ଅର୍ଶଦୀପ ସିଂହଙ୍କ ଆହତ ପରେ ଭାରତୀୟ ଦଳରେ ଚେନ୍ନାଇ ସୁପର କିଙ୍ଗ୍ସର ଷ୍ଟାର ସାମିଲ

ମୁମ୍ବାଇ,୨୦।୭: ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (BCCI) ଚୟନ କମିଟି ଇଂଲଣ୍ଡ ଗସ୍ତରେ ଆହତ ହୋଇଥିବା ପେସର ଅର୍ଶଦୀପ ସିଂହଙ୍କ ସ୍ଥାନରେ ହରିୟାଣା ତଥା ଚେନ୍ନାଇ ସୁପର କିଙ୍ଗ୍ସର ପେସର ଆନଶୁଲ କାମ୍ବୋଜଙ୍କୁ ଦଳରେ ସାମିଲ କରିଛି। ଆଣ୍ଡରସନ-ତେନ୍ଦୁଲକର ଟ୍ରଫି ସିରିଜର ଚତୁର୍ଥ ଟେଷ୍ଟ ପୂର୍ବରୁ ଭାରତୀୟ ଦଳକୁ ବଡ଼ ଝଟକା ଲାଗିଛି। ମାଞ୍ଚେଷ୍ଟରରେ ଅନୁଷ୍ଠିତ ନେଟ୍ ଅଭ୍ୟାସ ସମୟରେ ଅର୍ଶଦୀପଙ୍କ ବୋଲିଂ ହାତରେ ଆଘାତ ଲାଗିଥିଲା, ଯେଉଁଥିପାଇଁ ସିଲେଇ କରାଯାଇଛି। ଫଳରେ, ସେ ମାଞ୍ଚେଷ୍ଟର ଟେଷ୍ଟରେ ଖେଳିବା ସମ୍ଭାବନା କ୍ଷୀଣ ରହିଛି। ସୂତ୍ର ଅନୁଯାୟୀ, ଚୟନ କମିଟି ତୁରନ୍ତ ନିଷ୍ପତ୍ତି ନେଇ ଅଂଶୁଲ କାମ୍ବୋଜଙ୍କୁ ଦଳରେ ସାମିଲ କରିଛି।

ଦଳ ପରିଚାଳନା ଏପର୍ଯ୍ୟନ୍ତ ଚତୁର୍ଥ ଟେଷ୍ଟରେ ଜସପ୍ରୀତ ବୁମରାଙ୍କୁ ଖେଳାଇବା ନେଇ ନିଷ୍ପତ୍ତି ନେଇନାହିଁ। ଅନ୍ୟ କିଛି ବୋଲରଙ୍କ ପ୍ରଦର୍ଶନ ପ୍ରଭାବଶାଳୀ ନହେବା କାରଣରୁ କାମ୍ବୋଜଙ୍କୁ ଦଳରେ ସାମିଲ କରିବା ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ବୋଲି ବିବେଚନା କରାଯାଉଛି।

ଅଂଶୁଲ କାମ୍ବୋଜ ଭାରତ A ବନାମ ଇଂଲଣ୍ଡ A ମଧ୍ୟରେ ହୋଇଥିବା ୨ ମ୍ୟାଚ ବିଶିଷ୍ଟ ଅନୌପଚାରିକ ଟେଷ୍ଟ ସିରିଜରେ ନିଜର ପ୍ରଦର୍ଶନ ଦ୍ୱାରା ଚୟନକର୍ତ୍ତାଙ୍କୁ ପ୍ରଭାବିତ କରିଥିଲେ। ଚେନ୍ନାଇ ସୁପର କିଙ୍ଗ୍ସର ଏହି ଷ୍ଟାର କେବଳ ଜଣେ ଚତୁର ବୋଲର ନୁହଁନ୍ତି, ବରଂ ବ୍ୟାଟରେ ମଧ୍ୟ ଉପଯୋଗୀ ପ୍ରମାଣିତ ହୋଇପାରନ୍ତି। ମୁଖ୍ୟ କୋଚ ଗୌତମ ଗମ୍ଭୀରଙ୍କର ବହୁମୁଖୀ ଖେଳାଳିଙ୍କୁ ପସନ୍ଦ କରିବାର ନିଷ୍ପତ୍ତିକୁ ଦୃଷ୍ଟିରେ ରଖି କାମ୍ବୋଜଙ୍କ ସାମିଲ ହେବା ଏକ ସ୍ୱାଭାବିକ ନିଷ୍ପତ୍ତି ବୋଲି କୁହାଯାଉଛି।

