ଅଦିନିଆ ବର୍ଷା ସହ କୁଆପଥର ମାଡ ନଷ୍ଟ କରିଦେଇଛି ପନିପରିବା ଚାଷ, କେମିତି ସୁଝିବ କରଜ ଚିନ୍ତାରେ ଚାଷୀ

ବିନିକା ୨୩।୩: ସୁନାର ଫସଲକୁ ଉଜାଡି ଦେଇ ଯାଇଛି କାଳବୈଶାଖି ଅଦିନିଆ ବର୍ଷା ସହ କୁଆପଥର ମାଡ । ଏଭଳି ଦୃଶ୍ୟ ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ବିନିକା ଅଞ୍ଚଲରେ l ବିନିକା ଅଞ୍ଚଳରେ ଅଧିକାଂଶ ଲୋକେ ଧାନ ଚାଷ ସହ ପନିପରିବା ଚାଷ ଉପରେ ନିର୍ଭର କରିଥାନ୍ତି l ହେଲେ ଅନେକ ସମୟରେ ବର୍ଷାର ଅଭାବ ଯୋଗୁଁ କିମ୍ବା ଅଦିନିଆ ବର୍ଷା ପ୍ରଭାବରେ ଅନେକ ଚାଷୀ ବହୁ କ୍ଷତିଗ୍ରସ୍ତ ହୋଇଥାନ୍ତି ।

ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକର ଗ୍ରାମାଞ୍ଚଳର ଅନେକ ଲୋକେ ବିଭିନ୍ନ ପନିପରିବା ଚାଷ କରି ନିଜ ନିଜର ପରିବାର ପ୍ରତିପୋଷଣ କରିଥାନ୍ତି । ବିନିକା ସହର ଠାରେ ପ୍ରତ୍ୟେକ ଦିନ ବଜାର ବସିଥିବାରୁ ଆଖପାଖ ଗାଁର ଲୋକେ ବହୁମାତ୍ରାରେ ପନିପରିବା ଚାଷ କରି ଭଲ ଦୁଇପଇସା ରୋଜଗାର କରି ପରିବାର ପ୍ରତିପୋଷଣ କରିଥାନ୍ତି । କାଳବୈଶାଖୀ ସାଙ୍ଗକୁ ଅଦିନିଆ  ବର୍ଷା ଓ କୁଆପଥର ମାଡ ଯୋଗୁଁ ଫସଲ ନଷ୍ଟ ହୋଇଯାଇଛି l ଯେଉଁଥି ପାଇଁ ଚାଷୀମାନଙ୍କର ମେରୁଦଣ୍ଡ ଭାଙ୍ଗିଯାଇଛି ଏବଂ ଆର୍ଥିକ ସଂକଟରେ ପଡିଛନ୍ତି ଚାଷୀ ।

କାଳବୈଶାଖୀ ସହ ବର୍ଷା ଦ୍ୱାରା  ସବୁ ଫସଲ ପଚିଯାଇ ନଷ୍ଟ ହୋଇଯାଇଛି । ଗତ ତିନିଦିନ ଲଗାଣ ବର୍ଷା ପରେ ଫସଲକୁ ଅମଳ ପାଇଁ ବାଡିକୁ ଯିବା ପାଇଁ ଇଚ୍ଛା କରୁନି ଚାଷୀ, କାହିଁକି ନା ବାଡ଼ିରେ ଆଉ କିଛି ବି ପନିପରିବା ନାହିଁ । ସବୁ  ଉଜାଡି ଦେଇଛି ଅଦିନିଆ ବର୍ଷା । ଚାଷୀ ଟଙ୍କା ଧାର, କରଜ କରି ଚାଷ   କରିଥିଲେ । ହେଲେ ଏବେ ଚିନ୍ତାରେ ସେ କରଜ ସୁଝିବେ କେମିତି । ମୁଣ୍ଡରେ ହାତ ଦେଇ ବସିଛି ଚାଷୀ । ବିନିକା ଅଞ୍ଚଳରେ ପନିପରିବା ଚାଷ ସହ ଧାନ ଚାଷ ଉପରେ ମଧ୍ୟ ପ୍ରଭାବ ପକାଇଛି ଅଦିନିଆ ବର୍ଷା l ଧାନ ଚାଷ କରୁଥିବା ଚାଷୀ ଧାନ ଠିକ୍ ଭାବରେ ଅମଳ କରିବା ଆଶା ନେଇ ଔଷଧ କୀଟନାଶକ ସିଞ୍ଚନ କରିଥିଲା l ହେଲେ କିଛି ସମୟର କାଳବୈଶାଖୀ ଅଦିନିଆ ବର୍ଷା ସହ କୁଆପଥର ମାଡରେ ଧାନ ଗଛରେ ସିଞ୍ଚନ କରିଥିବା ଔଷଧ କୀଟନାଶକ ସବୁ ଧୋଇ ହୋଇଯାଇଛି l ଚାଷୀ ସୁନାର ଫସଲକୁ ବଞ୍ଚାଇବା ପାଇଁ ପୁଣି ନିଜ ଚାଷ ଜମିରେ ଔଷଧ କୀଟନାଶକ ପ୍ରୟୋଗ କରୁଥିବ ଚାଷୀ କହିଛନ୍ତି l 

You Can Read :

ଯୁବପିଢିଙ୍କ ଭବିଷ୍ୟତ ପାଇଁ ଅନେକ ପଦକ୍ଷେପ ନେଇଛନ୍ତି ମୁଖ୍ୟମନ୍ତ୍ରୀ : ବିଜେଡି