୍ପାନିର ସହପ୍ରତିଷ୍ଠାତା ସର୍ଗି ବ୍ରିନ୍ ନିଜ କର୍ମଚାରୀଙ୍କୁ ସପ୍ତାହରେ ୬୦ ଘଣ୍ଟା କାମ କରିବା ଓ ପ୍ରତିଦିନ ଅଫିସ୍ ଆସିବା ପାଇଁ କହିଛନ୍ତି । ବ୍ରିନ୍ ଏକ୍ ଇଣ୍ଟରନାଲ୍ ମେମୋରେ କହିଛନ୍ତି ଯେ ଗୁଗଲ୍ ଏଆଇ ରେସ୍‌ରେ ବି ବିଜୟୀ ହୋଇପାରିବ, କିନ୍ତୁ ଏଥିପାଇଁ କର୍ମଚାରୀଙ୍କୁ ଅଧିକରୁ ଅଧିକ ପରିଶ୍ରମ କରିବାକୁ ପଡ଼ିବ ।

ଇନଫୋସିସ୍ ସହପ୍ରତିଷ୍ଠାତା ନାରାୟଣ ମୂର୍ତ୍ତି ସପ୍ତାହକୁ ୭୦ ଘଣ୍ଟା କାମ କରିବା ନେଇ ମତ ରଖିଥିଲେ । ତାଙ୍କ ପରେ ଏଲ୍ ଆଣ୍ଡ ଟି ଅଧ୍ୟକ୍ଷ ଏସ୍‌ଏନ୍ ସୁବ୍ରମଣ୍ୟନ ୯୦ ଘଣ୍ଟା କାମ କରିବା କଥା କହିଥିଲେ । ଏହି ପ୍ରସଙ୍ଗରେ ସୋସିଆଲ୍ ମିଡିଆରେ ବି ବଡ଼ ବିତର୍କ ହୋଇଥିଲା । ଏବେ ଗୁଗଲ୍ ନିଜ କର୍ମଚାରୀଙ୍କୁ ୬୦ ଘଣ୍ଟା କାମ କରିବା ପାଇଁ ପରାମର୍ଶ ଦେଇଛି ।

Also Read: ସପ୍ତାହରେ ୮୦-୯୦ ଘଣ୍ଟା କାମ କରିବାକୁ ପଡ଼ିବ, ନୀତି ଆୟୋଗର ପୂର୍ବତନ ସିଇଓ ଅମିତାଭ କାନ୍ତଙ୍କ ବୟାନରୁ ନୂଆ ବିତର୍କ

ବ୍ରିନ୍ ନିଜ କର୍ମଚାରୀଙ୍କୁ କହିଛନ୍ତି ଯେ ସବୁ ୱାର୍କିଂ ଦିନରେ ଅଫିସ୍ ଆସିବେ ଏବଂ ନିଜର ଉତ୍ପାଦତା ବୃଦ୍ଧି କରିବେ । ସେ କହିଛନ୍ତି ଯେ ସବୁ କର୍ମଚାରୀ ଅତି କମରେ ୬୦ ଘଣ୍ଟା କାମ କରିବାକୁ ପଡ଼ିବ । କିନ୍ତୁ ଯଦି ଏଠାରୁ ଅଧିକ କରିବେ ତେବେ ବର୍ନଆଉଟ୍ ହୋଇପାରେ । ବ୍ରିନ୍ କହିଛନ୍ତି ଯେ କିଛି କର୍ମଚାରୀ କମ କାମ କରୁଛନ୍ତି, ଯାହାଦ୍ୱାରା ଅନ୍ୟ ଟିମ୍‌ର ମନୋବଳ ଉପରେ ବି ଏହାର ପ୍ରଭାବ ପଡ଼ୁଛି । ଏହା ଟିମ୍ ପାଇଁ ଆଦୌ ଭଲ ଅଭ୍ୟାସ ନୁହେଁ ।

ଗୁଗଲ୍ ଏତେବଡ଼ ନିଷ୍ପତ୍ତି ନେବା ପଛର କାରଣ ହେଉଛି ଗୁଗଲ ଏଜିଆଇ ଟିମ୍ ଜେମିନି ଏଆଇ ଉପରେ କାମ କରୁଛି । ବ୍ରିନ୍‌ଙ୍କ ମତରେ, ଯଦି କର୍ମଚାରୀ ନିଜଆଡ଼ୁ ଅଧିକ ପରିଶ୍ରମ କରିବେ, ତେବେ ଗୁଗଲ ଏଆଇ ୱାର୍ଲଡକୁ ଲିଡ୍ କରିପାରିବ । AGIକୁ ନେଇ ପ୍ରତିଯୋଗିତା ଆରମ୍ଭ ହୋଇସାରିଛି, ଯାହାକୁ ଜିତିବା ପାଇଁ ଗୁଗଲ ପୂରା ଉଦ୍ୟମ କରୁଛି ।