ଭାରତୀୟ ଦଳ ପରିଚାଳନା ଓ ଜାତୀୟ ଚୟନ କମିଟି ମଧ୍ୟରେ ହୋଇଥିବା ଚୁକ୍ତି ଅନୁଯାୟୀ, ଜସପ୍ରୀତ ବୁମରାଙ୍କୁ କାର୍ଯ୍ୟଭାର ନିୟନ୍ତ୍ରଣ ପାଇଁ ୫ ଟେଷ୍ଟ ମଧ୍ୟରୁ କେବଳ ୩ଟି ଖେଳିବାକୁ ନିଷ୍ପତ୍ତି ହୋଇଛି। ପ୍ରଥମ ଟେଷ୍ଟରେ ବୁମରା ପ୍ରଥମ ଇନିଂସରେ ୫ ଓ୍ଵିକେଟ ନେଇଥିଲେ। ଦ୍ୱିତୀୟ ଟେଷ୍ଟରେ ତାଙ୍କ ସ୍ଥାନରେ ଆକାଶ ଦୀପ ଖେଳିଥିଲେ। ତୃତୀୟ ଟେଷ୍ଟରେ ବୁମରା ଫେରି ଦ୍ୱିତୀୟ ଇନିଂସରେ ୫ ଓ୍ଵିକେଟ ନେଇଥିଲେ, କିନ୍ତୁ ଭାରତ ୨୨ ରନରେ ପରାସ୍ତ ହୋଇଥିଲା।

ଅର୍ଶଦୀପ ଏପର୍ଯ୍ୟନ୍ତ ଟେଷ୍ଟ ଡେବ୍ୟୁ କରିନାହାନ୍ତି, କିନ୍ତୁ ସେ ୮ଟି ଦିନିକିଆ ଏବଂ ୬୩ଟି ଟି 20 ଖେଳିଛନ୍ତି। ତାଙ୍କର ୨୧ଟି ପ୍ରଥମ ଶ୍ରେଣୀ ମ୍ୟାଚ ଖେଳିବାର ଅଭିଜ୍ଞତା ମଧ୍ୟ ରହିଛି।

ଅଫିସିଆଲ ଘୋଷଣା ଏପର୍ଯ୍ୟନ୍ତ ହୋଇନଥିଲେ ମଧ୍ୟ, ଯଦି ବୁମରାଙ୍କୁ ମାଞ୍ଚେଷ୍ଟର ଟେଷ୍ଟରେ ବିଶ୍ରାମ ଦିଆଯାଏ, ତେବେ ଭାରତୀୟ ଦଳ ଆନଶୁଲ କାମ୍ବୋଜ, ଶାର୍ଦୁଲ ଠାକୁର କିମ୍ବା ପ୍ରସିଦ୍ଧ କ୍ରିଷ୍ଣାଙ୍କ ମଧ୍ୟରୁ ଜଣେଙ୍କୁ ବାଛିବ। ଏହି ଘଟଣା ଭାରତୀୟ ଦଳର ବୋଲିଂ ରଣନୀତିରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିପାରେ, ଏବଂ ସମସ୍ତଙ୍କ ନଜର ଏବେ ଓଲ୍ଡ ଟ୍ରାଫୋର୍ଡରେ ଅନୁଷ୍ଠିତ ହେବାକୁ ଥିବା ଚତୁର୍ଥ ଟେଷ୍ଟ ଉପରେ ରହିଛି।

The post ଅର୍ଶଦୀପ ସିଂହଙ୍କ ଆହତ ପରେ ଭାରତୀୟ ଦଳରେ ଚେନ୍ନାଇ ସୁପର କିଙ୍ଗ୍ସର ଷ୍ଟାର ସାମିଲ appeared first on Dharitri Odia News.