Myanmar Earthquake: ଚମତ୍କାର! ୫ ଦିନ ପରେ ଭଙ୍ଗା ଘର ତଳୁ ଜୀବନ୍ତ ଉଦ୍ଧାର ହେଲେ ବ୍ୟକ୍ତି

ନାପିଦାଉ,୨।୪: ମ୍ୟାନମାରରେ ହୋଇଥିବା ଭୟଙ୍କର ଭୂମିକମ୍ପରେ ଭଗ୍ନାବଶେଷରେ ଫସି ରହିଥିବା ଲୋକଙ୍କୁ ଖୋଜାଖୋଜି ଏବେ ବି ଜାରି ରହିଛି। ଏହି କ୍ଷେତ୍ରରେ, ଉଦ୍ଧାରକାରୀମାନେ ଏକ ବଡ଼ ସଫଳତା ହାସଲ କରିଛନ୍ତି। ମ୍ୟାନମାରରେ ଘଟିଥିବା ଭୟଙ୍କର ଭୂମିକମ୍ପର ୫ ଦିନ ପରେ ବୁଧବାର ଏକ ହୋଟେଲର ଭଗ୍ନାବଶେଷରୁ ଜଣେ ବ୍ୟକ୍ତିଙ୍କୁ ଜୀବିତ ଉଦ୍ଧାର କରାଯାଇଛି ବୋଲି ଅଧିକାରୀମାନେ କହିଛନ୍ତି। ସୂଚନାଯୋଗ୍ୟ, ଏପର୍ଯ୍ୟନ୍ତ ଭୂମିକମ୍ପରେ ୨,୭୦୦ ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି।
ଦେଶର ଶାସକ ସେନା କହିଛି ଯେ ୨୬ ବର୍ଷୀୟ ଯୁବକଙ୍କୁ ମ୍ୟାନମାର ଏବଂ ତୁର୍କୀ ଉଦ୍ଧାରକାରୀଙ୍କ ଏକ ମିଳିତ ଦଳ ରାତି ପ୍ରାୟ ୧୨:୩୦ (ମଙ୍ଗଳବାର ୧୮୦୦ GMT) ରେ ରାଜଧାନୀ ନାୟପିଦାର ଏକ କୋଠାର ଧ୍ୱଂସାବଶେଷରୁ ଜୀବିତ ଉଦ୍ଧାର କରିଥିଲେ।
୭.୭ ତୀବ୍ରତାର ଭୟଙ୍କର ଭୂମିକମ୍ପ ପରେ ମ୍ୟାନମାରର ସ୍ବାସ୍ଥ୍ୟ ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି। ସୋମବାର ମୃତ୍ୟୁ ସଂଖ୍ୟା ୨,୭୦୦ ରୁ ଅଧିକ ହୋଇଥିବାବେଳେ ପ୍ରାୟ ୩,୯୦୦ ଲୋକ ଆହତ ହୋଇଛନ୍ତି ଏବଂ ୩୦୦ଜଣ ନିଖୋଜ ଅଛନ୍ତି ବୋଲି ରିପୋର୍ଟ ହୋଇଛି।
ସୂଚନାଯୋଗ୍ୟ, ଦେଶର ଦୁଇଟି ପ୍ରମୁଖ ସହରାଞ୍ଚଳ, ମାଣ୍ଡାଲେ ଏବଂ ନାପିଡାରେ ଭୂମିକମ୍ପ ପୀଡିତଙ୍କ ସଂଖ୍ୟା ବୃଦ୍ଧି ପାଉଛି। ଅଧିକାରୀମାନେ କହିଛନ୍ତି ଯେ ଡାକ୍ତରଖାନାଗୁଡ଼ିକ ସାଧାରଣତଃ ରୋଗୀରେ ପୂର୍ଣ୍ଣ ହୋଇଯାଏ, କିନ୍ତୁ ଏବେ ପରିସ୍ଥିତି ଆହୁରି ଖରାପ ହୋଇଯାଇଛି। ସ୍ଥାନ ଏବଂ ସମ୍ବଳର ଏକ ବିରାଟ ଅଭାବ ଅଛି, କିନ୍ତୁ କର୍ମଚାରୀଙ୍କ ସଂଖ୍ୟା ବହୁତ କମ ଥିଲେ ମଧ୍ୟ ସେମାନେ ନିଜର ସର୍ବୋତ୍ତମ ଚେଷ୍ଟା କରୁଛନ୍ତି।

The post Myanmar Earthquake: ଚମତ୍କାର! ୫ ଦିନ ପରେ ଭଙ୍ଗା ଘର ତଳୁ ଜୀବନ୍ତ ଉଦ୍ଧାର ହେଲେ ବ୍ୟକ୍ତି appeared first on Dharitri Odia News.